استفسارات مبتدئ .. أرجو الدخول
السلام عليكم ورحمه الله وبركاته
كيف حالكم اخواني عساكم بخير؟
بالبدايه احب اشكركم جميعكم على هذا القسم الجبار، فوالله لولاه ثم جهودكم ما حصلت العزيمه الكافيه حق اني انزل وزني واحاول اني امشي على دربكم
واخص بالشكر كباتن القسم ومنهم ابو راشد، The Cast, The Rock ,توتو جده، ابو مها، وغيرهم وغيرهم من الكباتن اللي ماحضر اسمهم على بالي حاليا، والشكر ايضا موجه للاخوه سواء المستفسرين او اللي يجابونون اخوانهم ..
بالبدايه راح احط معلومات عن جسمي:
الطول: 189
الوزن سابقا: 94
الوزن حاليا: 88.4
نسبه الدهون: 17.4% << من خلال هذا الموقع:
Metric Body Fat Calculator
الله يسلمكم هذا وزني السابق كان بدايه قراري اني انزل وزني + ابني عضل واعدل من جسمي، خصوصا ان لي طول والكل يقول لي جسمك راح يكون احلى لو مع عضل مفتول << للعلم حتى ومع وزني السابق ما كان يبان ان فيني زياده وزن لما اكون بالملابس، لكن افصخ التيشيرت وتجوف الكوارث
ووصلت الى الوزن اللي انا عليه في شهرين تقريبا، مارست فيها الجري بشكل شبه يومي + تمارين البطن، وحزتها ما كان عندي اثقال الا دنبل واحد وثمانيه كيلو بس<< عن الطنازه بلييز
وبعد ما وصلت للوزن اللي انا عليه حاليا، قررت اني ابني عضل، فاشتريت لي اثقال (بار+دنابل+ اوزان مختلفه بمجموع 50 كيلو كبدايه) وبديت اتمرن بناء على موضوع اخونا foxdie elf
http://www.montada.com/showthread.php?t=639206
<< يمكن في ناس بيسألون ليه ما اتمرن في صاله؟ والسبب ان وضعنا المالي لا يسمح حاليا لمصاريف تسجيل في نادي + مخاوف من الاهل ان في النادي بيعطوني حقن او شي كذا وارجع لهم البيت منتفخ، فحتي برنامجي الغذائي لا يحتوي على اي من المكملات الغذائيه، للسبب السابق واني لسه طالب جامعي فما عندي قدره اني اشتري كل هالاشياء، بس ادعوا الله ان الملك يطيح عنا قروض الاسكان وحزتها اقدر اسوي اللي ابغي
المهم بعد الروايه الطويله والممله اللي كتبتها فوق << عذروني والله لكن حبيت اني اوصل الفكره بالكامل للي حاب يجاوب علي
بناء على جدول الاخ، فيوم السبت اللي هو اليوم لازم امرن عضله الصدر + البطن
ولكن عندما قمت بالتمرينين الاثنين للصدر:
<< للعلم التمرين الثاني عملته على كرسي مستوي وليس مائل، يعني وانا منبطح على ظهري بالكامل
المهم بعد ما خلصت التمرينين هذولا بالذات، حسيت بشد قوي في عضله الكتف الخلفيه، وشد قليل في عضله الصدرمع اني قد ما اقدر اني اركز على يدي لا تروح يمين او يسار واحاول قد ما اقدر اني اطبق نفس الصور بالضبط !
فهل هذا شي طبيعي؟ انه احس بشد في عضله غير اللي امرنها خصوصا اني لسه بادي تمارين التضخيم؟؟ او ان في خطأ عملته من غير ما ادري؟
هذا سؤالي الاول، وسؤالي الثاني طال عمركم بما اني حاليا لا استطيع شراء المكملات الغذائيه، بمعنى ان كل البروتين اللي يحتاجه جسمي لازم من الاكل، فهل اتبع نظام الخمس او ست وجبات في اليوم مع الملاحظه ان الوجبات الفرعيه ايضا تكون غنيه بالبروتين؟ << مثلا بين وجبتي الغداء والعشاء آكل وجبه خفيفه مثلا سندويش تونه مع عصير الخ؟
واذا في احد عنده برنامج غذائي ويكون خالي من المكملات ياريت لا يبخل علي
هذا ما خطر في بالي، وساااامحوني والله اني طولت عليكم ومللتكم بس لأن ابغي اوصل الفكره بالكااامل، وادعوا لي اني استمر معاكم وما انقطع << ترى هذا اول اسبوع لي من بدايه التمارين الجديه
اخوكم عيسى من البحرين
المشاركة الأصلية كتبت بواسطة Crsa7
