"الوان القلب" الجزء الثالث ( الحب و الحقيقه )

[MALER]

بعد شويه رجع رامي ومعاه القهوه
وهو بيمشي اتعنقل برباط جزمتو
كان حيطيح ويطير القهوه كلها عليا
انا صرخت " لااااااااااااا "
بس رامي استعاد توازنو وما طاح
وانا الحمد لله ما جاني شي
قلي " اسف خوفتك "
قلتلو " لا عادي "
قدملنا القهوه ببتسامه
قهوتو مرررره لزيزه زي المره اللي فاتت
انا قلت " رامي ممكن اعرف وصفتك السريه اللي تستخدمها عشان تحضر دي القهوه اللزيزه "
قام قلي " انا ما عندي وصفه , كل مره تزبط معايا بالحظ "
انا " معقوله !! "
قالتلي سالي " لا تستغربي , رامي عندو حظ ماشاء الله . اتذكر في الأختبارات الأخيره راح اختبار رياضيات وهوا يحسبو اختبار كيمياء , جاب 100 من 100 بالحظ , كلها كانت اختيارات وهوا حطها اي شي وجات معاه صح "
انا " لا شكلك يا رامي منجد محظوظ "
قال رامي " اوبس نسيت حيجي الحين كرتون مره احبو في التلفزيون "
قام راح رامي جهة التلفزيون واخد الرموت وشغل التلفزيون
بالغلط حط رقم قناه تانيه مو قناة الكرتون
كانو قاعدين يعلنو عن اسماء الفايزين في سحوبات على سياره
وطلع اسم رامي
احنا خلاص قعدنا مبلمين
ورامي فرح وقعد ينطنط مع دبدوبو اللي جبتلو اياه ويقول " انا فزت .... انا فزت "
سألنا رامي انتا متى شاركت في المسابقه يقول ما اعرف
يعني فاز وهو اصلا مهو داري انو مشارك
سكت رامي شويه بعدين قال " اه اتذكرت , في مره كنت قاعد اللعب في الجوال , دقيت ارقام بس كده من عندي , بعدين قلت خليني اتصل امكن يطلع رقم من جد , ولمن اتصلت طلع دا رقم برنامج مسابقات سألوني سؤال وفي تلاته اختيارات انا جاوبت الخيار التاني بس المذيع سمعني غلط وحسبني اخترت الخيار التالت وطلع صح . ههههه مره ما كان في بالي اني افوز "
لمن قال كده انا خلاص انبلهت
معقوله يكون في انسان في دي الدنيا بالحظ دا
شادي قال " ماشاء الله على حظك يا رامي , اما انا منحوس ما عمري فززت بشي بس مره فزت بي كرتون عصير برتقال والمشكله طلع مدتو مخلصه "
انا فطست من الضحك عليه
قام هوا ابتسم وقال " ضحكتك مره حلوه زيك "
انا انكسفت ووقفت ضحك وخدودي حمرت وقلت " شكرا "
فجئه سالي قعدت تضحك
وبعدين طلت في شادي وقعدت ساكته ( مسكينه تستنا يقولها ضحكتك حلوه )
طل فيها شادي وقلها " ايش في ؟ "
قامت هيا عصبت وقالت " ولا شي " وبعدها خرجت من الغرفه وفوقها سحابه سوده من الغضب
شادي قال " انا ايش قلت عشان زعلت كده ؟ "
قامت ردت ورود " المشكله مو في ايش قلت , المشكله في ايش ما قلت "
شادي قعد شويه بيحاول يفهم كلام ورود بعدين قال " ايش يعني ؟ ما فهمت ؟ "
ورود " ولا حتفهم "
قام رامي رفع يدو كأنو بيشارك في الفصل وقال " انا عرفت ليش عصبت , عشان لمن قالتلك لارا شكرا ...انت ما قلتلها عفوا "
ورود خلاص اتحطمت
كمل رامي " مره تانيه لازم تقول عفوا ولا بعدين انا كمان حزعل منك "
شادي " طيب انشاء الله محا انسى "
ورود طلعت من الغرفه وهيا بتقول " ايش الغباء اللي عايشه فيلو انا "

انا فهمت ليش سالي عصبت من شادي
شكلها تحبو منجد
وشكلها غارت لمن شادي مدح ضحكتي
بس شادي شكلو ما هو داري انو هيا تحبو
مع انو واضح مره
انا ما صرلي إلا كم يوم اعرفهم ولاحظت دا الشي

بس انشاء الله ما تكون سالي زعلانه مني

[minako]

مستنين التكملة
مودتي...^_^

[MALER]

انتهى يومنا كده
كل واحد رجع بيتو
وانا وصلني شادي لبيتي
لمن دخلت البيت حكيت عمو سمير وابله ساره عن كل اللي صار

في الليل قبل ما انام
طلعت على البلكونه وقعدت على الكرسي اتأمل النجوم
كان الجو حلو والسما مليانه نجوم
فجئه وانا قاعده اطل
شفت شهاب اخضر بيمر في السما
لمن شفتو قلت لازم اتمنى امنيه بسرعه
اتمنيت انو كل شي يرجع زي زمان
وترجع السعاده لدا البيت

الفصل السادس

اليوم كان يوم مميز
كان في مهرجان في المدينه
وهادي اول مره يسو
سموه مهرجان الألوان
كل الناس لبسو بلايز ملونه ولونو وجوههم وشعرهم
والشوارع اتملت بالألوان
انا رحت المهرجان مع الفرقه
ورود وسالي كانو لابسين فساتين حمر
وانا طقمت معاهم
اما الأولاد كل واحد شكل
شادي لبس احمر زينا ( قلودي )
ورامي لبس بنكي
اما تامر كان لابس اسود
انا قلتلو " يعني جات على دا اليوم تلبس اسود "
قام قلي " انا البس اللي ابغى , وبعدين انا اصلا ما كنت ابا اجي هنا بس شادي اصر "
شادي ضحك وحط يدو على كتف تامر وقال " دا صديقي , اي شي اقولو يسويه "
قام رامي سوا تعبير كوااي ( كوايي = كيوت ) وقال " وانا يا تامر ما تسوي اللي ابغاه ؟ "
قال تامر " إلا وانتا كمان "
فرح رامي وقالو " طيب اجل يلا نروح نخلي المهرج يرسملنا على وجهنا اسد "
قام تامر عصب و اعطالو بكس على راسو
رامي قال " ايييييي , ليش ضربتني , لو ضربتني مره تاني محا اعطيلك حلاوه "
خلاص تامر وصلت معاه مسك رامي من حلقو وقعد يخنق فيلو ( خدوها من منظور كوميدي مو جدي )

واحنا قاعدين كده
بدأت الفعاليات
كان في ناس بيرمو علينا اوراق صغيره ملونه من سطوح وشبابيك بيوتهم
والمهرجين فلتو بللالين كتيره ملونه في الهوا

بين الناس

والألوان

والبلونات اللي بتطير من الأرض للسما

على الأرض اللي انتلت بالألوان

شفتو

هوا ..... هوا نفسو

انا متأكده

كان بيطل في السما بعينو البريئه

انا قلبي بدأ يدق بسرعه

والأصوات من حوليا بدأت تختفي

صرت اسمع صوت دقات قلبي وبس

دخلت بين الناس بحاول اوصلو

وصلت عندو

رفعت يدي ولمست كتفو من ورا

وقفت ثانيه وقلت " عمار "

التفت عليا

وعينو جات في عيني

عنها نزلت من السما الأوراق الصغيره الملونه

ورجعت كل الأصوات

كانت كميتها كبيره وطاخت فوقنا

غطت بيني وبينو

كلها ثواني اللين ما وصلت الأوراق للأرض

طليت قدامي

عمار اختفى

انا قعدت واقفه في مكاني ما اتحركت
رافعه يدي وعيوني بتدمع
جات ورود عندي وقالت " ايشبك ؟ "
انا دموعي بدأت تنزل " شفتو "
ورود " مين ؟ "
انا " عمار كان هنا قبل ثانيه بس اختفى "
ورود " شكلك بتتخيلي "
انا " لا انا شفتو ..... ولمستو .... وهوا التفتلي "
مسكت يدي بيدي التانيه وقلت " ما ادري ليش ..... بس دي المره حسيت بيلو .... حسيت انو حقيقه "
تحط على ركبي وقعدت ابكي واقول " كان قدامي , اخيرا لقيتو .... والحين اختفى تاني "

ورود نادت على الفريق وقالتلهم " عمار كان هنا قبل شويه , واكيد ما بعد من هنا كتير , كل واحد يروح من طريق ويدور عليه "
شادي قومني من الأرض ومسحلي دموعي بمنديل وقال " لاتخافي , انا حلاقيه .... اوعدك "

سابني شادي وراح يدور عن عمار
وبقيت الفريق راحو كمان
كل واحد فيهم راح من طريق
وانا كمان رحت ادور عليه
عمار هنا
انا متأكده

[sooseef]

صراحة القصة جميييييلة جدا و مرررررة حلوة ولازم تسييير كاتب مشهوووور و نستتى التكملة

[MALER]

شكرا مره سوسيف
وشكرا مره minako على ردودك المشجعه
ولاحظت اختفاء ردود هايلد
هايلد انتي فين ؟
بتقري القصه ؟

[sooseef]

صراحة إنت فنان مبدع كلو و القصة مرررررررة حمااااااس كمل عشان ابا إعرف إيش حا يصير

[MALER]

في ديك اللحظه خطرت في بالي فكره

مادام رامي عندو حظ قوي , أكيد الطريق اللي حيختارو حيكون الطريق الصحيح

قررت اني اروح مع رامي في نفس طريقو

قعدنا انا واياه ندور في كل مكان

دخلنا وسط الزحمه بين الناس

عندها ضعت عن رامي

طليت حوليا ما لقيتو

قلت احسن ابعد شويه عن الزحمه

طلعت بره الزحمه

سمعت صوت جاي من ورايا

طليت ورا,كان في طريق بيتين يودي للشارع التاني

مشيت في دا الطريق

حسيت انو في شي بيراقبني

انا خفت ومشيت بسرعه

وانا بمشي سمعت صوت مخيف

وعندها طاح شي غريب من فوق قدامي

كان اغرب مخلوق شفتو في حياتي

مخلوق ضخم جسمو مغطى بريش اسود

انا لمن شفتو اتصنمت في مكاني من الخوف

الوحش قرب مني اكتر واكتر

بس انا ماكنت قادره اتحرك

وفجئه هجم الوحش عليا

انا صرخت بأعلى صوتي

لمن احتجت ليه .... انقذني

طلع عمار مدري من فين

وضرب الوحش وطيرو بعيد

وبعدين حط يدو على سلسله في رقبتو , عندها جا احد سريع مره ضرب الوحش وخلاه يتلاشى

لمن وقف طلعت وعود

طل عليا عمار

قرب مني ومسك يدي

اعطاني سلسله فيها تعليقه على شكل قلب

قلي بصوت هادي " لارا ... وحشتيني انت وعمو سمير وابله ساره "

حاولت اقولو وانا كمان بس ما قدرت اتكلم

كمل كلامو " كان نفسي اقابلكم من زمان , بس ما قدرت ....... انا اسف على كل المشاكل اللي سببتها ليكم , من اليوم ورايح انا حأكون عندك لمن تحتاجيني .... انا المسؤول عن حمايتك ....يكفي الألام اللي جاتكم بسببي ....اذا حسيت انك في خطر , واذا هاجمك اي واحد زي دي الوحوش , امسكي دي القلاده في يدك وناديني بقلبك وانا حأكون عندك "

انا قلتلو " عمار ليش ما ترجع تعيش معانا ؟ "

نزل عينو في الأرض وقال " ما اقدر , انا اسف "

انا قلتلو " طيب سوار فين , كيف حالو ؟ "

عندها وجه عمار اتغير طل فيا وقال " انا اسف "

عندها ما قدرت احبس دموعي

حتى عمار قعد يبكي ويقول " ما قدرت انقذو ..... انا اسف ....... انا السبب "

قلتلو " طيب قولي انت فين عايش ؟ "

قلي " ما اقدر ....... لازم امشي الحين "

قلي وعود " يلا نروح بسرعه لازم نلحق على فاتن ويارا ولينا "

قالت وعود " يلا "

طل فيا عمار وقال " خلي القلاده دايما معاكي ...... حنتقابل تاني قريب .... انتبي على نفسك وعلى عمو سمير وابه ساره "

عندها اختفت وعود بسرعه البرق وبعدها عمار

وبقيت انا لوحدي ابكي

اللين ما لقاني رامي

وبعدها نادا على الفريق وجو عندي

واخدوني ووصلوني البيت

انا كنت منهاره من كتر البكى

دخلت على عمو وابله ساره ميته من البكى

لمن سألوني ايش في

قلتلهم " قابلت عمار "

سألني عمو " متى قابلتي ؟ وفين ؟ وايش صار ؟ "

انا " اليوم في المهرجان .... قابلتو واتكلمت معاه ... بس بعدين اختفى "

سألتني ابله ساره " وسوار ...... سوار ما كان معاه ؟ "

انا عندها انفجرت من البكى وقلت " سوار مات "

عندها ابله ساره طاحت على الأرض وقعدت تبكي وتقول " لا ... لا سوار عايش ... سوار ما مات "

وعمو سمير قعد واقف وعينو في الأرض

انا رحت عند ابله ساره وحضنتها

وقعدنا انا وهيا نبكي

نبكي على سوار

[هايلد]

اسفه عن جد عالتأخر
بس كان عندي اختبار واليوم خلصتهم ^ـــ^
وطول اختباراتي وانا افكر فالكمبيوتر والنت والتكمله -.-"
المهم ^^ التكمله روعه رووووعه كالعاده
مبدع×مبدع
ننتظر التكمله ^^ بفارغ الصبر

[MALER]

مرررره اسف محا اقدر احط تكمله إلا بعد اسبوع
بدأت اختبارات من دا الأسبوع ولسه باقيلي الأسبوع الجاي
انشاء الله بعد ما اخلص اختبارات ارجع احط تكمله طويله
ادعولي ربي يوفقني

[HamoOoOoOz]

منتظرين التكملة بفارغ الصبر ...
أحلى قصة إلى الآن قريتها وراح تبقى الأفضل ...
^ ^

[7amoOod2007]

السلام عليكم ورحمة الله وبركاته

القصة واااااااااااااااااايد حلوة @_@
ما شاء الله علبك مبدع

ننتظر التكملة بفاااااااارغ الصبر

تحياتي ^^

[MALER]

اسف على التأخير
خلاص خلصت اختبارات ورجعت اكتب
دي التكمله انشاء الله تعجبكم
وانتظرو التكمله بكره

الفصل السابع

بعد يومين

اليومين اللي فاتو كانت ايام حزينه
الأمل بأنو سوار عايش خلاص راح
سوار مات زي ما قال عمار
ابله ساره حالتها مره سيئه
ماتاكل ولا تتكلم
انا حاولت اكلم معاها كم مره بس ما نفع الكلام
الحزن اللي في قلبها اكبر من انو ينمحي بدي السرعه

ورود من اول تبغاني اجي عندهم المقر
بس قلتلها دي اليومين ما اقدر
بس اليوم جات عندي البيت
مدام جات شكلو في شي مهم جدا

قعدنا في الصاله
قالت ورود " عندي معلومات خطيره , ما قدرت استنى جيتك بسرعه عشان اقلك اياها "
انا " ايش هيا ؟ قوليلي بسرعه "
ورود " مو قلتلك اول اني سويت موعد مع سمر اخت انس المحقق في قضية عمار "
انا " ايوا صح قابلتيها ؟ "
ورود " ايوا قابلتها اليوم , محا تصدقي ايش قالتلي "
انا " ايش قالتلك ؟ "
ورود " انا سألتها عن اخوها وزوجتو ولدهم , قامت قالتلي انها لو قالتلي الحقيقه محا اصدقها , انا قلتلها لا حصدق "
انا " ايوا ايش صار بعدين ؟ حمستيني "
ورود " قالت سمر انو هيا السبب في اختفاء لما زوجت انس وكنان ولدها , تقول انو هيا كتبت قصه عنهم وبعد سنوات بدأت دي القصه تصير حقيقه "
انا " وي بسم الله , منجد بتتكلم دي "
ورود " تقول في القصه كنان عندو قوه خارقه وهو قادر على خلق عالم خاص بيلو ويكون تحت تصرفو ومقيد بأحكامو وقوانينو , المهم تقول انو دا كلو صار في الحقيقه وانو كنان الحين في عالمو الخاص "
انا " منجد كلام ما يتصدق , طيب فين لما زوجت انس ؟ "
ورود " تقول سمر انو في قصتها سمر تروح مكان مجهول وتنتحر فيلو "
انا " يعني ماتت ياحرااام , طيب انس ما تعرف عنو اي شي ؟ "
ورود " تقول انها ما شافتو من سنه , كم مره اتصل بيها وقلها انو طيب , وانو بيدور على كنان ولما , بس تقول ما قلها هوا فين ولا متى حيرجع "
انا "والله انس مسكين "
ورود " وانتي ايش صار معاكي , ما عندك اي اخبار جديده عن عمار ؟ "
انا " لا للأسف , بعد داك اليوم ما سمعت عنو شي "
ورود " ايوا صح افتكرت , الوحش اللي هاجمك كيف كان شكلو ؟ "
انا " والله كان شكلو يخوف مررره جسمو كلو مغطى بريش اسود وعينو حمره "
قالت ورود " غريبه اول مره اسمع بشي زي كده , المهم بكره حنروح انا والفريق لبيت سالي اللي على الشاطئ نقضي يوم هناك , احنا كل صيف نروح دا البيت ننام هناك يوم , سالي قالتلي اعزمك على هناك "
انا " قوليلها مره شكرا "
ورود " بكره الظهر تكوني جاهزه واحنا الساعه واحده حنجي نعدي عليكي وناخدك معانا "
انا " بس انا ...... "
ورود " لا لا تقولي شي , لازم نروحي معانا عشان تطلعي من جو الحزن اللي عايشتو "
انا " طيب خلاص انشاء الله اجي معاكم "
ورود " طيب يلا انا امشي , بكره نتقابل "
بعدها راحت ورود وانا رحت عند عمو سمير وقلتلو على العزيمه
قلي " روحي يابنتي انبسطي شويه "
قلتلو " طيب انا حروح بس , كيف اسيب ابله ساره في حالتها دي ؟ "
قلي عمو " سيبها يا بنتي انا معاها محا يصير شي "
انا " طيب "

اليوم اللي بعدو

جهزت اغراضي من بدري
وقعدت استناهم يجو ياخدوني
لمن صارت الساعه وحده جو بباص كبير لونو اصفر واحمر ومكتوب عليه((خاص بفريق النظارات الحمر))
طلعو كلهم سلمو عليا وبعدين ركبنا الباص وانطلقنا
واحنا في الباص انا والبنات قعدنا نتكلم
اما شادي ورامي كانو قاعدين يلعبو زي الصغار في الباص
وتامر قاعد يشتغل على لابتوبو
الرحله كانت ممتعه وقصيره
ولمن وصلنا ونزلنا من الباص
انا انبهرت بجمال البيت
وانسحرت بمنظر البحر الخلاب
كان البيت كبير مره
وفي شاطئ خاص بالبيت
شكلو ابو سالي مره غني ما شاء الله
اول شي قعدنا انا والبنات في الصاله
والأولاد لبسو شورتاتهم وراحو يسبحو في البحر طوالي
جات الخدامه وقدمتلنا العصير
شربنا العصير وقعدنا نتكلم
سالي " كيف يا لارا انشاء الله عجبك البيت "
انا " لا والله مره حلو ما شاء الله "
ورود " ترى البيت دا كل ديكوراتو من اختيار سالي , ابوها اعطاها البيت هدية عيد ميلادها , وخلاها تزبطو على كيفها "
انا ما قدرت اعلق إلا بي " وااااو "

[MALER]

بعد ساعه تقريبا طلعنا على الشاطئ

الأولاد كانو من اول في البحر
رامي قاعد يلعب بالرمل
وتامر قاعد يتشمس وحاط سماعات وبيسمع اغاني
اما شادي مدري فينو
رحت عند رامي وقلتلو " ايش بتسوي ؟ "
طل عليا وابتسم وقال " بعمل بيت بالرمل .... تساعديني ؟ "
انا قعدت جنبو وقلت " يلا انا مستعده للمساعده "
ضحك وقلي " ترى انتي قعدتي فوق البيت "
انا قمت وطليت تحتي
اوبس قعدت فوق بيت الرمل وخربتو يا فشيلتي
" اسفه ما شفتو .... حسبتك لسه ما عملت شي " قلت بكل كسوف
فجئه وجه رامي اتغير وصارت ملامحو مخيفه وقال بصوت مرعب " انتي قصدك يعني اني ما اعرف اسوي بيت بالرمل .... عشان كده قعدت عليه , اكيد حسبتيه مجرد كومة رمل "
انا خفت ورفعت يدي زي اللي بيستسلم وقلت " لا والله ما كان قصدي كده "
فطس رامي من الضحك وقال " امزح معاكي ههههههه , منجد صدقتي اني عصبت هههههه "
انا اخدت نفسي وقلت " والله فجعتني , حسبتك منجد زعلت "
قال " انا ما ازعل منك ابدا " ومدلي حفارت الرمل وقلي " يلا نبدأ في البيت الرملي الجديد "
واحنا بنشتغل سألت رامي " فين شادي ؟ "
قلي " شادي اهو هناك " وشاورلي على نص البحر
انا طليت كويس وشفت شي بيتحرك من بعيد
انا قلت " ماشاء الله كيف وصل ألين هناك ... انا لو قطعت نص المسافه دي اتعب "
رامي " حتى انا ما اقدر اقطع نص الطريق , بس شادي يحب المنافسه والتحدي , تامر اتحداه انو يوصل الين الطوافه البعيده اللي هناك , قام شادي اتحمس وقبل التحدي "
انا " ماشاء الله عليه , انسان متحدي "
قال رامي " تعرفي اصلا ليش تامر اتحداه دا التحدي .... عشان يبغى يخلص منو ويقعد يتشمس برواقه , قام ضحك عليه وخلاه يقطع كل دي المسافه "
انا قلت " والله دا تامر يحب الشر "
قال رامي " ايوه بس قلبي من جوه ابيض "
انا " منجد ؟! "
رامي " انشاء الله مع الأيام حتكتشفي بنفسك دا الشي "

جات ورود ومعاها سالي وشاركونا في بناء البيت
خليناه قلعه كبيره
طلع تحفه فنيه
قعدت انا ورامي وورود وسالي قدامو وخلينا تامر يصورنا

بعدها وصل شادي اخيرا
كان تعبان مرررره
راح طوالي عند تامر وقلو " شفت سويتها , تاني مره لا تتحداني "
تامر طنشو وما رد عليه

كن الوقت خلاص مغرب
والشمس بتغرب واحنا قاعدين على الشاطئ نتفرج عليها ةهيا بتغيب
لون السما البرتقالي والبحر اللي انعكست عليه الوان السما حركو مشاعري
الغروب بلونه الساحر يحرك فينا مشاعر كانت مكبوته داخلنا
مشاعر دافئه , مشاعر حلوه , مشاعر حزينه او مفرحه, مشاعر حب واشتياق, مشاعر تلمس قلبنا من الداخل
تخلينا اقرب من قلبنا.... أقرب من نفسنا.... وأقرب لغيرنا

بعدها دخلنا البيت وكل واحد راح غرفتو وغير ملابسو
وبعدها نزلنا تحت واكلنا مع بعض بيتزا
و قعدنا نلعب مونوبولي انا وورود وسالي ورامي
اما تامر قال مالي نفس يلعب
وشادي من التعب نام على نفسو فوق الكنبه
اللعبه طولت مره
وورود كانت فايزه ومسيطره على اللعبه
رامي استسلم وانا كمان
سالي ما قدرت تكمل كمان
وكده سبنا الفوز لورود
قالت ورود " ما عمري خسرت في المونوبولي , طبعا ذكائي خارق ماشاء الله عليا "
قال رامي " المره الجايا انا حفوز "
ضحكت ورود وقالت " للأسف حظك محا يفيدك معايا "
انا قلت " ايوا صح ليش حظك ما اشتغل في اللعبه يا رامي ؟ "
قال رامي " ما ادري , المونوبولي هو الشي الوحيد الي حظي ما يشتغل فيه "

مر الوقت بسرعه وجا وقت النوم
انا لبست البجامه وطلعت البلكونه اتفرج على البحر
جات سالي وقعدت جنبي
البحر كان هادي
ونور القمر عكس لمعه خياليه على سطح البحر
الجو كان حلو وهادئ
مسكت سالي يدي وقالت " تعرفي .... قد ما حاولت اكرهك ما قدرت "
انا استغربت من كلامها وقلت " تكرهيني ؟! ليش؟! "
ابتسمت وقالت " انتي انسانه طيبه وتدخلي القلب بسرعه , ومحد يقدر يكرهك "
انا انكسفت وقلت " شكرا "
طلت سالي على البحر وقالت " تعرفي ليش ابا اكرهك ؟ ... عشان شادي يحبك اكتر مني "
انا طليت فيها وقلت " شادي يحبني !! "
قالت " ما ادري ... بس انا حاسه من طريقت تعاملو معاكي انو يحبك "
انا ضحكت وقلت " العلاقه بيننا مجرد صداقه ... وانا متأكده انو شادي ما يفكر بيا إلا كصديقه "
سالي " ايش دراكي .... على قد ما عشت مع شادي ما قدرت افهمو للأن "
انا " ليش من متى تعرفي شادي ؟ "
سالي " انا وشادي نعرف بعض من لمن كنا صغار مره , امي كانت مره صحبت امو وكنا دايما يجي بيتنا مع امو وانا اروح بيتهم مع امي "
انا " عارفه اني ملقوفه بس ممكن اسألك سؤال ؟ "
قالت سالي " اتفضلي اسألي "
انا " باين عليكي انك تحبي شادي مره .... صح ؟ "

قالت سالي " انا وشادي كبرنا سوا ..... كل ما كبرنا حبي ليه زاد ... وكل ما كبرنا بدأ هوا يبعد عني اكتر , في يوم من الأيام جاني شادي وقلي انو يبغاني اشترك معاهم في فريق التحري ..... عندها انا قلت في نفسي هيا دي الفرصه ولازم ما افوتها .... هيا دي الفرصه اللي حتخليني اقعد مع شادي اكتر .... واقرب ليه اكتر .....ممكن يوم يكتشف اني احبو ... وممكن يوم يقلي كلمت احبك ...... بس شكلو دا اليوم عمرو محا يجي "

انا حطيت يدي على كتفها وقلت " ليش يا سالي لا تقولي كده , ممكن هوا يحبك كمان بس مو عارف يعبر ... لو كنت مكانك كنت اعترفتلو بحبي وبعدين يصير اللي يصير ... المهم يعرف حقيقة مشاعري ... المهم يعرف انو في احد في دي الحياه يهتم بي ودايما يفكر فيه ....... لأنو الندم على شي سويتو اهون بكتير من الندم على شي ما سويتو "

قالت سالي " انتي ما عمرك حبيتي "
انا قلت " انا هههه لا للأسف .... في مره انحبيت بس ما حبيت , كان في ولد في امريكا مره يحبني بس انا كنت دايما طنشو , وفي يوم حفلت المدرسه دعاني اني اروح معاه , بس انا اعتذرت وما رحت معاه ... السنه اللي بعدها انا رحت مدرسه غير مدرستو , وقصت حبو انتهت "

قالت سالي " طيب وعمار ؟ "
انا انكسفت مره وقلت " ايش فيلو عمار ... عمار صديق عزيز عليا فقط "
ضحكت سالي وقالت " ايوا صح عشان كده وجهك صار طماطم لمن جبتلك سيرتو "
هيا قعدت تضحك وانا انكسفت مررره

بعدين جاتني ورود وقالت " قومو نامو كلام الحب محا ينفعكم "
انا وسالي قلنالها " روحي نامي انتي "
قالتلنا " مو جايها نوم
في دي اللحظه سمعنا صوت غريب جاي من تحت
الصوت كأنو صوت اشياء بتتكسر
انا والبنات خفنا مررره
كل وحده طلت في التانيه وقالت " شكلو حرامي دخل البيت "
رحنا بسرعه صحينا الأولاد وقلنالهم في حرامي في البيت
قلنا شادي " اقعدو في دي الغرفه وسكرو الباب ولا تفتحو لأحد , انا و تامر ورامي حننزل نشزف ايش في "
خرج الأولاد من الغرفه ونحن قفلنا الباب
بعد ربع ساعه تقريبا رجعو الأولاد
قالو ما في شي
بس في صحون طاحت في المطبخ
بس يقولو فتشو كل البيت ما لقو احد

انا والبنات برضو قلبنا ما اطمئن
اتجمعنا انا وسالي وورود في غرفه وحده
سالي وورود حطو راسهم ونامو
وانا طلعت من الغرفه ورحت الحمام
طلعت من الحمام ومشيت للغرفه
وانا في الطريق حسيت انو في شي بيتحرك من بره الشباك
انا خفت وجريت بسرعه ناحيت الغرفه
لكن الشباك انكسر ودخل منو رجال غريب لابس اسود وحاطط على وجهو قناع اسود
انا انفجعت وصرخت بأعلى صوتي
قام مسكني الرجال من يديني وسحبني معاه
سحبني للشباك ونط من هناك
واخدني معاه للشاطئ
انا قازمتو ضربتو ورفزتو الين ما قلت بس
قام طلع مسدس من جيبو وحطو عل راسي وقال " لا تتحركي ولا حركه .. فاهمه "
انا خفت وقعدت ابكي واصرخ
صرخ عليا وقال " اسكتي ولا كلمه "
جا شادي يجيري يبغا يساعدني
كان ماسك عصايا في يدو وجاي معصب وقال " سيبها بسرعه لا اقتلك "
ضحك الرجال وقال " هه تقتولني " ووجه المسمدس نحو شادي وكمل " حاول ما تموت اول "
انا مسكت يد الرجال وحاولت اخد المسدس
بس هوا ضربني وطيحني على الأرض
عندها ما جا في بالي إلا شي واحد
عمار
السلسله اللي اعطاني هيا في حلقي
الرجال خلاص كان حيطلق بالمسدس على شادي
لكن
سالي جات بسرعه ووقفت قدام شادي عشان تحميه
الرجال خلاص حط اصباعو على زناد المسدس
لا سالي كده حتموت
عمار انتا فين
عمار ساعدني
صرخت بأعلى صوت "عمااااااااااااااااااااااااااااار "

[sooseef]

واااااااااااااااااااااو صراحة أحلى تكملة بس مين هوا دا الرجال ؟؟؟ وحييجي عمار ولا لأ ؟؟؟


صراحة قصة روعة

[MALER]

لو لاحظتو الرجال اللي لابس قناع اسود طلع في القصه قبل كده
طلع في الجزء التاني في عالم كنان لو تتذكرو
التكمله بكره انشاء الله , لو لقيت وقت لأنو عندي اختبار