طريقة زواج جديدة

[lynda]

السلام عليكم ورحمة الله وبركاته..

أهليينلبنات والأولاد الحلوين شلونكم ؟؟ بخير إن شاء الله..

اليوم ابغى أناقش معاكم فكرة قريتها باحدي المدونات وبالتحديد مدونة ( خــــواطــر )

سيطول الحديث في هذا الموضوع فأرجو أن لا يجد إليكم الملل طريقا..

الفكرة مو غريبة تماماً لأن صاحب المدونة سامع عن واحد مطبقها

الفكرة. . .
لنفترض إن في واحد عمرة 18 سنة كمجرّد فرض..
ليش ما يتقدم هذا الولد و يخطب بنت معينه بأي طريقة كاختيار أهله لها
( شخصيا أنا أشوف إنكم كبار والمفروض تختارون بنفسكم )..
وبعد ما يشوفها و تشوفو و يشوفوا بعض و تتم الموافقة.. يتم عقد القران بينهما >> حلوة القران

وهنا تبدا الفكرة .. بعد العقد تقعد البنت في بيت أهلها و الولد في بيت أهله..

ليه مستغربين!! عادي مو شي غريب

مو مثل زواج المسيار .. لا.. محنا حق ها الخرابيط
لا كن تكون البنت في بيت أهلها الين هو ( الولد ) يجهز نفسه مثل الناس
يعني يخلص دراسة يلاقي بيت ولا شقة و غيرة ..بعدين هي تجي عنده ..
وفي المدة إلي البنت بتكون فبيت أهلها مصروفها وخرابيطها كله من أهلها

بتقلون ليش يعني يتزوجها وأهلها يصرفون عليها !!

والله لو ما كانت متزوجة كان أهلها يصرفون عليها يعني المسئلة سيم سيم
وبذلك لن يتغير على الأهل الكثير..


أنا ما أقول أن الولد ما علية شي %100 لا طبعا علية لا كن على قدرة
يعني مو كل يوم تدقين علية يعبي رصيدك عيب هي مرتين بالأسبوع بس كفاية
وطبعا أهلة يساعدونه هذي مو لازم لها كلام

بعد ما عرفتوا الفكرة نجي نناقشها وأنا أبدء

أنا قعدت أفكر فيها وتوصلت لتالي:

الإيجابيات

- كل واحد يضمن إن الثاني ما كن له سوابق ( شخصيا ما أهتم له سوابق أولا )

- فله لأنهم يقدرون يطلعون مع بعض و ولا احد يقدر يقول شي

- رح يكونوا متعودين على بعض يعني بينهم تفاهم وعارفين عادات بعض

- يعرفون بعض أكثر يعني لما ينقلون مع بعض مارح يصير تصادم فكري بينهم

- أعتقد إن للفكرة أمل أكبر بين القرايب يعني أذا الولد بياخذ بنت عمة أو بنت خالة احتمال نجاح الفكرة شبة مضمون

( لا كن أنا ما أحب فكرة الزواج من القرايب )

الصعوبات أو العقبات

-وين يلاقي الواحد عيله تقبل بهاذي الفكرة ؟؟

- هل أهل الولد سيوافقون أعتقد أن المسئلة شوي صعبة

- كيف تتأكد العائلة إن الولد جاد مو قاعد يلعب

- نجي لأهم شي وهو تقبل المجتمع للفكرة

((((((((((((( انـتـوا أيـش رايــكـم هـل للـفـــكــرة أمــل؟ )))))))))))

[sweet Mio]

مرحبااا ^^
بصراحه احس ان الفكرة مالها داعي مادري بس يعني ليش هالطواله هذي كلها
يعني في الوقت الحالي ..
لازم يكون الولد على مقدرة لتحمل مسؤوليه فتح بيت وتكوين اسرة وتوفير لهم سبل العيش الكريمه
مو يجي مراهق عمرة 18 سنه ويقول ابي اتزوج وهو حتى ما خلص دراسه وبصراحه الشباب في هذا السن كلامهم كثير وما يؤخذ به على محمل الجد وموضوع كبير مثل هذا
لان الزوج عمر مو ليله او ليلتين

وفترة الخطوبه تكون فترة يعرف الزوج على زوجته ويتفاهم معاها على اساسيات حياته وتعرفه هي على نمط حياتها ويكونو على بينه من كل الامور

انا مو مع الفكرة اللي عرضتيها لنا ^.^
وشكرا لج على الطرح
موفقه اختي

[B@dr]

السلام عليكم و رحمة الله و بركاته ..


هي بصراحة فكرة مية مية ^_^ ، لكن اعتقد أن العقبات اللي ذكرتيها موجودة و مستحيل تزول ، لذا أعتقد أن الفكرة ستظل مجرد أحلام رغم إنها فعالة جدا ً و اللي يده في النار مو زي اللي يده في المويه !! :]

[ابتسامــــــه]

من عمرهم 18 سنه يطلعون و يدخلون مع بعض

إلين الولد يكمل 24 أو 25 بعدين يتزوجون >> مستحيييييييييل يتم الزواج

[المكاويه]

مرحبا
انا شايفه انه هو ده اللي بيحصل
بعض الشباب,, يفضل مملك على البنت,, سنتين او اكثر
و بعدين يتزوجو
و هي قاعده في بيت اهلها؟؟
ولا مو ده القصد؟؟
بس اللي اعرفهم,, ما يتركو البنت تطلع مع خطيبها,, مع انه زوجها و يجوز لهم
و اعرف كمان ناس
البنت تتزوج,,, و تكمل دراسه عند اهلها
و الشاب مثلا يكون شغله بره البلد
فيجي كل ويك اند,, عند بيت اهلها,, او اذا لهم شقه مخصصه
بس هذول,, خلاص متزوجين,, و ممكن يخلفو كمان
الفكره حلوه بصراحه,, بس صعبه جداااااا
صعب تقبلها من الاهل
سلااااام

[غالي الساهر]

أي الفكرة حلوه من ناحية وحده بس ؟؟ >>>> أنه يكون في وله وشوق لبعض
>>>>> طبعاً أمزح

وفي الحقيقة الحين الطلاق صار بالجملة يعني تخيلي بعد كل هذا الأنتظار بعد مايكونوا في بيت واحد
وبعد ما الأخ يكون نفسه والبنت تنتظر ذاك اليوم ويحصل الطلاق بغمضة عين شنو يكون موقف الأهل
وبعدين تخيلي مات الولد في فترة الأنتظار يعني لا سمح الله يعني ماعاشت معه ولا عاش معها
وتصير البنت أرمله أو العكس صحيح وهي متزجة نص ونص

هذا رأيي وأن الفكرة فيها سلبيات أكثر من الأيجابيات

[أنتراوي]

هي تجي الفكرة بس بشرط يكون عنده القدرة على الصرف على زوجته ويسكنها معه أما هي ببيت أهلها ويصرفون عليها وش الفايده تقل ميسيار صار على العموم الواحد لاجا يتزوج يبي البنت الصالحه وألي تخاف ربها هذا أول شيئ وبعيد الجمال ووو ووو وووإلخ