سلام يا فيصل عدد مــــــــــــــا ذكرناك
واعداد ما قالوا لك النـــــــــاس مرحوم

واعداد دمــــــــــع العين في يوم فرقاك
وأعداد ما فرجت مــــــــن كرب مضيوم

إن قلت يـــــــــــــا ليتي ألا ليتي فداك
وإن قلت واعـــــــــــــزاه ما نيب مليوم

يــــــــــــــا لعن ابو من لام عين تمناك
قــــد بددت شوفتك عن شوفها غيوم

وين العزا ما بــــــــــــــه عزا غير نجزاك
بمواصلة مسعاك والــــــــــدرب معلوم

ترى عــــــــــــــــــــزانا يوم حنا فقدناك
إنــــــــــــــا خذلنا راي من يزعم زعوم

الـــــــــــــراية اللي رفرفت فوق يمناك
أبشرك يــــــــــا شيخ ما طالها خصوم

إن كــــــان قصد عداك تعطيل ممشاك
حقك علينا مــــــــــــــــا نوقف ولا يوم

نسير في دربك ونـــــــــــاخذ سجاياك
ونرد من هو ضـــــــــد الإسلام ملطوم

نم هاني العينين حنا تبعنــــــــــــــاك
والدار فيها لابـــــــــــــــــــة مالهم نوم

إن قــــــــــــــاله الله ما نضيع لك مناك
نسجد لرب البيت في القدس ونصوم