أرجو المساعدة والإفادة

[hungup]

السلام عليكم ..
أولا أحب أوجه شكر كبير لجميع القائمين على هذا المنتدى و مشرفين على هذا القسم الجميل ..

نبدأ ..

أنا حاليا وزني 65 كيلو و طولي 171 ..

كان وزني بالسابق 88 كيلو وهذا الكلام من 3 سنوات .. و خلال سنه ونص قدرت اني انزل وزني لــ 60..
طبعا كنت اروح النادي بشكل يومي ( مشي و ركض و ايروبكس و تمارين معده و دراجة.
من شهرين تقريبا قمت اشيل اوزان خفيفه عشان اشد جسمي اكثر .. وصار وزني 63 و تميت على نفس التمارين واستخدم كل اجهزة الحديد (شامل). جسمي مشدود حاليا لكن عندي شوية Fat في منطقة الارداف

الحين صارلي اسبوعين ماشي على هذا البرنامج و لقيته في أحد المواضيع في المنتدى و كان حاطه الاخ العزيز AI_BARCA .. و هذا هو البرنامج :

http://www.muscleandstrength.com/workouts/dougs-4-day-split-workout.html

انا مابي جسمي يصير ضخم .. بس ابيه يكون مرتب و الفورمة تكون احلى و أعرض..
جسمي مو قاعد يستجيب بصوره واضحه ..يعني التغيير طفيـــــف جدا و وزني صار 65 ..

شريت ( Whey Protein isolate و أمينو أسيد و جلوتمين ) بس ليلحين ما استعملتهم ..
لأنه اللي مكتوب عليهم شي .. و المحل اللي شريته منه قاللي اخذ البروتين قبل التمرين بساعتين و بعد التمرين مباشره و اخلط معاه الجلوتمين...
و الامينو اسيد 3 حبات قبل التمرين و 3 بعده ..
و قبل النوم اخذ الجلوتمين بعد ..

شرايكم ؟؟ حبيت اعرف اذا هالشي اوكي .. ؟؟ ومافي ضرر من اخذهم كلهم مع بعض ؟؟


بالنسبه لأكلي انا اتفطر كويس و اتعشى كويس بس الغداء ما اكل كثير ..


شكرا لكم ..

تحياتي ..

[alzawee]

وعليكم السلام اخي ما فهمت اخي من كلامك انت تقول انك ما تبي جسم ضخم مع ذلك تريد تستعمل واي بروتين وامينو اسيد وجلوتامين عموما اخي الاستجابة مو شرط تكون سريعة خصوصا انت كنت عامل تخسيس وماشاء الله اكيد باصرارك استطعت تنزل كل هذا الوزن وهذا كثير من الناس ما يستطيع ان يعمله ووزن 65 بالنسبة للطول يعد جيد بس محتاج دفعة للسبعين ويبقى وزن مثالي تحافظ عليه اهم شي نوعية التمارين الي تلعبهه وكذلك نوعيه التغذية حافظ على نظام غذائي جيد ومناسب الك وادء تمارين تكون مضبوطة مية بالمية وان شاء الله راح تحس بالتغيير اما بالنسبة الخلطة الي معطاة الك فأعلم ان كل شخص تكون ليه جرعة معينه يعني الشخص يحتاج 0.5 جرام بروتين لكل كيلو يعني بما ان وزنك 65 فأنت محتاج يوميا حوالي 30 لى 35 جرام بروتين ممكن تحصلهة من التغذية الجيدة ولا حظ اخي انك اذا اخذت اكثر من الكمية الي انت تحتاجهة فلا يوجد فيها استفادة منها

[AI_BARCA]

اولاً لازم تحدد هدفك هل تبي تزيد شوي في وزنك معناها انك لازم تزيد في اكلك وانك لازم تزيد 1-2 باوند في الاسبوع او عشر ايام

ثانياً لازم تضع لك هدف مثلاً بعد ثلاث او اربع شهور ابي يكون جسمي كذا بس يكون هدف معقول مش تقول بعد 4 شهور ابي اصير مثل فلان وهذا الشيء مستحيل !!

لذلك ابي اكون وزني كذا وجسمي حلو بعد ثلاث ولا اربع شهور وعندما تضع هدفك خلاص بعد ما تبدأ وتنتظم شهر شوف النتايج لانه ما بتشوف نتايج في يوم وليلة وهذا شيء طبيعي

اغلب الناس تضع اهدافها سواء تضخيم او تخسيس تضع 4-6 شهور لكي ترى النتيجة النهائية

الموضوع الاخر ان تتدرب كل يوم هذا خطأ يجب ان تضبط لك برنامج وان كان البرنامج اللي اخذته من احد مواضيعي فممتاز جداً

بما يخص البروتين والجلوتامين والامينو اسيد

ياريت تضع لي اسم الامينو اسيد كاملاً علشان اشوفلك طريقة استخدامه لانه هناك انواع كثيرة من الامينو اسيد

البروتين تستطيع استخدامه في اي وقت في اليوم ولكن الافضل والاحسن وافضل وقتين لاستخدام البروتين هو بعد التمرين مباشرة وقبل النوم مباشرة ويكون مع ماء وليس حليب علشان الجسم يمتصه اسرع مع الماء

ولكن في حال اخذك للجلوتامين فالافضل اخذه مرة واحدة في اليوم بعد التمرين مباشرة وبعدها بنصف ساعة اخذ الوي بروتين

ولكن ايضاً ضعلي الجلوتامين لانه هناك انواع مختلفة وبعض الانواع تكون كبسولات او شيء فلذلك برضوا ضع لي النوع ولو كان بودرة الافضل انه بعد التمرين مباشرة لانه يساعد على سرعة اعادة بناء العضلة فتاخذه بعد التمرين مباشرة وبعدها بنصف ساعة تاخذ الوي بروتين

تحياتي لك

[hungup]

يعطيكم العافيه على الرد أخواني .AI_BARCA و alzawee .
شكرا جزيلا لكم .. ما قصرتوا ..

أي الله يسلمكم أنا ابي جسمي يصير أعرض و العضلات تكون بارزه و أكبر لكن بصوره حلوه ..
يعني مثلا مثل أجسام الاعب البرتغالي كريستيانو رونالدو أو الممثل براد بيت ..
أتمنى هالشي طبعا ههههه ..

واذا على الــ 4-6 شهور ..
ان شالله مو مشكله لأن مثل ما حضرتك قلت الشي يبيله صبر و ما يجي الشي بيوم و ليله .. صحيح ..

نعم انا ماشي على البرنامج اللي كان في أحد مواضيعك أخوي AI_BARCA
و ماشي عليه بحذافيره .. بس ما اطول بالــ GYM.. يعني ساعه بالكثير اكون خالص .. عادي ؟

بالنسبه للأكل انا ذكرت ان اكلي كويس للنظام اللي كنت ماشي عليه سابقا للحفاظ على وزني
..بس شنو المفروض ازيده اكثر شي في الوقت الحالي ؟؟
الكربوهيدرات ولا البروتينات ؟؟
بالنسبه للعصاير عادي ؟ ولا اخفف منها ؟
و شنو الافضل اني اروح النادي و انا ماكل كويس ولا على معده فارغه ؟

ما عليه استحموا اسئلتي

الله يسلمك البروتين هو :

ISP WHEY
pure whey protein isolate from QNT
و مكتوب 30جرام لليوم , do not exceed

يعني المفروض مره وحده صح ؟؟

والأمينو اسيد هو :
WHEY AMINO
amino acid complex from QNT

مكتوب عليه 6 حبت باليوم مع الوجبات ..و مو أكثر ..

و المدرب ( مع احترامي له احس انه مايفهم شي ) والبائع اللي بالمحل قاللي قبل التمرين اخذ 3 و بعده 3 ..!
يعني مو حسب ماهو مكتوب عالعلبه ؟؟يصير ؟!


الجلوتمين عباره عن بودر ..

utra pure
GLUTAMINE
Pharmaceutical Grade L-Glutamine from VPX
و مكتوب عليه : اخلط ملعقة شاي من الجلوتمين مع اي مشروب ,, مرتين او ثلاث في اليوم حتى في ايام الراحه ..

و البائع يقول بعد التمرين و نص ساعه قبل النوم ..

و حضرتك تقول بس بعد التمرين ..

آنا احترت صراحه ..


الف الف شكر لكم حبايبي ..
عساكي عالقوه ..

و سامحوني على الإطاااله ..

أدري أزعجتكم



تحياتي العطره لكم ..

[AI_BARCA]

بخصوص الجلوتامين مثل ما قلتلك في انواع وبعض الانواع تختلف

ولكن اذا كنت تقصد هالنوع



اولاً حسب ما اعرفه لانه بعض المنتجات تحتوي على الجلوتامين مثل الوي بروتين وكذا لذلك يفضل ان لا يأخذ الشخص اكثر من 10 غرام جلوتامين في اليوم

وهذا الحصة له 4.5 ملعقة طعام واحدة

ومكتوب عليه تستخدمه بعد التمرين مباشرة مرة واحدة .. ولكن لافضل نتائج تستطيع استخدامه مرتين إلى ثلاث في اليوم قبل التمرين بـ 30 دقيقة وبعد التمرين مباشرة بـ 20 دقيقة

لذلك انت تقدر تقسم البلد نصين مثل مانقول وما تستخدمه لا مرة ولا ثلاث فتستخدمه مرة قبل التمرين بـ 30 دقيقة ومرة بعد التمرين بـ 20 دقيقة وانتهى الموضوع

يعني انا استخدم هالنوع الحصة ملعقة طعام و 5 غرام جلوتامين



Mix one teapsoon of Glutamine Powder with 8 oz. water or your favorite beverage or use as directed by a physician or licensed nutritionist. Use 1-2 servings daily for best results.

شوف مرة او مرتين يعني لو استخدمته انا مرتين بيعطيني 10 غرام وهاي النسبة المفروضة او الطبيعية اللي المفروض الشخص ما يتعدى الـ 10 غرام جلوتامين في اليوم

بالنسبة للامينو هناك انوع عديدة وبصراحة ما اعرف النوع اللي تقصده ياريت لو عندك صورة له او اسمه الصحيح

وكذلك البروتين ياريت لو صورة له بس هم يقصدون يمكن للحصة الوحدة لاتتجاوز الـ 1 سكوب ما اعتقد لليوم فياريت لو تجيب صورته او اسم الشركة والبروتين عدل علشان اقدر اطلع معلوماته

ومعليش انا بادي اجابتي من تحت لفوق ^_^

و ماشي عليه بحذافيره .. بس ما اطول بالــ GYM.. يعني ساعه بالكثير اكون خالص .. عادي ؟

اصلاً هاي الصح المفروض تمرينك مايزيد عن الساعة في الجيم

بالنسبه للأكل انا ذكرت ان اكلي كويس للنظام اللي كنت ماشي عليه سابقا للحفاظ على وزني

..بس شنو المفروض ازيده اكثر شي في الوقت الحالي ؟؟
الكربوهيدرات ولا البروتينات ؟؟
بالنسبه للعصاير عادي ؟ ولا اخفف منها ؟
و شنو الافضل اني اروح النادي و انا ماكل كويس ولا على معده فارغه ؟

بخصوص نظامك انا ما ادري شنو هو بس سبق ووضعت لك الاكل والنظام

وتزيد الاكل هي دائماً لازم تكون على السعرات يعني تزيد السعرات وتكون مقسمة في جميع الاحوال

50 كربوهيدرات 30 بروتين 20 دهون والياف

العصاير اوكي بس قلل منها قدر الامكان الا لو كنت بتعملها بالبيت من الفاكهة الطبيعية وبدون اضافات سكريات وهالامور لانه الموجودة في البرادات فيها نسبة سكر او كأنها ماء وسكر تقدر تقول

بخصوص انك تروح النادي اكيد لازم يكون في وجبة متكاملة من جميع العناصر وخاصة يكون الكربوهيدرات عالي فيها من اجل الطاقة في التمرين بس طبعاً تكون قبل التمرين بساعتين او ساعة ونصف

مو تاكل وتروح مباشرة حتى الوي بروتين لو كنت تاخذه قبل التمرين مثلاً ما تاخذه وتذهب للتمرين مو اقل من ساعة بعد ماتاخذه

وشوف لو كنت مثلاً ما تقدر توفر نسبة البروتين المطلوبة لجسمك من الاكل تستطيع اضافة هذا المنتج وهو بروتين البرو كومبلكس قليل السعرات ورفيع البروتين ولكن افضل انك تاخذه بعد التمرين او قبله ولكن ما انصح قبل النوم لانه 60 غرام بروتين قبل النوم و 275 سعرة حرارية تعتبر كثيرة

ولكن بلا شك هو منتج ممتاز وبروتين قوي لانه فيه 60 غرام بروتين في الحصة



فتقدر تستخدمه قبل او بعد التمرين والوي العادي تخليه حق قبل النوم

وارجوا اني اجبت على استفساراتك

تحياتي

[hungup]

الف الف شكر أخوي على ردك ..
ما قصرت والله ..
و راح أعمل بكل نصايحك أكيد ..
ماشالله عليك .. عيني عليك بارده ..
كفيت و وفيت ..

بالنسبة للبروتين .. هذي صورته ..

[hungup]

وهذي صور الامينو أسيد







أما الجلوتمين فهو نفس اللي حضرتك حطيته ..
أول واحد اللي علبته لونها أزرق ..

عساك عالقوه يالغالي ..
شكرا ..

تحياتي العطره لك أخوي ..