نقاش: ظاهره الألعاب المستعمله تكتسح سوق الألعاب

[FARES360]

سلام عليكم

راح نتكلم اليوم عن ظاهره المستعمل
الفيديو جيمز في الجيل السابق كان داخل دائره فساد مقرصن كان يواجه اجهزه الجيل السابق
ايام البلاي ستيشن 2 الأكس 1 تحديدا .. بوجود الأصلي على الأرفف الا انه الناس كان لسانها
يسأل عن الكوبي توماتيكيا.. اول ما يدخل اي محل.. في هالجيل هالظاهره تقريبا اختفت كليا
وقد ترجع الأسباب الى عدم وجود الكوبي للبلاي ستيشن 3 ومن ناحية اخرى ظاهره الباند من اللعب في الأون لاين بالنسبه للأكس بوكس 360 .. برغم من وجود الكوبي الا انه الأصلي مازال مسيطر
وماسك مبيعات عاليه من امثلتها جيرز وهيلو ..الي مواقع التورنت كلتها لكن ما اثرت على مبيعات الأصلي , عموما مع الحاله الأقتصاديه الي صايره بالعالم والحاله الناشفه في دول الخليج برغم اننا دول نفطيه
..من هنا بدت ظاهره المستعمل تكتسح السوق في الأونه الأخيره بشكل ملفت ! ليس فقط عندنا
ولكن حتى اشهر المواقع والمحلات تبيع العاب مستعمله الأن ebay و amazon ..وايضا GameStop المشهور في امريكا .. ويقال انه المحلات فوائدها الماليه اكثر من العاب المستعمله

على عكس الألعاب الأصليه الجديده الربح اكثر رايح للشركه وقليل على المحلات..
ظاهره الألعاب المستعمله انتشرت بشكل واسع اكثر بين اصحاب البلاي ستيشن 3
ربما لأنه اصحاب ال360 لديهم بديل الكوبي على عكس اصحاب السوني ..

هاذي بس مقدمه صغيره , الموضوع الأساسي بعطيكم اسئله بالأزرق وجاوبوا عليها ..
- هل تعتقد انه كساد الألعاب المستعمله قد يأثرفي مبيعات الألعاب الأصليه ؟
انا فكرت فيها.. فقلت .. الحين لو اربع اشخاص يشترون لعبة يديده هاذي 80 دينار
راحت بين المحل والشركة .. لكن لو شخصين يشترون اصلي واثنين ينطرونهم يخلصونها..
40 دينار طارت من كسب الشركة والمحل .. فعشان جذي انا اشوفه يأثر لكن مو بشكل لافت..
هالشي ينطبق لشباب بدلي وأبدلك لوول.. موافقين مع فلسفتي ولا تشوفونها غلط؟
- هل انت من اصحاب المستعمل؟ اذا نعم كم لعبة مستعمله عندك وكم اصليه..

- ماهو سبب اهتمامك في الألعاب المستعمله او التبديل ( عدم وجود كوبي؟ العاب غاليه؟ ام اسباب اخرى )

- لما تشتري مستعمل هل تشعر بالذنب او الأحباط كون اللعبة فقدت رائحها الجديده وشعور فتح الغلاف بنفسك .. عندك عوامل نفسيه ؟

- ما رايك بأسعار المستعمل.. لو كنت تتداوله .. هل تراه مبالغ ام الأسعار حلوه ..

- هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟

وبس
حق الكساله الي مالهم خلق يناقشون بالموضوع.. سويت لكم تصويت

[The Last Lombax]

وعليكم السلام ورحمة الله وبركاته

- هل تعتقد انه كساد الألعاب المستعمله قد يأثرفي مبيعات الألعاب الأصليه ؟

أكيد يأثر وبقوة بعد

- هل انت من اصحاب المستعمل؟ اذا نعم كم لعبة مستعمله عندك وكم اصليه..

لا , ولكن ممكن إذا أبغى لعبة و ما ألاقيها أخذ مسعمل

- هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟

أنا من اللي يحب يجمع الألعاب و لا أهتم بالتبديل ولا بيع الأشرطة اللي عندي


مشكور على الموضوع أخوي فارس

[N O X]

وعليكم السلام والرحمه

بصراحة الالعاب المستعملة ماتفرق معي

حيث اني ماقد شريت او اهتميت اخذ مستعمل

بس الي صدق مشكلة العمال الي يغلفون المستعمل على انه جديد

او يصر عليك انه جديد وهو قدامك حالته حاله ؟

وهذي صارت معي يوم كنت رايحة للقصيم ماعندهم غير هالنسخة الفلانية والكتاب مقطع والعلبه مدري وش

صاير لها ويقولي جديدة ويصر ومنتب موصل معه شيء

على فكرة للي ماعندهم علم ترا الاشرطة المغلفة ومافيها علامة PlayStation
هذي مستعملة ومغلفة من المحل

- هل تعتقد انه كساد الألعاب المستعمله قد يأثرفي مبيعات الألعاب الأصليه ؟
ممم مااعتقد لان السالفة بتنتهي بنزول الكوبي والكوبي ترا
كم سنة ولا شهر وينزل لك وشوف عاد انقلاب الاحداث
ونزول الاسعار

- هل انت من اصحاب المستعمل؟ اذا نعم كم لعبة مستعمله عندك وكم اصليه..
ابداً العابي اصلية

- لما تشتري مستعمل هل تشعر بالذنب او الأحباط كون اللعبة فقدت رائحها الجديده وشعور فتح الغلاف بنفسك .. عندك عوامل نفسيه ؟

انا النفسية بعينها ..اتحطم كلياً

- هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟
احب اجمع ممم بس تبي الصراحة لا خلصت من اللعبة العادة اخليها ذكريات
بس في حاله ان اللعبة سخيفه ارميها لخواني او بزباله
صراحة محب احد يلمس اغراضي عقبي

[Lonely Hunter]

حق الكساله الي مالهم خلق يناقشون بالموضوع.. سويت لكم تصويت

شكرا
........

[SALM0RE]

- هل تعتقد انه كساد الألعاب المستعمله قد يأثرفي مبيعات الألعاب الأصليه ؟

لا ماراح يأثر وايد

- هل انت من اصحاب المستعمل؟ اذا نعم كم لعبة مستعمله عندك وكم اصليه

يس انه من أصحاب المستعمل و عندي

Dark Sector
Burnout Paradise
MotorStorm
Virtua Fighter V
Ninja Gaiden Sigma

و الأصلي 15 لعبة

- ماهو سبب اهتمامك في الألعاب المستعمله او التبديل

فلوس . . . What Else

ما رايك بأسعار المستعمل.. لو كنت تتداوله .. هل تراه مبالغ ام الأسعار حلوه

اذا بتشتري مستعمل فاشوف سعره ممتاز اما اذا بتبادل مع المحل
فبتخسر وايد

هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟

ولله انه احب اجمع بس في بعض الأحيان احس غصبن علي ابادل
او ابيع . . . بس عاد المهمين لاء

[tekken1663]

انا أحب أشتري لعبة جديد
- هل تعتقد انه كساد الألعاب المستعمله قد يأثرفي مبيعات الألعاب الأصليه ؟
لاأظن انه سيؤثر
- هل انت من اصحاب المستعمل؟ اذا نعم كم لعبة مستعمله عندك وكم اصليه..
لا أحب ان أشتري الألعاب مستعمله
GAME مستخدم0 GAME جديد 10
- ماهو سبب اهتمامك في الألعاب المستعمله او التبديل ( عدم وجود كوبي؟ العاب غاليه؟ ام اسباب اخرى )
لا
- لما تشتري مستعمل هل تشعر بالذنب او الأحباط كون اللعبة فقدت رائحها الجديده وشعور فتح الغلاف بنفسك .. عندك عوامل نفسيه ؟
نعم أشعر بذنب والإحباط أنا احب شم رائحتها وسماع صوت فتح الغلاف وتشوق وتفكير
- ما رايك بأسعار المستعمل.. لو كنت تتداوله .. هل تراه مبالغ ام الأسعار حلوه ..
تقريبا لو كانت مثل MGS4 اكييد150 ريال لو لعبة غير مشهوره 100 ريال
- هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟
نعم أحب تجميع
شكرا الموضوع

[hemo memo]

- هل تعتقد انه كساد الألعاب المستعمله قد يأثرفي مبيعات الألعاب الأصليه ؟

تأثير كبير في حالة ان الفرق بينها وبين الاصلي فرق شاسع

- هل انت من اصحاب المستعمل؟ اذا نعم كم لعبة مستعمله عندك وكم اصليه..

انا جهازي جديد وللحين ماشريت مستعمل بس راح اشتري

- ماهو سبب اهتمامك في الألعاب المستعمله او التبديل ( عدم وجود كوبي؟ العاب غاليه؟ ام اسباب اخرى )

الالعاب غالية. وعدم وجود كوبي. وإذا صار محل معروف وفيه لعبة اصلية ولعبة مستعملة ما اتوقع فيه فرق غير السعر

- لما تشتري مستعمل هل تشعر بالذنب او الأحباط كون اللعبة فقدت رائحها الجديده وشعور فتح الغلاف بنفسك .. عندك عوامل نفسيه ؟

صحيح العوامل النفسية تؤثر بس الذنب الوحيد اللي اشعر فيه بعد شرائي للمستعمل خوفي من ان آخر مستخدم للشريط شخص غير محافظ (هذي تجربة لي مع جهاز مختلف)

- ما رايك بأسعار المستعمل.. لو كنت تتداوله .. هل تراه مبالغ ام الأسعار حلوه ..

للأسف للحين ماشريت مستعمل

- هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟

بالنسبة للـps2 احب اشتري الالعاب بس اللعبة اللي احبها ما اتخلى عنها اما بالنسبة للـ ps3 ماراح اقدر لأن الاسعار مبالغ فيها جدا يعني حتى لو انت هوايتك تجمع الالعاب مع الـ ps3 ماراح تقدر

[HasaWii]

- هل تعتقد انه كساد الألعاب المستعمله قد يأثرفي مبيعات الألعاب الأصليه ؟

يعتمد اذا كـــان هذا التوجه موجود عند الاجانب . .

- هل انت من اصحاب المستعمل؟ اذا نعم كم لعبة مستعمله عندك وكم اصليه..

نعم انا من اصحاب المستعمل والداعين له
العابي الاصلية
Dead space
MGS4
LBP
Fear 2
COD 5
Eternal Sonata
Kill zone 2

- ماهو سبب اهتمامك في الألعاب المستعمله او التبديل ( عدم وجود كوبي؟ العاب غاليه؟ ام اسباب اخرى )

بالنسبة لي المسألة ليست وجود الكوبي انمـــا الاسعار المبالغ فيها يعني اول ما تنزل اللعبة 250 ريال وانطر على ما ينزل سعرها

- لما تشتري مستعمل هل تشعر بالذنب او الأحباط كون اللعبة فقدت رائحها الجديده وشعور فتح الغلاف بنفسك .. عندك عوامل نفسيه ؟

اي والله عامل نفسي لما افتح اللعبة جديدة اعرف ان قيمة هالجديد 50 - 100 ريال

- ما رايك بأسعار المستعمل.. لو كنت تتداوله .. هل تراه مبالغ ام الأسعار حلوه ..

يعتمد على الشخص اللي عارض اللعبة . . . احياناً تلاقي ناس تبيع اللعبة بأكثر من سعرها جديدة في السوق

- هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟

بعض الالعـــاب الاسطورية على الجهـــاز نعم
اما الباقي بمجرد ان انتهي منها بـــــــاع - بــــدل


وفي النهاية يقول الهندي اللي اتعامل معاه . . ما في مسكل اي لعبة انت ما في يبقى جيب هينا انا في شيل


طبعا يكسرني في السعر

[General BiG Boss]

اللعبة اللي تستاهل اصلي اشتريها يديدة + ما افكر اني ابيعها أو ابدلها بسبب (اونلاين) وبعض الالعاب حاله استثنائية والعكس صحيح
حاليا: 16 لعبة اصلية - 8 مستعمل

[KasiH]

سلام عليكم

وعليكم السلام ياهلا بفارس

- هل تعتقد انه كساد الألعاب المستعمله قد يأثرفي مبيعات الألعاب الأصليه ؟

اكيد هذا الشيء انا مثلا كنت ابغى اشتري لعبة Dead Space جديدة اصلية لكني رحت المحل ولقيت
عنده مستعمل نفس اللعبة وكانها جديدة وقيمتها ارخص من الجديدة بنص السعر على طول راح
اخذ القديمة وصاحبي كان يبغى اللعبة قلتلته استنى بخلصها وابيعها لك .. يعني كده الشركة خسرت
قيمة لعبتين وهذا غير صاحبي لما يبيعها .. فشي طبيعي المستعمل يأثر على المبيعات ..

- هل انت من اصحاب المستعمل؟ اذا نعم كم لعبة مستعمله عندك وكم اصليه..

ايوة انا اشتري مستعمل وتقريبا 65 % من العابي مستعملة والباقي جديد ..

- ماهو سبب اهتمامك في الألعاب المستعمله او التبديل ( عدم وجود كوبي؟ العاب غاليه؟ ام اسباب اخرى )

عادة في العاب تستحق تاخذها جديدة مثل كيلزون 2 وريزي 5 العاب قوية وراح تعشش عندك
وشيء طبيعي ترجع تلعبها لكن في العاب ماتستحق تاخذها جديدة يعني تاخذها مستعمل تنهيها
وترجع تبيعها مثلا لعبة مهي قوية لكن تبغى تاخذها تنهيها بس ..

لكن سبب الاهتمام هو انه الالعاب غالية .. الجديد عندنا ينباع ب 300 ريال سعودي

- لما تشتري مستعمل هل تشعر بالذنب او الأحباط كون اللعبة فقدت رائحها الجديده وشعور فتح الغلاف بنفسك .. عندك عوامل نفسيه ؟

ممممممم يعني احيانا لما تكون لعبة قوية وماعنيد فلوس الجديدة

- ما رايك بأسعار المستعمل.. لو كنت تتداوله .. هل تراه مبالغ ام الأسعار حلوه ..

الاسعار حلوة جدا PES2009 بـ 100 ريال والجديدة كانت تنباع بـ 350

[QUOTE] - هل انت من النوعيه الي تحب تجمع كوليكشن بالبيت او تبيع/تبدل اللعبة بمجرد تخلصها؟ /QUOTE]

بعض الالعاب وخصوصا الار بي جي احب اجمعه .. يعني لو تشوف مكتبتي حق العاب البلاي 2
وخصوصا الار بي جي عندي فوق 200 لعبة كوبي من اقوى الالعاب اللي نزلت وفي العاب
عندي ار بي جي قديمة لو تلف السوق ماتلاقيها

وبس

يعطيك العافية على الموضوع سؤال .. انت تشتري اصلي ولا كوبي ولا مستعمل ؟

[General BiG Boss]

^^ اهو يشتري Orginal Only بالشطه

[FARES360]

يعطيك العافية على الموضوع سؤال .. انت تشتري اصلي ولا كوبي ولا مستعمل ؟

شوف ايام الأكس1 كنت اشتري الألعاب الي تستاهل اصلي والي ما تستاهل كوبي
اما قبلها ايام البلاي 1 كله كوبي!
في هالجيل سياستي تغيرت .. الألعاب الي ما تستاهل ما اشتريها أساسا! .. ( لا كوبي ولا مستعمل )

المستعمل صراحه كئييب مهما كانت اللعبة قوية ورخيصه ..
الغلاف المفتوح ما يشجع تحس اللعبة خالصينها ولاعنين خيرها لعب ..وعارضينا للبيع
عشان جذي ما اشتري مستعمل.. فقط جديد keep it fresh yo =p...

[bader686]

الصراحة اخوي فارس ماعندي وقت اقتبس و اجاوب على اسءلتك لكني .. 90% اتداول بالمستعمل

يعني على البلاستيشن3 العبة الوحيدة الي شريتها يديدة ..killzone2 الصراحة مافي لعبة تستحق غيرها

و الباقي كللللللللللللللللللللهم مستعمليين

اما على الاكس360 ..قبل لا ادش الايف كنت كلة العب كوبي كان عندي فوق ال60 دسك لكن يوم عرفت الاونلاين .. و صادني باند

على طول شريت جهاز ثاني ..و قمت اشتر الاعاب القواي يداد مثل gow2,l4d,dmc4,ng2,b&k

و الباقي مستعمليين

و على فكرة ترة انة شاري جميع العاب السيارات الي نزلو على الجهازين و كلهم يداااااد الاني مدمن سيارات

الانة لو تلاحظ العاب السيارات ماتحصلهم مستعمليين ماعدا سلسلة نيد 4 سبيد.. تلقى الكل يبي يبيعها

[hemo memo]

الانة لو تلاحظ العاب السيارات ماتحصلهم مستعمليين ماعدا سلسلة نيد 4 سبيد.. تلقى الكل يبي يبيعها

صدقت والله حتى امس متصل على محل اسأل عن العاب الكوبي قال لي ماعندنا كوبي غير لعبة نيد فور سبيد

والله انصدمت يعني لهالدرجة اللعبة سيئه؟؟؟