ملاحظة : ترا أنا توني قايم من النوم وعلطول دزيت للدوام لأني متأخر وأمس ما نمت زين أبد ، ، اذا لقيتوا أي أخطاء إملائية ، هذا مشكلتكم مب مشكلتي لأني أنا ما نمت زين 
السلام عليكم ورحمة الله وبركاته ؟ كيف الحال يا جماعة ؟ عساكم بألف صحة وسلامة
أنا خووي يشتغل في أحد فروع د.كيف ( تراه شركة سعودي تابع للراجحي ، أنا حسبته شركة أجنبية ) وفي ذاك الفرع في واحد إندنوسي مسيحي يشتغل معهم. طبعا انتم تعرفون كيف السعوديين - مب كلهم - يعاملون الأجانب ، وأنا وخووي نكره هالبياخة ونكره الهياط على العمالة لأنهم من جد مساكين وحالتهم صعبة. المهم ، في الشغل ، محد يدبر إنجليزي غير خووي ، فدق صداقة مع ذا الإندنوسي. طبعا شوي شوي بدا يطلع معنا بين كل فترة وفترة.
أول مرة أطلع مع صاحبنا الإندنوسي رحت أمره من شقته. بس كنا وأنا وإياه في السيارة وطبعا ما عرفه زين فكان حرج شوي ، وحنا في الطريق للنادي مسكنا أنا وإياه خط سواليف.
قعدت أقوله أنا أدري إنه تجيه معاملة سيئة من السعودين وأتأسف على هالشيء ، وهو يقول نعم تجيني وكثير وغريبة الشعب السعودي مب محترم أبد للأجانب . بعدين سألته " طيب يعني مافي أحد سعودي كان مؤدب ولطيف معك أبد ؟ " ، قال إلا في بس مب كثير.
بعدين قعد يقولي كيف إن السعودين يعاملون الأجانب كأنهم أوطى منهم. وبيني وبينكم يا إخواني السعودية الرجال صادق ، لأن من جد هالعادة منتشرة كثير ، ما صارت قلة أدب ، صارت عادة للأسف. وأنا أسأل نفسي ليش حنا كذا ، أخبر إنا حنا مسلمين بس والله مدري وين الإسلام ، وحتى لو ما كنا مسلمين وين الإخلاق عالأقل ؟
ليش نشوف نفسنا عالعالم مدري.
مثلا أنا كل يوم قبل ما أروح الدوام أمر البقالة ( عشان آخذ فطيرة لوزين
) جمب بيتنا وأسلم على راعي البقالة ( هندي ) وأصافح يده وأسولف معه ، ويعرف اسمي وأعرف اسمه وأعامله كصديق ، ونفس الشيء مع صاحب المغسلة ( يماني ) ومع الحلاق ( هندي ).
والحمدلله أنا الشركة في أشتغل فيها أشوف فيها أجانب كثير والله الناس هنا كلهم أخلاق وطيبين ، والسعودين يعاملون الأجانب كأنهم ناس ( ايه ناس ) ومب طبقة أوطى منهم ، بس مدري ليش في الشوارع وأماكن أخرى أشوف معاملة غيرز
نرجع لخوينا الإندونسي ، قعد يقولي ياخي ليش عندك كثير لواطة هنا ؟ قالي كم مرة جا سعودي يحاول يشبكني ، والمشكلة ذا الإندنوسي دب وشين. يقولي هو " ياخي في إندنوسيا الشعب ماخذ صورة مختلفة تماما عن واقعكم ، يشوفون السعودية كأنها أطهر أرض في العالم ويشوفون ناسها أكثر ناس محترمين في العالم وإلى آخره من الكلام الفاضل ، بس يوم جيت هنا لقيت شيء غير تماما" .
عاد أنا انحرجت لأنه صادق ، فرديت عليه وقلتله لا تحكم على دين بناء على أصحابه ولكن احكم على الدين بناء على شريعته. وقعدت أشرحه إنه في كثير ناس مسلمين بالاسم وأشياء زي كذا.
وهذا الإندنوسي شخص حبيب مرة ، ويعرف عن الإسلام شوي ، فقعدت أنا أشرحله أكثر وحاولت أربط المعلومات المتشابهة بين المسيحية والإسلام آملا إنك يعتنق الإسلام ، بس كيف تبيني أخليه يحب الإسلام وحنا المسلمين مخربين أم الوضع ؟
ويقولي مرات لما يكون هو الدوام يقدم طلبات يجيه واحد ويقوله بطريقة غير مهذبة " انت مسيحي ؟ ليش ما تسلم ؟ " ، بدون ترحيب بدون حكمة.
في الختام ، في أكثر من نقطة ذكرتها في الموضوع ،بس بركز على نقطة وحدة :
1) أنا سكنت برا السعودية بلحالي سنة كاملة بدون أهلي بدون أخوياي ، وكم من مرة أشتاق أرجع بس ما أقدر ، وأكيد تعرفون شعور الواحد لما يفقد أهله ووطنه ؟ أو كما يعرف بالإنجليزي HomeSick . بس الحمدلله يوم كنت برا السكان عاملوني باحترام. والحين خل نشوف السعودي ، يجيك عامل هندي مسكين راتبه ما يوصل الألف وتارك وطنه وأهله وزوجته وعياله ويحاول يدبر فلوس عشان يجيب قوت ولباس لأهله ، بعدين تجي انت يا سعودي مسلم وتقعد تهايط عليه ومسويلي فيها أمير شايف نفسك عالعالم وتقعد تقلل أدبك معه ويمكن بعد يوصل الموقف لدرجة الضرب والاستهبال العنيف. ليش ؟ مدري ، هذا بتركها لك انت تحللها ، اذا انت من جد مسلم كان ما سويت هالحركات.
وين روح الإسلام الي تكسر العنصرية وتكسر التكبر وتكسر الهياط ؟ وين الشعور بأنه مافي فرق بين عربي وأجنبي؟
سلام
المشاركة الأصلية كتبت بواسطة ahmed316
