قلت في نفسي ( ايش دا الأسم الغريب )
العجوز قلي " عارف انو الأسم غريب شويه , بس هيا اسمها كده عشانها قريه تحمل الكثير من الأسرار , احنا طول عمرنا محافظين على سرية دي القريه , واي واحد يعرف عنها اي شي نمحي ذاكرتو "
انا مره استغربت من كلامو
كمل كلامو وقال " يا لارا انا حكشفلك اسرار القريه دي كلها "
كل اللي في الغرفه اتغيرت ملامحهم , كأنهم انصدمو
كمل العجوز كلامو " دي القريه هي المكان اللي يعيش فيلو الناس المميزين , اللي عندهم اشياء ما عند البشر العاديين واللي هربو قبل مئات السنين من الناس العاديين اللي ما كانو يخافو منهم ويكرهوهم , الناس اللي عايشين هنا هما العائلات اللي فيهم هادي الصفات الخاصه , وعيلتي انا هي العيله الحاكمه في دي القريه , عمار واحد مننا ... واحد من عيلتنا الحاكمه , في دي القريه في قوانين محدده . القانون الأول في دي القريه ...... انك لو كنت فرد منها لازم ما تسيبها ابدا . القانون التاني .... ممنوع اي شي عن دي القريه يطلع بره دي القريه . وفي قوانين كتيره تانيه بس مو لازم تعرفيها "
انا قلت في نفسي ( ايش دي القريه العجيبه , انا ايش ورطني فيها )
كمل العجوز كلامو " لارا تعرفي ليش انا سمحتلك تدخلي القريه وتعرفي كل شي عنها "
انا " لا ليش ؟ "
قال " للأسف يالارا انتي تلعبي دور كبير في شي كبير بيصير , انتي مستهدفه من قبل واحد شرير , دا الشرير يبغاكي عشان يضغط على عمار "
انا خفت وما عرفت ايش اقول
كمل " اكيد هاجمك اكتر من مره , بس عمار والباقين ساعدوكي , بس مو كل مره حتسلم الجره ..... لو الشير دا اتحصل عليكي , العالم كلو حيكون في خطر ...... انا ابغاكي تسمعيني كويس "
انا بلعت ريقي وقلت " طيب انا سامعه "
قال " عشان نمنع اي شي من انو يحصل انا ابغاكي تعيشي في دي القريه ألين ما نخلص من دي المشكله "
انا انفجعت وقلت " لا ما اقدر انا " قطع كلامي وقال " قلتلك العالم في خطر , الموضوع ما فيلو نقاش . لا تخليني احبسك هنا بالقوه "
عمار " لكن سيدي , ما يصير تسوي كده "
عصب العجوز وقال " مين انتى عشين تقولي ايش اسوي وايش ما اسوي , انا قلت حتقعد هنا يعني حتقعد هنا "
عمار " اللين متى تبغاها تقعد هنا , انتا عارف انو مو بسهوله حنلاقي كنان مدام هوا في عالمو الخاص مو في عالمنا "
لمن قال عمار كدا انا افتكرت شي
اتذكرت كلام ورود معايا
معقوله يكون كنان دا هوا نفسو الولد الي حكتني عنو ورود
العجوز قال " ما في حل تاني , يا حراس خدوها لغرفة الضيوف "
انا " لا قلتلك ما اقدر اقعد هنا ..... عمي وزوجتو حيقلقو عليا "
العجوز " وانا ايش دخني بعمك وزوجتو "
الحراس جو ومسكوني من يدي
عمار قال " سيدي ارجوك "
بس السيد قال " خدوها على غرفة الضيوف واقفلو الباب بالمفتاح "
انا صرخت " سيبوني , بعدو عني "
عمار طل فيا وقال " لارا انا اسف "
انا مني مصدقه اللي بيصير
حاولت اقاوم الحراس بس ما قدرت
اخدوني على غرفت الضيوف ورموني فيها وقفلو الباب بالمفتاح
انا قعدت جوا ابكي واصرخ " افتحو الباب .... افتحو البااااااااااااااااااااب "
قعدت ساعات في الغرفه قدام الباب ما اتحركت
مني عارفه ايش اسوي
يا ترى ايش صار لعمو وابله ساره الحين
سمعت صوت احد يدق عليا الباب
طلع عمار من ورا الباب
قلي " لارا سامعتيني "
انا قلت " عمار ... ايوا سامعتك "
عمار " انا اسف , ما كان لازم اجيبك هنا , كل الغلط عليا "
انا " مو وقت الأعتذار الحين , طلعني من هنا بسرعه "
عمار " ما اقدر , المفاتيح مو معايا "
انا " يوووووه "
عمار " اسف "
انا " طيب ممكن تروح تكلم عمو وابله ساره وتقولهم اني عندكم "
عمار " انا رحت البيت عندكم وسبت رساله في غرفتك كتبت فيها انك انتي معايا , وكتبتلهم ما يخافو عليكي "
انا " الحمد لله ريحتني "
عمار " لارا كرهتيني بعد اللي صار صح "
انا " لا ما كرهتك ولا شي , بس ايش قريتك وعيلتك العجيبه دي "
عمار " تصدقي انا اللين الحين احسهم غرباء عني , مع اني عشت عندهم اكتر من عنكم في البيت , بس في بيتكم حسيت اني من جد فرد من العيله "
انا " طيب نفسي اعرف ايش اللي صار , مدام دولي عيلتك ليش ما ربوك "
عمار " قصتي طويله "
انا " طيب كويس حكيلي عشان نضيع وقت "
عمر " طيب ........ انا اتولدت في هادي القريه في يوم ممطر . اتولدت وفي يدي علامه ..... علامه تدل على اني واحد من السبعه "
انا " سبعه !! ايت سبعه ؟! "
عمار " في عيلتنا الحاكمه الكبيره كل كم سنه يتولد 7 اطفال مميزين . دولا السبعه يتمتعو بصفات قويه وكلهم عندهم علامه في يدهم تدل عليهم , السبعه دول يتحملو مسؤوليه كبيره , وعشان كده لازم يتربو على اسس معينه وقوانين صارمه عشان يكونو قد المسؤوليه "
وقف عمار كلامو ودق الباب وقال " لارا انتي لسه صاحيه "
انا " لايا شيخ طبعا , قصتك حماسيه , كمل كمل "
عمار " طيب .......انا وفاتن ويارا ووعود ولينا ونور و رافي , نحن السبعه المميزين "
انا " رافي ! مين رافي ؟!"
عمار " رافي الولد اللي لابس ابيض اللي كان جنب الرئيس "
انا " اها "
عمار " اها اها اها يا حبيبي اها , ههههههههه عليكي تصريفه "
انا " لو ما كان في باب يفص بيني وبينك , لكنت ضربتك ضرب "
عمار " الحمد لله انو في الباب ...... المهم اكملك .... والدتي لمن عرفت اني واحد من السبعه خافت عليا , كانت خايفه اني اعيش حياه صعبه ...ولمن صار عمري تلاته سنين امي قررت .... قررت انها تخرجني خارج القريه , كانت عارفه انو عملها دا حيسبب قتلها لأنها خانت قوانين القريه ... بس اهم شي عندها كان انو ولدها يعيش حياه سعيده "
انا " واه مسكينه امك , طيب كمل ايش صار بعدين "
عمار " امي هربتني من القريه وراحت للمدينه , ولمن وصلت هناك اختارت احد البيت ودقت الباب , فتحلها واحد رجال ... عملت معاه صفقه , اعطتو فلوس عشان يخليني عندو ويربيني , ووعدتو انو لمن يصير عمري 16 سنه حتجي تاخدني وتعطي مبلغ كبير جدا , ودا اليوم بعد 13 سنه من دا اليوم بالزبط "
انا " قصتك فلم هندي "
عمار " اهل القريه لقو امي بعد ساعه واخدوها القريه , حاولو بكل انواع التعذيب انهم يخلوها تعترف فين مكاني بس ما قدرو ياخدو منها اي شي ..... جسم امي ما قدر يستحمل العذاب ... وماتت "
انا " مسكينه امك "
عمار " هيا كانت عارفه انو دا اللي حيصير ليها بس برضو خانت القريه "
انا " يعني يا عمار انت مو زعلان على امك "
عمار " لو امي ما عملت اللي عملتو ما كنت حعيش لحظات حلوه في حياتي , مع انو حياتي مع اهلي اللي ربوني كانت جحيم , بس يكفيني الأيام اللي عشتها مع سوار وابتسامتو , وعمو سمير وطيبتو , وابله ساره وحنيتها , وانت كمان "
انا حزنت على عمار وما عرفت ايش اقول
عمار " المهم نكمل القصه .... لمن صار عمري 16 سنه , ابويا اللي رباني جمع كل العيله عشان يقلهم على خبر المبلغ الكبير اللي حياخدو من امي , وفي نفس اليوم الشر الكبير بدأ وخلا قدراتي الخاصه تصحى , وصارت الحادثه المعروفه "
انا " ايش هيا قدراتك الخاصه دي ؟ "
عمار " انا يسموني الظلام , بأمكاني قتل اي احد في الظلام ...... في البدايه ما كنت اقدر اتحكم في دي الطاقه , بس الحين صرت احسن "
انا " طيب مين هوا كنان ؟ "
عمار " كنان هوا الشر اللي بنحاربو , كنان يحمل روح شريره تظهر كل 100 سنه وتحاول انها تبني عالمها الخاص , بس عيلتي كانت دايما مسؤوله عن تدمير هادي الروح الشريره ....... الروح الشريره كانت في شابه مجنونه اسمها غروب , غروب كانت تقتل الناس تاكل لحمهم عشان تقوي روجها الشريره .... غروب انقتلت على يد المحقق انس .. غروب ماتت , بس الروحه الشريه انتقلت للقاتل ... انتقلت لأنس .... وانس نقل الروح لأبنو .... كنان ..... كنان بدأ ينشئ عالم خاص بي .....وبيحاول يدمجو مع عالمنا الحقيقي عشان يصيطر عليه .... ما في احد يقدر يوقف كنان إلا احنا .... احنا السبعه "