نسبتي ضعيفة + ادبي , ماذا افعل؟ ( للكويتيين )

[Evil Saiyan]

السلام عليكم ورحمة الله وبركاته

ياجماعة انا بالثنوية وآخر سنة , نظام المقررات

ونسبتي 1.89 أي مايُعادل 57% وادبي ( ملاحظة : انا الحمد لله استيعابي سريع و عندي خبرة كبيرة بالانجليزي ولو ماصار اللي صارلي جان جبت نسبة اعلى بواجد )
بس مااتوقع ينفع لأني بآخر سنة والمعدل صعب يرتفع

شنو افضل تخصص في هذه الحالة؟ و شنو اسوي بالضبط

[eob717]

يمدحون مركز تعليم الكبار و محو الأمية

[Gentleman]

وعليكم السلام ورحمة الله وبركاته ..

أهم شيء أنك منتبه للمشكلة وما سكت عنها حتى تتفاقم .. علما انك المفروض تتصرف من اول ما لاحظت أن المعدل قد نزل .. لكن صار الي صار .. ولازم ما تكرر العملية ولا تعيدها بأي موقف ثاني في حياتك ..

عموما عندي لك خيارين ::

1- إما بالمعاهد .. مثل المعهد التجاري .. تتخرج ان شاء الله وتتوظف وتكمل الدراسة بالخارج .. في مصر مثلا .. وأقصد نظام الإنتساب وهو ان تذهب في كل سنه للإمتحانات النهائية فقط .. اسبوعين ربما او ثلاث وترجع الى بلدك .. وتأخذ البكالوريوس ..

2- وإما بالجامعات الخاصة خصوصا انك جيد في اللغة الانجليزية .. لكن بمعدلك مستحيل تنقبل بجامعة الكويت .. صحيح ان الجامعات الخاصة صعبة لكن على الأقل فيها شهادة البكالوريوس المطلوبة جدا وأنصحك بعدم الإستغناء عنها بشهادة الدبلوم ..

والله يوفقك ان شاء الله ..

وشكرا ..

[Evil Saiyan]

2- وإما بالجامعات الخاصة خصوصا انك جيد في اللغة الانجليزية .. لكن بمعدلك مستحيل تنقبل بجامعة الكويت .. صحيح ان الجامعات الخاصة صعبة لكن على الأقل فيها شهادة البكالوريوس المطلوبة جدا وأنصحك بعدم الإستغناء عنها بشهادة الدبلوم ..

ماعندك علم جم تدفع بالكورس حق الجامعات الخاصة؟

ملاحظة: المشكلة مو مشكلتي... مشكلة صاحبي , حطيت الموضوع علشان القى حل له

[Gentleman]

شخصيا ما عندي فكرة بشكل دقيق .. لكن اخوي كان بجامعة الخليج الي بحولي .. وبصراحة كان يدفه المئات في الكورس الواحد .. يعني اذا ما كنت مستعد مالياً .. أنصحك بعدم الدخول ..

وشكرا ..

[Aero]

وعليكم السلاااام ورحمه ^^
والله انا اخوي مثل كان بعد يدرس في جامعه الخليج وشاف دراسه عندهم صعبببببه وكله انجليزي "ولو كنت تعرف انجليزي مضبوط ادخل هالجامعه + ميزانيه"

وانصحك بأداراة أعمال ..

[Evil Saiyan]

يعطيكم الف عافية اخواني

رفيجي قرر يدخل معهد المحاسبة

وسمعت انه لما تتخرج من هالكلية تصير مساعد محاسب , ممكن بعض الاسئلة ؟
جم معاش مساعد المحاسب؟ وجم سنة يدرس برا علشان لما يرجع يصير محاسب؟ وجم معاش المحاسب؟ ووين تنصحونه يدرس ؟ بمصر مثلا؟ او البحرين؟
وهل تكميل الدراسة علشان يصير محاسب سهلة ولا صعبة ؟.

[Gentleman]

أسئلة صعبة والله .. وأنصحك تسأل المحاسبين نفسهم اذا قدرت تحصل ..

لكن ما دام عنده نيه بالمعهد .. أنصحه انه يشد حيله جدا فيه .. لانه جامعة الكويت تقبل خريجي المعاهد ذو المعدل الي يكون فوق الـ 3 نقاط او 3 ونص مو متأكد ايهي منهم ..

عموما لا يستعجل في الحكم على طريقه .. فليسأل ويبحث عن ما يجده مناسب في كلا الطرفين ..

وبالتوفيق ان شاء الله ..

وشكرا ..

[Evil Saiyan]

السلام عليكم

eob717
ِِAero

شكرا لكم

وخصوصا الاخ جنتل مان , يعطيك العافية وماقصرت وجزاك الله خير وإن شاء الله توصل النصايح

هدف طرحي للموضوع هو تجميع معلومات فقط لاغير

.

[REACH]

عنده التطبيقي

خله يشوف شنو اكو دورات يمكن تعجبه ، المهم لايضيق خلقه ولا يحاتي واذا كان عنده فلوووس خله يروح يدرس بره عندك اوكرانيا تكاليف الدراسه رخيصه وعندهم جميع التخصصات

والله يوفقك ويوفقه ويوفقنا جميعا