بقيت نص ساعة على نهاية الوقت و انا مسوي حفلة بالورقة،
أشوف الكلمات يرقصن
قلت:
وش عندكم ترقصون جعلكم الماحي!؟
قالوا:
مالنا مكان من الإعراب وش نسوي يعني؟ نرقص احسن.. يااخي أنت ماتدري ان الي ما عنده حرفة ولا صنعة يشتغل رقاصة؟ شغلة سهلة و كل الي تتطلبه هزت خصر و كسر رقبة!
و تراها تدر عليك أموال طائلة مالها نهاية! هذا غير أن الشغلة فيها متعة و مافيها جهد كبير 
هاه وش قلت؟
قلت:
أرقصن ما عندي مساحة امحيكم فيها 
خليت الكلمات ترقص دامها بتكسب ذهب و رحت أضبط علامات الترقيم :
كاتبين لنا بالسؤال أكتب علامات ترقيم بشكل مضبوط! تأكد أنك توضحها
هذي انا شاطر فيها
عددتها كذه:
- اما انك ترقم على قصاصة ورق و ترميها من الشباك و هذي الإستراتيجية القديمة
- او انك تكتب الرقم و تعلقه على سيارتك كأنه إعلان تجاري
- او ان تدق او ترسل الى اي رقم جوال و الي تطلع معاك تشبك معها مادام صوتها او ردها حلو
- او ان تستفيد من تقنية البلوتوث و ترسل ما هب و دب لحد ما تكون علاقة وطيسة < وطيسة هذي تدلك اني اكتب موضوع تعبير بليغ
- اخر السبل ان تستخدم الإنترنت بس تراه مو مضمون لان لا صوت ولا صورة مباشرة.. يمديها تضحك عليك و انت مو داري
يقول جدي "دجاجة في القدر ولا عصفور فوق غصن" < عاد وش يعني فيها ذي مدري بس يقولها كثير وقت الغدى وانا بعدني ما تغديت
خلصنا الترقيم ولا شبكنا مع احد و جاء اخر شيء، سبيلينج Spilling
قلت
عيب قلة حياء اصلا.. وش قدي تقول لي شيك على الإملاء... مابي منيب مشيك على شي.. أسحب كلامك لا يسيل الدم للركب 
رد علي السؤال كأنه عنترة:
عمرك لا شيكت السلطة بيدي محد عاطس فيك يا ابن اللبنانية!
اما حتى السؤال قام يزفني... صرت ملطشه للرايح و الجاي.
..
قلت:
أحترم نفسك ولا تجيب طاري امي على لسانك لا يصير شيء ما يسرك ولا يسر من يعرفك!
قال:
خلاص يا اخا العرب سحبناها.. بس يبقى عمرك لا شيكت < مصّر يرفع ضغطي
المهم حسبتها لقيت اني خسران تنازلت و رحت اشيك عالإملاء
و انا في قمة التركيز حسيت بشي يلسع قلت
بعوضة أكيد.. صفعت كتفي و رجعت لتركيزي
الا هي راجعة مرة ثانية بنت الآية ما ماتت ولا تأدبت.. صفعت من جديد وقل: شوفي انتي الثانية...
خلينا محترمين بعض أزين لك! أن قربتي مرة ثانية لا أخلص عليك وعلي طوايفك...
رجعت احاول اركز ولا البعوضة تضربني على كتفي @.@! < تبي تهاوش
و اخاطب نفسي:
هذي شكلها راحت جابت لي ابوها.. وراها ما تتفاهم بعدني ما سويت شيء! هذا لو معطيها رقمي وش بتسوي؟
ألتفت و انا متخيل نفسي في Men In Black و الحين بتطلع لي حشرة ضخمة كذه و تبلعني و نعيش أكشن ويا ويل سميث
ادور ويل سميث ما لقيته .. لقيت مكانه وجه شاحب و لحية و شوارب و شماغ مايل و عيون مبحلقه و سجارة ذايبة
تعوذت من الشيطان قلت
شكله جاني من جديد بس هالمره على هيئة صعلوك يبي يغيظني
قلت:
غير زيتا جونز ما يمشي عندي !
رد علي:
صدقة صدقة! لله يا محسنين...
رديت:
الله يعطيك، روح للجمعيات الخيرية احسن.. تراهم محذرينا لا نعطي الي يوقفون عند الإشارات و يشحذون.. يقولون كلهم نصابين!
قال:
أنت انهبلت؟ ولا تستخف دمك؟
قلت:
لا هذا ولا ذاك.. بس لو اجلس مع جدي و جورج قرداحي الليلة ابنهبل اكيد! تجي؟
قال:
والله اني مشتهي اصكك على راسك بس محتاجك... عشان كذه ابطلب بأدب: ممكن مساعدة؟
قلت:
أمرك؟ فلوس ماعندي
قال:
وجع خلي فلوسك لك! ابي مساعدة معنوية... متوهق بالإختياري و انت شكلك من زمان مخلصهم.. بس لو تفتح عليهم ثواني الله لا يهينك.. تعين أخوك < متى المعرفة ؟!
قلت:
أبشر.. بس تراني جايب العيد و مو متأكد من إجاباتي
قال:
لا أنت دافور .. 90% بتطلع اجاباتك صحيحة
عاد أنا كبر راسي و عندت نفسي.. قلت
زين دقايق بس مابي المراقب ينتبه و توديني أنت و هو في داهية
قال:
بقت عشر دقايق.. عجل شوف لك ثغرة بسرعة
ثغرة زي حقين الهكر يوم يبون يهكرون على موقع ولا يسرقون ايميل او عضوية...
ايه اعرفها هذي ماره علي من قبل.. أذكر فيه واحد من المراقبين سرق إيميلي بعد.. مراقب و يسرق والله و نعومه!
و ترجع بي الذكريات ليوم اتهاوش هذيك السنة مع الشباب يوم اني اجيب علامة ممتازة و هم ينقصون و يصكونها براسي قال ما عطيتنا اجابات صح تبينا نرسب يا اناني!
ايه يومها تهاوشنها و وروني نجوم الظهر.. شوي و ابكي كأني بزر بس مسكت نفسي قلت لا مايصير رجال و يبكي وش بيقولون علي بنات الناس ! و بعدين ابوي بيقول لي "البنت بس هي الي تبكي"
<أذاني ابوي بهالجملة مع اني ما كنت ابكي قدامه كنت اتخبى و ابكي مادري كيف يصيدني خخخ يااااه اما زمااان.......
و انا سارح في عالم خيالي ، الزميل و الأخو الحبيب حط فاصل إعلاني من حقين الأم بي سي يصرخ:
"يا هووووه!!!" وش صار... كأنك تسبهت؟ ياللا بسرعة مابقى وقت! أنا جالس استنى و انت رايح لي تحلم > <
قلت:
شف.. اما تطلب بأدب ولا شف لك غيريو ثاني شيء لا تقطع احلامي الوردية لا اجيب فيك العيد قبل رمضان
<<<وناسة يوم تصير صاحب السلطة
قال:
بتعطيني بالطيب ولا اشلون؟! 
قلت في نفسي هذا مايبي يعديها على خير و بيني و بينكم خفت منه فقررت أعطيه أسلم لي <
القوي متعقد من هذاك اليوم
فتحت الورقة على الإختياري و صار ينقل و انا فيني خباثة مو معطيه رؤية واضحة .. ياأخي مابي أساعده غصب هي؟! ما حبيته لازم احب عشان اخدم
قال لي و كأني أصغر عياله :
لو تبعد شوي.. تراك مغطي نص الورقة .. خذ يمين شوي خل نعرف نشتغل..
قلت:
مرتاح كذه ما ودي اخذ يمين جدي يقول " كل وحد يقعد على الجنب الي يريحه"
قال:
كيف يعني؟ وضح 
<
قلت:
ابد سلامتك .. يؤ! تدري شيء! فيه سؤال انا مأجله للأخير...نسيت أتأكد منه.. خلاص ما عرفك >< يوم اخلص منه ابرجع لك < احاول اضحك عليه
و رحت اسوي نفسي اقلب الورق و كأني مرتبك و هو طفش مني شكله ولقى ان مامني فايدة و راح يتحرش بغيري ..
شوي والا جورج راجع لي و الضحكة شاقة الوجه
"تبي حذف إجابتين ولا حذف ورقتين أزين؟"
أستغربت الخيارات قلت
وش تفيدني فيه 
هذا بدال ما تجيب لي كاترين جاي تتريق علي؟ طيب جب لي ماري كرووووز هذي بعد حلوة
<<< هو
شكله الشيطان أنخبل تالي عمره قام يخربط و حيله صارت مكشوفه..
جلست أدقق النظر و اذا به المراقب متنكر يبي يصيدني
يقول:
وش رايك أعلم على ورقتك و ورقة خويك يوم انكم تغشون من بعض؟!
قلت:
لا لا لا يرحم امك انت فاهم غلط.. ما غشيت ولا شيء.. هو يقول حر ماني مستحمل، قلت له ايه منجد شف كيف الحبر سال من الحرارة << و أنا متصنع ملامح واحد بريء
ضحك و قال:
على مين تلعبها يا شاطر؟ < مسوي كاشفني
قلت:
بس منجد حر.. منت حاس بالحر أنت؟ غريبة! يمكن عشانك لحم على عظم مايفصل بينهم شيء..... ما يمديك تحس بالحر..
شوف بنفسك.. قبل شوي الكلمات يرقصون عندي بالورقة يقولون مالنا مكان من الإعراب و الحين اشوفهم راكدين! شكلهم ماتوا من الحر!!! شوف بنفسك!!
جلس يطالعني بإستغراب.. بعدين مسح على شعري وهو يتمتم بينه و بين نفسه.. و أظني سمعته يقول:
سكنهم في مساكنهم بس مني متأكد فأنا إحتياطاً قمت رديت عليه:
آمين آمين .. ياالله أن تسكن كلماتي في مساكنهم لأني مو داري وين اوديهم
مشى عني و هو يقرأ آيات حتى أنا قلت في نفسي
هذا يبي يسوي فيها مطوع.. مابقى شيء على رمضان ويبي يطلع لنا فيها.. والله لو تموت ما جبت لك من طبخ أمي.. لا تحاول 
خلص الوقت و ورقتي صاير فيها حفلة عالصامت، و يجي المراقب بو نظارات و يقول:
ارفعوا الأقلام أنتهى الوقت!
و محد يسمع له و كل واحد ينقش بالسرعة القصوى ..داعسين و معدين 200 .. طق طق طقطقطقططق ما تشوف غير غبار أزرق
عصب المراقب وراح يشتكي عند خويه الغوريلا...
الغوريلا وقف بس بعده ما نطق ولا احس جسمي يرجف و اقنع نفسي اني ارجف من البرد
جلس يناظرنا بعيون تخوف كأنه مصارع يبي يدخل الحلبة، ينفخ و يزفر و مكشر علينا و نافخ العضلات
نحن صرنا نقرأ الفاتحة تحسباً لو صار شيء بس لسه مصّرين نكتب حتى آخر لحظة
هو عصب و لقى نفسه مضطر يصرخ علينا و اذا به يفتح فمه على الآخر امداني اشوف السوس يلعب بين سنونه
نحن توقعنا تهب عاصفة مع أول صرخة ولا هاب علينا نسيم بنكهة النعناع
هو صرخ بس كان صوته أرق مما توقعت لدرجة اني حسبته جنس ثالث:
أرموا الأقلام لا ألعن خامس كل واحد فيكم جعلكم أياديكم الكسر!
و أستلم الضحك على اصوله خخخخ و أنا اقول وش فيه ما فتح فمه بكلمة طوال الوقت
يستر على نفسهو انها تستر على نفسها مدري كل شيء جايز
طاحت هيبته ، يكفيك جلسنا نلعب الي يرمي القلم بوسط الدائرة ياخذ 100 نقطة
زعل المراقب و صار يسحب الأوراق بالقوة.. الي ما يعطيه يروح عليه الإختبار و يسقط بدون اي تفاهم
و جاء الضخم ينفخ بس عالسايلنت >> ما عليكم منه هو الدمعة في عينة بس ماسكها .. بيتخبى و يبكي لما نمشي < خخخ عنده خبرة
سلمنا الأوراق غصب.. و أشوف كلماتي يتراكضون كل وحدة تبي تلقى لها مكان تندحش فيه
و أنا صعبان علي فرقاهم ماودي أسلم الورقة بعدني ما شبعت من شوفها..
أنتبهت ولا أنا عايش قصة حب معاها... شوي و أكتب فيها شعر
تعالي الى احضاني و ين رايحه و مخليتني جعل من يشطبك بأكس حمر ما يتوفق..
خلص الإختبار و جاء وقت تصفية الحساب
جاني خويي حق قبل الي كان وراي يقول لي:
ليش انت مو كفو؟ واحد يطلبك بخدمة تقوم تصد عنه؟
قلت في نفسي وشلون تترقع هذي...
"لا ابد.. حاولت اساعدك بس أكتشفت ان إجاباتي غلط و قلت حرام أوهقك.. مابغيتك تخسر علامات بسببي"
و اذا به ينخر و يزفر و كأنه قطار يبي ينفجر
جيت ابرر عبثاً "
ليش مو مصدقني؟؟"
أنا قلت كذه و شفت الدخان يتطاير من أذانه و يطلع من مناخيره... و اذا بسنونه قد بانت!
تذكرت الشعر الي يقول يوم تشوف سنون الأسد لا تحسبهوو ضاحكاً يتبسموو! و اذا بي حاط رجلي و شارد و انا ابرر و احاول احافظ على ما تبقى من كبريائي
"مستعجل عندي شغل! أتفاهم معاك بكرة"
و ما تشوف غير غباري < و لليوم ما جاء بكرة و لا يب يجي @.@
عدت على خير و اليوم رحت أشيك على درجتي و اذا بي ناجح و بعلامة حلوة خخخ حمدت ربي ان كلماتي تركوا الرقص و لقوا لهم مكان مناسب < يقلع so you think you can dance من عرفته و أنا مني بخير حتى كتاباتي قامن يرقصن
و حمدت ربي أن جورج قرداحي ما قدر يخدعنيو أن الشيطان ما قدر يجيب لي ماري كروز ولا كان علومي علوم
و حمدت ربي أن المراقب حسبني مجنون او فيني مس من جن و بعد عني.. و شكله نشر علي إشاعة و منها الدكتور و الغوريلا و بو نظارات خافوا مني و قرروا ينجحوني يبون الفكه مني و من شري
الخلاصة
مواضيع النص كم يوم تزيد تصير آفة على المجتمع و غثة على القلب
جدي يقول حكم واقعية و احيانا محششه شكله يتعاطى
"أفد و أستفد" نصيحة للي مقبلين على إختبار
الوزارة دايما أسئلتهم صعبة
مبنى الجامعة الجديد مستعمل و ينباع بنص السعر مع تعويضات مادية
الي ما يعرف الصقر يشويه < مدري وش تبي بس تكملة عدد
الشات غذاء الروح
و اخيرا، الي ماعرفه ولا يعرفني لا يضيفني لأني ببلكه ، أنا قايل الي يبي يضيفني يعطيني خبر أول
< يقولون مشكلة يوم الواحد ياخذ من حاله مقلب
و السلام على من زار و قرأ و رد و فكر يرد و ما مداه و سرق و فكر يسرق بس أنبه ضميره أو مالقى شيء يسوى
وعلى من مر ولا حتى تعب نفسه و قرأ أي كلمة بالموضوع.. كلكم السلام عليكم < يعني غصب تردون السلام
تحياتي لكم جميعاً فرداً فرداً و شكراً لتضييع وقتكم معاي أنا و موضوعي المش ولابد
جا نا
حكي بلا طعمه =]
)
.. وراى ما تستفيد منه؟
اشوف الإجابات مكتوبة و حواليها ضباب كأنها تقول اتحداك تلقطني هع هع
المشاركة الأصلية كتبت بواسطة haman
>>