السلام عليكم
والله تعرفون اجازه والناس مسافرين
وبحكم ان اهلي من الناس فقالو لازم نسافر
المهم راحو وخلوني
وحيد
ما بقو لي لا ام ولا اخت ولا شغاله تطبخلي
وانا انسان كسول
اذا قفلت المطاعم الي توصل اموت جوع في البيت
لايمكن اني اطلع
المهم
حبيت ابين لكم طريقه سهله وفعاله لسد جوع اي كائن حي
اول شي لازم انا ننزل المطبخ
نفتح الدواليب نشوف شي ينأكل او شي طارف
نبحث في المخزن والرفوف كورن فليكس ومكرونه واشياء ناشفه
كنت ببداء في الاكل بس قلت خلني اكثف عمليات البحث
نفتح الثلاجه.. وهي مكان محتمل جداً لايجاد الطعام
بس مالقيت الا بيضه وحده وببسي وبعض الخضروات والفواكه الملونه
الواحد ما ييأس نفتح الباب الي فوق..يمكن يتحسن الوضع
لكن كما تشاهدون..لا شيء يذكر..ماغير دوا كحه
عندما يحدك زمانك على الكورن فليكس..لا تستسلم
افتح الفريزر.. فلربما يكون الفرج متجمداً ينتضرك..لكن الايسكريم ما يخارج تالي الليل
هنا نجد بعض العلب..
مدري اش هي..اشياء يابسه..
كني في مختبر مستشفا
لكن عند شعوري باليأس.. ضهر الكنز
منتجات امريكانا الله لا يحرمنا منها..
نلقطلنا اطرف شي..
نجت دجاج تاكل صوابعك وراه...
اللحين لازم اننا نقرا التعليمات الي ورا العلبه
يقولون افتح الكرتون وطلع المحتويات وحطها في زيت يغلي..
الان.. لابد لنا من ايجاد الفرن.. والزيت.. والمقلاه..
الحمدلله لقينا الفرن..
وتظهر محاولاتي الفاشله لتشغيل العين الكبيره الي في الوسط..بس ماعرفت
شغلت الي في الزاويه
ثم نطلع المقلاه
ونحطها على القز كما نلاحظ
وندور الزيت لين نلقاه..ويفضل يكون عافيه
ثم نصبه في المقلاه صباً
ونستمر بالصب لين تمتلي المقلاه او يخلص الزيت..
ايهما اولاً
ثمن نخلي الزيت لين يغلي
ويطلع فيه صوت طقطقه.
الحين نفتح الكرتون
ونطلع الكيس الي داخله الاكل
نفتح الدولاب ونبحث عن اي صحن مناسب
اذا مالقينا صحن مناسب نحط اي صحن..عادي مابناكل الصحن..
ثم نجيب صحن..
استعداداً للعمليه الاهم..الي هي القلي
لازم نحط مناديل..
امي تقول اذا قليت يا ولدي حط مناشف ورقيه عشان تمتص الزيت
الحين نحط محتويات الكيس في المقلاه
لازم نفرغ جميع محتويات الكيس
ونقعد نحرك..ونحرك..ونحرك..
ونحرك..ونحرك
واهم شي انا مانوقف
لازم نقعد نحرك..حتى لو تعبنا..الي يبغا الدح..مايقول اح
نقعد نحرك لين ما يسير لونها كذا
ذهبيه محروقه.. طبعاً مو لازم تقعد لين تنحرق..بس انا كنت ادخن ونسيت
ثمن نشيلها من المقلاه ونحطها في الصحن
كلها على بعض
ثمن نحطها في صحن
ونحط ببسي وكتشب.. عشان نغير طعمها المحروق..
وناكل..وناكل..لين ما يطلع من اذاننا..
باقي حبتين مين يبغا..؟؟
اهم شي اننا نلم القراطيس والكركبه ونحطها في الدرام
طبعاً ما كفا الدرام..بس ابغا اوريكم اني نظيف ومؤدب
وبالعافيه على قلبي
وعلى قلوبكم
الشيف: مريسل
,, 
المشاركة الأصلية كتبت بواسطة Ran Morie
