وهان عليك تقولها
وهان عليك تنسانى
بكلمة منك نهيت كل اللى بيننا( مش عاوز اشوفك تانى)
دارت الدنيا بيا واتزلزل كل كياني
معقول !!! ...كان حبك ليا كدب؟؟!!
كان كل كلامك غش
كانت احلامى معاك سراب وخداع !!
غلطتى انى صدقتك وصدقت قلب فى ثانية باع
دلوقت كل شئ بكلمة منك انتهى وضاع
معقول كان حبك ليا كدب !!!
كان بيقولى يا حبيبتى ...يا حياتي
كانت ترد عليه اشواقى وآهاتى
كان بيقولى هاعيش العمر احبك
واتمنى لو يطول فى القرب منك
لو بصيتى فى السما هاتلاقى النجوم متلضمة بتقول احبك
كان يقولى لو فتحتى شباكك تلاقى مكتوب قصادك
كلمــــــــــــــــة أحبــــــــــــــــــك
كان يقولى منين تروحي هاتلاقى قلبي محاوطك
معقول ....كان حبك ليا كدب !!!
مش قادرة اصدق ...لا يا قلبي صعب
كل ده ليه ..وايه ذنبي ؟
حبيتك اوى ..وحبي ليك اكبر ذنب
لو كان كده يبقى اوعدك اتوب عن ذنبي ويغفرلى ربي
لو كان حبي وهم خلاص فوقت من وهمي
ورود عمرى اللى فتحت على نور عيونك
دلوقت دبلت قبل الاوان
قلبي اللى حلف العمر يصونك
بتخبط على بابه الاحزان
لسه لحظة الفراق محفورة فى خيالى
ياريتنى مت قبل ماسمع منك كلمة وداع تقولهالى
كان صعب اصدق انه يجينى الغدر من اغلى غالي
ودعتنى بكلمة ..وهان عليك تقولها وتنسانى؟!
هاقفل ببان القلب بعدك وزى الاموات هاعيش
ولو يوم عينى فكرت تشتاقلك متلزمنيش
حلفتك يا دمعتى استني ..متنزليش
خسارة نبكي على اللى باعنى رخيص ..مايستاهلنيش
اليوم هجرنى اعز الاحباب ...وراح
فاتنى لوحدتى
ولقمرة كنا بنسهر تحتها نزرع الارض امانى وافراح
كان ضحكنا بيجلجل فى الفضا
دلوقتى سكنتنى الجراح
معقول ..كان حبك ليا كدب ؟!!
دست على قلبي ومرحمتنيش
ودعتنى بكلام مسمعتوش من صدمتى
وكأنك متعرفنـــــيش
ضاع منى الطريق ومشيت لوحدى شاردة
اعذريني يا دمعتى حاولت احبسك
لكن خلاص مش قادرة
واتكسرت كاسات الهنا واتبدلت بمر وعلقم
قلبى اللى علمته احلى معانى الهوى دلوقتى بيندم
معقول ..كان حبك ليا كدب ؟!!
اتمنيت عليك يارب
قلب صافي يحبني
نقسم فرحتنا سوا ..ضحكتنا سوا
حتى فى دموعي يشاركنى ويحسنى
وفى عز فرحى معاه لاقيت غدره قسمنى وهدنى
العيب فيا ولا فيه ...ولا الليالى حالفة تذلنى
كان جزاء اخلاصى منه انى عشت جوه خدعه
دلوقت خلاص هاودعك يا احلى ايامى
يا احلى حب واحلى كدبه
