بسم الله الرحمن الرحيم
السلام عليكم ورحمة الله وبركاته ؟ كيف الحال يا إخوان ؟ عساكم بخير
أنا أدري إنه بتجيني شكاوي كثيرة وردود معادية وشرسة ، بس الي مب عاجبه الموضوع لا يرد ، تبي تنتقدني على عيني وراسي ، بس سووها باحترام لأن حنا كلنا مسلمين ولازم نتعلم آداب الحديث. بالعربي التزم بالأدب أو لا ترد ، لأن مالي خلق مشاكل.
قيادة المرأة في السعودية موضوع حساس جدا. تجد الكثير من المؤيدين ( وأنا منهم ) وتجد الكثير من المعارضين. وطبعا هذا شيء طبيعي ، احنا بشر وشيء طبيعي نختلف ، خل نتوصل لحل متفق عليه أو نقنع بعض بالأدلة والمنطق.
قبل ما أبدا خل نحلل الفئتان : المؤيدة والمعارضة. حنا لازم نفهم إنه الفئة المعارضة ما قاعدة تعارض نذالة ولا وساخة . قاعدة تعارض لأنها خايفة على المرأة ، وكلنا نخاف على حريمنا ، يعني نيتهم حسنة.
وحنا الفئة المؤيدة مو هدفنا تعري المرأة أو إثارة الفتن أو التقليل من كرامتها ، ولكن نرى بالمنطق والعقلانية أنا قيادة المرأة ليس فيها أي مشكلة ونطالب بها لحاجات المرأة ، ما نبي نظلم المرأة ، يعني نيتنا كلها حسنة.
نشوف هنا إن كلا الفئتين نيتهم حسنة ، كلانا يريد الحفاظ على شرف المرأة. الاختلاف هو أن الفئة المعارضة ترى أن قيادة المرأة يقلل من كرامة المرأة ويعرضها للمحرمات ، والفئة المؤيدة ترى أنا قيادة المرأة شيء طبيعي وعادي وإسلامي أيضا .
طبعا بما أنا بدأت الموضوع خلني ابدا بطرح رأي أول واحد وليش أدعم سواقة المرأة .
أبيك الحين تفضي مخك وتروق وتركز معي زين في القصة التالية :
القصة :
امرأة مسلمة متحجبة محترمة شريفة متحشمة طلعت من بيتها وركبت السيارة ( طبعا هي الي بتسوق ) ، شغلت السيارة ومشت . راحت للجامعة ، قعدت هناك ودرست ، يوم خلصت ركبت السيارة مرة ثانية وشغلتها ورجعت البيت. الحمدلله اليوم مرة بسلام .
الحين وين المشكلة في القصة ؟ بنت نيتها حسنة ، بنت محترمة ، خلق رفيع ، ما تميلحت قدام أحد ولا أخذت رقم أحد ولا شيء .
يجيك أحد من المعارضين ويقول "لا ياخي. يمكن هذي المرة الحرمة ما جالها شيء لأن صادف يومها بأنه ما كان شباب مغزلجة ". طيب حلو ، خل نقول اليوم ثاني طلعت الجامعة مرة ثانية ، وجتلها مضايقات من شباب مغزلجين. تصير المشكلة أنها تعرضت للمضايقات.
طيب حبيبي الحين أنا ما قلت لك البنت محترمة شريفة متحشمة مسلمة ونيتها حسنة ، وانت بنفسك قلت انت لو جتها مضايقات . طيب هي أجل مالها داخل ، الشباب المغزلجة هما المسوين المشكلة مب هي ، صح ولا لأ ؟ هي ما ركبت السيارة مفصخة ولا فقعت صوت السيستم ولا حطت لافتة على السيارة " تعالوا رقموني " . هي بس تبي تروح تسوي شغلها وترجع ، الشباب المغزلجية الي ما يستحوون على وجيهم وهم الي غلطوا عليها.
فالحين أنا اسأل ؟ تمنع المرأة عن القيادة بسبب المشاكل الناتجة عن شباب مالها دخل فيهم من الأساس ؟
شيء ثاني ، الحين بيجي الواحد يقول طيب لو المرأة بتسوق بتصير زحمة ، يبو هذا عذر أقبح من ذنب . أول شيء حنا حاليا السواق صار بديل للمرأة في السواقة ، الحين لو المرأة تسوق خلاص ما عاد نحتاج سواقين ، أي زحمة بالله عليك .
وخل نقول بيصير زحمة ، وشوله نمنع المرأة عن السواقة ومو الرجال ، مو الرجال يسوي زحمة بعد ، ولا على راسه ريشة ؟
عشان كذا ما ينفع تستخدم العذر " بتصير زحمة " لأن أي إنسان ، رجل أو مرأة أو حتى جنس ثالث ، بيشغل حيز من المساحة وبالتالي بيكون له دور في لعب الزحمة. إذا تمنع المرأة عن السواقة بحجة إنه بتصير الزحمة ، تكون ظلمت المرأة لأن الرجل والمرأة كلهم يسوون زحمة.
النقطة الثالثة : يعني انت تبي أختك تطلع برا البيت متى ما تبي وتروح وين ما تبي ؟
أول شيء الحمدلله أن أثق في أختي ، ولو ما أثق كان صرت معارض لسواقة المرأة. طبعا لما المرأة بتستلم سيارة وتبي تروح عند صديقتها ولا شيء أكيد بتقول لأبوها أو أمها ( هذي إذا كانت بنت صادقة طبعا ).
ثانيا ، حنا ليش علطول نظن بالسوء في المرأة؟ دايم نقول المرأة لو طلعت من البيت خلاص تبي يجي واحد يرقمها وهالأعذار التافهة ، مب مكتوب في القرآن :
(( يا ايها الذين امنوا اجتنبوا كثيرا من الظن ان بعض الظن ))
يعني انت ما تثق في أختك ، وين الروح العائلية ؟ وين روح الإخوة والمحبة ؟ يعني تثق في أخوك 100% لما يسوق إنه محا يغازل بس ما تثق في أختك لما تبي تسوق 100% تخاف إنه هي بترقم . والمشكلة إنه العيال هم المهبل ، هم المجانين الي يلاحقون البنت كل مكان ويزعجون أمها. اذا انت خايف على أختك ما فيها شيء ، أنا مثلك ، أنا أخاف أختي لما تمشي برا البيت في السعودية ، لأن الشباب السعودية - مو كلهم - مهبل ورايحين فيها ، يزعجون البنت ويلاحقون البنات حتى لو كانوا مع أهاليهم ، قمة في التخلف ! بس محا أحول خوفي لظلم وأمنع أختي تسوق. ياخي اذا اختك كانت تسوق وجا واحد يضايقها ، خلها تدق عليك عشان تروح تلعن أبو إبليسه ، وأنا أفزعلك بعد ، بس مو تقعد تلوم المرأة والمشكلة ناتجة من الرجل أصلا
أنا بأكتفي بهالنقاط حاليا ، إن شاء الله نشوف تفاعل من الأعضاء بأسلوب محترم ومؤدب
والسلام عليكم
ملاحظة : تراي تحمست مع الموضوع وكتبت بسرعة ، سامحوني اذا لقيتوا أخطاء إملائية
البنات اكيد ما يعرفونه) في الغالب هناك 3 احتمالات 
رد: أنا مع سواقة المرأة في المملكة ، بس انت ضدها ، تعال نتناقش ونتفاهم
