وش تعريفكم للتشبه بالغرب يا مجتمعي العربي والإسلامي

[VaSh ThE sTaMpEdE]

بسم الله الرحمن الرحيم

السلام عليكم ورحمة الله وبركاته ، كيف الحال إخواني ؟ ....نبدا بالموضوع ( توني كاتبه بس بالصدفه سكرت المتصفح ، أبو القهر يا شيخ )

ملاحظة : لوحة المفاتيح الي عندي مافيها عربي ، سامحوني اذا لقيتوا أخطاء .

أمس أنا قريت موضوع عن الجماعة الي مسمية نفسها " عصابة X5 " ، وعاد كثير منكم يوم شافوا أشكالهم مع لبسهم وشعرهم قالوا ذولي يتشهبون بالغرب . فذا الموضوع أنا أبي أتكلم عن هذي الظاهرة وتصحيح تعرفيها ونشوف من هو الي يتشبه بالغرب من جد .

أوكي الحين خلني أبدا بطرح رأي.
في نظري أنا ، أنا أقول للواحد إنه متشبه بالغرب لما أشوفه سوا حركة عشان فلان سواها ، أو لبس لبس عشان فلان لبسه ، ولا يقول كلمة عشان فلان قاله. يعني لو بدون فلان ، كان صاحبنا ما سوا هالشيء . وأنا أكره مثل هالحركات .

أما الي يسوي قصة شعر ، عشان هو شايف إنها حلوة عليه ، ولا يلبس لبس عشان هو عاجبه ، ما أشوف هذا في تشبه في الغرب ، أشوفها حرية شخصية وأحلى شيء فيها إنه ما سواها عشان فلان ؟ فاهمين وش قصدي ؟

أنا شاب سعودي مسلم عمري 16 ساكن حاليا في أمريكا . وأسألك هالسؤال ، لازم ألبس ثوب طول حياتي ؟ أنا الحمدلله أفتخر إني عربي ومرتين رحت المدرسة الأمريكة ( high school ) بالثوب والشماغ ( لو سمعتوا بعض العبارات الي قالوها أخوياي : طالبان ، قاعدة ) . وأنا عندي عزة نفس وأرفع راسي للعالم ، بس هذا مب يعني إني لو لبست جينز ( Jeans ) يعني إني تشبهت بالغرب. ولو طولت شعري محا طوله عشان الفنان الفلاني ولا الممثل الفلاني شعره كثيره ( أنا أصلا مقرع لأنه مشوار تجهز شعرك في الصبح <<<<< عجاز )

يعني العربي من أول ما يطلع من بطن أمه لين ما يندفن تبونه يلبس ثوب ؟ ولا ممنوع يحط أي قصة إلا قصة وحدة ولا كيف ؟ أنا ما أكذب عليكم أكره الي مسوي نفسه شيء وهو مب هالشيء ، ولا يسوي شيء عشان فلان سواه ، بس وش الذنب في إني أمثل الي أحبه ولكن تمثيل سليم ؟ وما يكون فيه حب للغرب .

خلني أعطيكم كثال :
أنا لوني بني أو على قولة الأمريكان Light-Skin ، وعاد ساكن في أمريكا ، والناس يعتبروني أسود بسبب لون بشرتي لأنهم ما يدرون إني سعودي (شيء عادي عندي لو أسود ولا أبيض ما فرقت ، أنا أفتخر بلوني ولا علي من أحد ) ، ولو درو إني سعودي قالوا إرهابي ( واجهت بعض الStereotypes ومرة صفقت وحد كف لأنه غلط على السعودين ) . وعاد أنا نظامي هيب هوب Hip Hop ، يعني بلايز طويلة ومرات أنزل الجينز ، بس أنا ما ألبس هاللبس عشان توباك ولا سنوب دوق ولا ولا ، أنا بس ألبس هاللبس عشاني أعشق الراب ( الراب الزين مب الشين ، أكره التافهين الي ما عندهم شيء يتكلمون عنه ) وأنا نفسي أكتب راب عربي ، بس هذا مب يعني إني أتشبه بالغرب ، لأني أنا نفسي كشخص عربي وسعودي ومسلم أعتز بهالشيء ، وأخسي أكون أمريكي ( ما إنه الأمريكان فيهم شيء بس الي أقصده لو ايش أعتزل عن شعبي وعربيتي ) . ولو ايش ألبس قلادة Chain ، لأني أدري إنها حرام .

والحين بأطرح مثال يبين شيء آخر .
أنا أعرف واحد في السعودية وللأسف هذا يعشق الرابر الشهير Tupac ، أنا ما قلت فيها إنك تسمعله لأني أنا أسمعله دايم وله كلمات حلوة ، بس هذا الشخص يعشق توباك عشق ، ودايم يقول أبي حياتي thug life والخرابيط ، ويعني يسوي أشياء على طريقة توباك وكذا ولا أنا قعدت أسب في توباك قام يدافع عنه ، ويبلس قلادة وبس يسمع توباك ويشتري بلايز عليها توباك. أولا أنا أشوف هالشيء مبزرة لأن شلون واحد مثله يحط في نفسه هالأفكار ، حنا مب عاشين في عالم من العصابات والghetto والمآسي ( مو يعني إنه ما عندنا مشاكل في السعودية بس هذا الشخص حياته حلوة ) . وثاني شيء أنه أشوف هالشيء حرام لأن هذا من جد تشبه بالغرب ، كيف تنزل مستواك لهل المستوى وكيف تحاول تشبه نفسك بتوباك ، أو خلني أقول ليش تشبه توباك بنفسك .

الحين وش هو تعرفيكم للتشبه الغرب ، إنا نسوي مثل الي يسوونه ولا كيف ؟ الغرب صنعوا السيارة وحنا نستعملها كل يوم ، هذا مب يعني إني نتشبه فيهم . ولو العربي لبس جينز خلاص يعني رمي عزته العربية في الزبالة ؟ لا ، بس لبس لبس ثاني .

أرجو إن أكون بينت نقطة نظري ، وبس أبي أقولكم إني ما قاعد أدافع أو أهاجم شيء ، بس جابيلكم مظاهر أبي أناقشها كإخوان ونحاول نتخلص منها ، ولو واحد أقنعني إنه الي أنا أسويه تشبه بالغرب ، بكل شرف وفخر بأعتزل عن هالحركات .

شكرا...والسلام

[بو ضاري]

الحين وش هو تعرفيكم للتشبه الغرب

لو تسمحولي بالوصف ..مخنثه زايده..يكرم السامع شويه حوش ولقت بعضها وسوت قروب

لهالسوالف ..واذا ماتسمحولي فأمسحوا ردي وحقكم علي

على التعبير القاسي ..

[VaSh ThE sTaMpEdE]

السلام عليكم أخوي
ويا ليت لو استخدت عبارة أحسن مثل " زيادة الأنوثة "

لو تسمحولي بالوصف ..مخنثه زايده..

ايه بس من يعني ؟ الي يحط جل في شعره ولا كيف ؟

شكرا..والسلام

[Ahmed Blight]

قرأت الموضوع كامل و عجبني كلامك
بالنسبة لي ما اعمل الشيء الي اشوفه عاجبني او يناسبني
مو اعمل شيء عشان اقلد حد و بعدين ما اشوف التقليد في بعض الامور شيء

الحين الي بيطول شعره الي بيحط في شعره جل في ايش بيضر المجتمع
اظن الامر حرية شخصية ليه الناس تحشر نفسها و تقول تشبه بالغرب , هو ضرهم بشيء @@

[بو ضاري]

السلام عليكم أخوي
ويا ليت لو استخدت عبارة أحسن مثل " زيادة الأنوثة "

ايه بس من يعني ؟ الي يحط جل في شعره ولا كيف ؟

شكرا..والسلام

لا هم فيهم نقص تربيه ونقص رجوله عشان جذي أستخدمت هالوصف

اذا عن الشكل ممكن يعرفون انه القزع ممنوع بالاسلام ومحرم شرعاً

واذا عن اللبس يدرون انه البنطلونات الوسيعه والطويله ولبس الملابس الخفيفه كالحرير

وفتح القمصان ليظهر شعرهم الوسخ تقليداً للمغنين ..

تغاضيت عن كل هالاشياء لان وصفي لهم بوصف داخلهم ..تخلوا عن عفه الاسلام وتوجهوا

لوصاخه الغرب ..فاغلب هؤلاء المغنين الذين يحبونهم اما مثليين او لواط ..وانت تعرف ماذا اقصد

كونك ساكن في امريكا

وبهالوصف صح انه قاسي لكن ماتستعمل كمسبه وهي رده فعل الشيبان الاولى

تجاه هالنوعيه من الشباب ..<- شايب ..

[OctoBot]

تقليد الغرب هو عمل قلبي و باطني, ما تقدر تحكم إنه في أحد قاعد يقلدهم أو لأ.. إلا بشرط واحد, و هو إنه يقلدهم فيما يخصهم, أي لو مثلا معروف 100% إنك لو لبست جينز بتكون نصراني, بيكون الجينز حرام, و هذا خلاف الواقع الآن, و لكن كان على سبيل المثال, و لذلك حرم عقد اللحى و تظفيرها لأنه يخص عرب الجاهلية, و حرم لبس الصليب لأن النصارى يختصون به, و مثلا تلك القبعة الصغيرة التي يلبسها اليهود... الخ الخ.

إن كان الملبس و المظهر لا يخصهم, فالبس ما شئت مما أباح الإسلام, ساتر فضفاض لا يحتوي علامات وثنية أو نصرانية أو يهودية, و تأكد أنه لا يحتوي صور ذوات الأرواح لأن فيها شبهة.
و الشعر الضابط الوحيد في الإسلام إنه يكون نظيف و في طول واحد ( وقد حرم علينا القزع, و هو من المحرمات الشائع انتهاكها في هذا الوقت ), و الجل ما أشوف فيه شيء, لكنه يسبب تساقط الشعر, و بعض الناس ما يعرفون الحد بين الاستخدام الجيد الذي يحسن المظهر و الاستخدام السيء الذي يسء للمظهر.

و تذكروا, أن أفضل اللباس عند الرسول صلى الله عليه و سلم هو القميص الرومي, أي قميص الأعداء في ذلك الوقت, فلتعتبروا بذلك.

[VaSh ThE sTaMpEdE]

أخي A Y :
مشكور على ردك وكلامك فيه منطق

أخي بو ضاري :
إظن إني فاهم وش قصدك
بيني وبينك أنا ما أطيق الشباب الي يلبسون جينز ضيقة ولا بلوزة ضيقة ، ولا زي ما قلت فتح القمصان . وأنا كمان أعتبرها قلة رجولة ، بس هالأيام هالأشياء يقالها ستايل ولا نيو لوك new look ، يعني مو من حقهم يلبسون هالأشياء ؟ ( مع إني ما أطيقها أبد ) .
بس زي ما قلت الي يبي يقلد مغني ولا ممثل ، هذا أكيد بلا شك متشبه في الغرب وماله عذر.

شكرا..والسلام

[VaSh ThE sTaMpEdE]

أخي OctoBot :
مشكور على الرد
عجبني كلامك يوم قلت

إن كان الملبس و المظهر لا يخصهم, فالبس ما شئت مما أباح الإسلام

وأنا معك في هذي النقطة

وكمان كلامك يوم قلت

الجل ما أشوف فيه شيء, لكنه يسبب تساقط الشعر, و بعض الناس ما يعرفون الحد بين الاستخدام الجيد الذي يحسن المظهر و الاستخدام السيء الذي يسء للمظهر.

من جد في كثير ناس يحطون طنين جل على روسهم ، تقول عش ميبس

وللأسف كما قلت في كثير ناس شعورهم تخالف السنة ويكون فيها القزع

شكرا..والسلام

[Ahmed Blight]

باك >>> ابغي اضيف كلام و اروح انام خخخخ

اني واي الحين كسؤال

هو في شيء من القرآن او السنة يقول الي يقلد حد عمل معصية

تشبه الرجال بالنساء و العكس هذي اوكي لها من القرآن

بس يعني لما تقلد حد في اشياء اشوف الامر عادي

يعني لو قلدت الغرب بأن شربت خمر عشان تقلدهم ,, اكلت لحم خنزير عشان تقلدهم هنا غلط .. و واضح

الإسلام ما يحرم شيء الا عشان فيه مضرة

بس لما تقلد في شيء عادي ما اشوف فيها أي غلط

لربما تطويل الشعر يقولوا تشبه بالنساء

و بتجي ناس بكل وقاحة و غباء بتقول نتشبه بالرسول كي تبرر هذا

لما بتطوله لدرجة يكون اشبه بشعر البنات هنا ممكن غلط

بس لما تطوله بشكل عادي يعني طويل بس مو ذاك الزود ما فيها شيء

انا شعري طويل بس مو طويل كثير فعشان كذا استعمل جل لأن بدونه شعري يكون ملخبط خخخخ >>> و ما يبغي يقصه يقول ملل نروح للحلاق و شكله كذا احلى XD

مطوله عشان احس شكله كذا يلبق لي احسن

بالنسبة للملابس الضيقة انا ما احبها عشان احسها مو مريحة @@

و بالنسبة لي عادي الي يلبسونها ما تفرق بس يعني ما اعرف المقص يلبسوا شيء صعب اتيخل ان الواحد يشعر بالراحة للبسه

بس كوسشن قلت فتح القمصان تعتبرها قلة رجولة

طيب ابغي اعرف ليش اعتبرتها كذا؟

و لو اني مو من الي يعمل هذي الحركة >> مثل ما قلت ما اعمل شيء الا اذا هو عاجبني << حتى الموضة ما تهمني الشيء الي يعجبني البسه و ما يهمني راي حد XD

انا ما اشوف فيها شيء , احسها يعني ك لوك جد حلوة , الحين الي فتح قميصه خلاص كفر @@

هو ما انكر في كثير ناس تلبس اشياء و تعمل اشياء تقلد الغرب بس دامها ما بتضر حد خلاص اشوفه امر عادي و مثل ما قلت في اول رد حرية شخصية

بس لما تقلد في الخطأ هنا يختلف الأمر

اما عن سالفة تقليد مغني او كذا ما اشوف فيها شيء عادية دام بتقلد في اشياء مو محرمة و عادية اوكي

بس جد اعرف حد عامل حياته على حياة مغنين راب XD منهم توباك و امنيم >> لدرجة ان لما توباك غاب اسبوع و ظن الناس انه مات قام هو اختفى اسبوع يقلد الحركة << اتكلم عن مغني راب عربي .. << بس اذا بتروح للراب العربي اغلبهم صاروا يغنون راب يسبون بعض و هنا التقليد الغلط .. مادري كيف يعمل اغنية يسب حد قدام الناس و يسمعها كم الف و مو حاسب حساب كم سيئة بيحصلها على الكلام الي قاله و هو يتناقل ...

>>> سوري على الإطالة .. صراحة ما احب ادخل العام احس في مواضيع كثيرة تستفزني عشان ما تعجبني افكار البعض خخ لاني اشوفها مو عادلة @@ , بس موضوعك عجبني رايك عشان اعتبره مثالي لكن نقطة التشبه بالغرب ارى انك مبالغ بها لأنك تعتبر تقليد الغرب في شيء غلط "اتكلم عن مسألة اللوك كمثال تراه انه خطأ"

وللأسف كما قلت في كثير ناس شعورهم تخالف السنة

انت قلت بنفسك تخالف السنة
اني واي لما حد ما عمل شيء من السنة ما راح يحصل سيئات لهذا
لكن اكيد اتباعها افضل عشانها سنة النبي
بس اني واي ان الامر عادي..

لو تسمحولي بالوصف ..مخنثه زايده..يكرم السامع شويه حوش ولقت بعضها وسوت قروب

في الملف الشخصي العمر 33 ...

لو الكلمة قالها طفل قلنا معليش طفل و ما يعرف ايش يقول

بس يعني شخص عمره 33 يقولها كذا في العلن ..

عارف المعنى الي قاصده بها بس مو أي حد بيجي يفهمها كذا و ما كان يحتاج يعني هذا الوصف ..

[بو ضاري]

فاش ..

حمدالله انك فاهمني؟

في الملف الشخصي العمر 33 ...

لو الكلمة قالها طفل قلنا معليش طفل و ما يعرف ايش يقول

بس يعني شخص عمره 33 يقولها كذا في العلن ..

عارف المعنى الي قاصده بها بس مو أي حد بيجي يفهمها كذا و ما كان يحتاج يعني هذا الوصف

والله بو 9 والا بو 99 مو شغلك ورجاءاً لا تكون فضولي بمراجعه ملفات اعضاء خلق الله..لا سبيت احد ولا غلطت احد موضوع يتكلم عن مياعه الرجال بمعنى أصح لو أخترت معنى ثاني ومفرد المياعه عندي هو هذا للإسف .


الحديث جاي مباشر ومفهوم والرسول صلى الله عليه وسلم قال

لعن الله المخنثين من الرجال، والمترجلات من النساء

وعموماً التفسير اللي قصدته هو هذا

التخنث في اللغة بمعنى : التثني والتكسر ، وتخنث الرجل إذا فعل فعل المخنث . وخنث الرجل كلامه : إذا شبهه بكلام النساء لينا ورخامة .

والتخنث اصطلاحا كما يؤخذ من تعريف ابن عابدين للمخنث : هو التزيي بزي النساء والتشبه بهن في تليين الكلام عن اختيار ، أو الفعل المنكر .

وقال صاحب الدر : المخنث بالفتح من يفعل الرديء . وأما بالكسر فالمتكسر المتلين في أعضائه وكلامه وخلقه . ويفهم من القليوبي أنه لا فرق بين الفتح والكسر في المعنى ، فهو عنده المتشبه بحركات النساء .

اما تفسير اللي ببالك انه اثنين شباب وراء الداعوس وسوو فاحشه ؟؟ هذا اللي راسخ بتفكيرك؟ ضحكتني !!ياااااااو للحين في ناس تفكر هالتفكير ؟!؟ قووا لغتكم العربيه لو سمحتوا قبل لا تردون على خلق الله


أسمحلي فاش بس الفلسفه الزايده ترفع ضغطي أحياناً

[VaSh ThE sTaMpEdE]

مشكور AY على ردك الجميل ، خل نتناقش

لكن نقطة التشبه بالغرب ارى انك مبالغ بها لأنك تعتبر تقليد الغرب في شيء غلط "اتكلم عن مسألة اللوك كمثال تراه انه خطأ"

يا الحبيب مين قال إني ضدها ، لو قريت ردي انا قلت :

بس هالأيام هالأشياء يقالها ستايل ولا نيو لوك new look ، يعني مو من حقهم يلبسون هالأشياء ؟ ( مع إني ما أطيقها أبد ) .

لاحظ إني قلت " مو من حقهم " ، أنا مب ضدها ، بس أنا عن نفسي ما أحبها ، زي ما قلت انت

و لو اني مو من الي يعمل هذي الحركة >> مثل ما قلت ما اعمل شيء الا اذا هو عاجبني

شكله كان في سوء تفاهم بس

بس يعني لما تقلد حد في اشياء اشوف الامر عادي

في دليل نبوي للنبي صلى الله عليه وسلم ، وأنا بصراحة ناسيه بس لقيته في النت ( يا رب يكون الإملاء صحيح )
لتتبعنَّ سَنَن من قبلكم حذو القذة بالقٌذّة حتى لو دخلوا جحر ضب لدخلتموه } قالوا: يا رسول الله، اليهود والنصارى؟ قال: { فمن }
هذا الدليل هو الي يخليني أناظر الناس الي يسوون حركة عشان الفلان المشهور من الغرب سواها إنهم تشبهوا بالغرب

الإسلام ما يحرم شيء الا عشان فيه مضرة

بس لما تقلد في شيء عادي ما اشوف فيها أي غلط

لربما تطويل الشعر يقولوا تشبه بالنساء

و بتجي ناس بكل وقاحة و غباء بتقول نتشبه بالرسول كي تبرر هذا

لما بتطوله لدرجة يكون اشبه بشعر البنات هنا ممكن غلط

بس لما تطوله بشكل عادي يعني طويل بس مو ذاك الزود ما فيها شيء

انا شعري طويل بس مو طويل كثير فعشان كذا استعمل جل لأن بدونه شعري يكون ملخبط خخخخ >>> و ما يبغي يقصه يقول ملل نروح للحلاق و شكله كذا احلى XD

مطوله عشان احس شكله كذا يلبق لي احسن

كلامك هذا كله فيه منطق

انا ما اشوف فيها شيء , احسها يعني ك لوك جد حلوة , الحين الي فتح قميصه خلاص كفر @@

أنا ما قلت كفر ولا انتقد هالفئة من الجهة الدينية ( بس الشخصية ).

بس كوسشن قلت فتح القمصان تعتبرها قلة رجولة

طيب ابغي اعرف ليش اعتبرتها كذا؟

بصراحة مدري ، بس أحسها كذها ، رأيي الشخصي فقط

لدرجة ان لما توباك غاب اسبوع و ظن الناس انه مات قام هو اختفى اسبوع يقلد الحركة

لووووول

بس اذا بتروح للراب العربي اغلبهم صاروا يغنون راب يسبون بعض و هنا التقليد الغلط .. مادري كيف يعمل اغنية يسب حد قدام الناس و يسمعها كم الف و مو حاسب حساب كم سيئة بيحصلها على الكلام الي قاله و هو يتناقل ...

بس مو كل الرابرية العرب كذا ، أنا كتبت راب عن مثل هالأشكال التافه الي تقعد تسب بعضها وتسمي نفسها تحديات شريفة ، لا وبعد مسوين جروبات وحركات محسبين نفسهم نظام west و east side .
أنا مثلك ما أحب هالنوع من الراب ، بس في كمان راب حلو موجود

انت قلت بنفسك تخالف السنة

اني واي لما حد ما عمل شيء من السنة ما راح يحصل سيئات لهذا

لكن اكيد اتباعها افضل عشانها سنة النبي

بس اني واي ان الامر عادي..

اذا القزع حرام أجل الي يسويها تجيه آثام

إذا كانت مكروه ما عليه شيء.
لأن في ناس تشوفها حرام وفي ناس تشوفها مكروه .

سوري على الإطالة

يا رجال خذ راحتك حنا هنا عشان نتناقش ونبدي رأينا بأسلوب عاقل وجميل ومهذب

شكرا...والسلام

[VaSh ThE sTaMpEdE]

أخي بو ضاري :
هد أعصابك يا رجال ما نبي طقاق نتي .

اما تفسير اللي ببالك انه اثنين شباب وراء الداعوس وسوو فاحشه ؟؟ هذا اللي راسخ بتفكيرك؟ ضحكتني !!ياااااااو للحين في ناس تفكر هالتفكير ؟!؟ قووا لغتكم العربيه لو سمحتوا قبل لا تردون على خلق الله

لا تخاف أنا ما فكرت كذا ، وفاهمك 100% ، وأظن كمان أخونا AY فهمها زي ما انت تقصد ، بس يقول إن الناس الباقين يمكن يفهمونها على إنها لواط .

أسمحلي فاش بس الفلسفه الزايده ترفع ضغطي أحياناً

يا رجال خذ راحتك ، بس هد أعاصبك وحاول ترد بأسلوب أحلى ، وأنا بعد ما أطيق الفلسلفة الزايدة ، بس أظن أخونا AY ما كان قصده يتفلسف ، بس بين وجه نظره إنه الكلام هذا ما ينفع تقوله في الأماكن العامة زي المنتدى ( أدري المنتدى مب في الشارع بس يعني مكان عام عالنت )

شكرا...والسلام

[vocial]

(مخنث) تعني الرجل الذي يتشبه بالمرأة (الخكري) و لا دخل لها بمعنى أخر

=========================================================

أما بالنسبة للموضوع ^^

الخلاصة : مو مشكلة إذا قلدنا الغرب ..... لكن بما هو حسن منهم فقط ^^

مثال : إذا قلدتهم بصفة وهي (النظافة) فهذا شيء جيد و يحبذ عليه ^^

مثال أخر : إذا قلدتهم بصفة سيئة و هي (بذاءة اللسان) فهذا شيء سيء ولا يحبذ عليه -__-

وشكرا ^^

[VaSh ThE sTaMpEdE]

هلا Vocial ، ما شاء الله انت تتنقل بين قسم الحديد والعام ، لا تقول لأعضاء قسم الحديد إني كاتب هالموضوع تراي قايلهم إني مشغول ، وهو من جد تراي مشغول بس كنت لازم أكتب هالموضوع.

لكن كلام بو ضاري صحيح .... (مخنث) تعني الرجل الذي يتشبه بالمرأة (الخكري P و لا تعني أي شيء أخر

وهذا الكلام وارد في تفسير إحدى أحاديثه صلى الله عليه و سلم

أنا ما خالفت تعريف الأخ بو ضاري في المخنثة .

عموما بس حبيت أقولكم الأمثلة الي طرحتها حلوة ، وتبين وجهة نظر سليمة.
بس لو واحد قلدهم فيما لا يفيد أو يضر ، مثل اللبس ؟ عادي ؟

شكرا...والسلام

[بو ضاري]

فاش

يازين الواحد يارجع لجذوره وافتخر بماضي اجداده وصاروا قدوته في الحياه

اما الواحد اذا قلد اشخاص ثانين ..فتحسه شخص غريب بينهم

مثال..

لبس هندي غتره وعقال ..شوف الناس شلون تضحك عليه ..لانه مو لايق ..

نفس الشيء مع المتشبهين بالغرب بمجرد انه يعرفون انك عربي يقولون "ابدن هذا مو لايق عليه"..<-امريكي كاوبوي داق اللثمه اللي بيقول جذي ..

حلو انه تتمدن وتلبس لبساهم لكن ..مو حلو انه الواحد يتبذل لدرجه توصل انه نسخه مستعربه

منهم .