السلام عليكم ورحة الله وبركاته
اخواني حاب اطرح عليكم تجربتي الشرائية الاولى للمكاملات من موقع امازون
اتمنى ان تفيد الجميع هالتجربة
اول بتاريخ 22 اغسطس قمت بفتح حساب في شركة ارامكس الخايسه وراح تعرفوا بعدين ليش الخايسه
بعدها رحت سويت حسابي في موقع امازون وسويت عنواني اللي اعطوني ارامكس وما اعطوني البريد الا بعد حوالي 5 ايام وبعد مراسله وشاتهم وقلت حيا وكأني اشحتهم شي
عموما قلنا بشوف لنا شي نشتريه من امازون وقررت اشتري لي بروكمبلكس العادي نكهة الفانيلا الكريمي لاني ماحصلت هالنكهة عند كثير من الاخوان فقررت اشتريها من الموقع واخذت لي علبه ملتي فبتامين عشان سعرها مناسب جدا 180 حبه ب 86 ريال فقط لان عندنا هنا بالسعودية يبيعوا 90 حبه ب 120 ريال شوفوا الفرق فرق بين السماء والارض
عموما اكتفينا بها الطلبيتين وقلنا نشوف تصل الطلبيه والا ما تصل
والله وانتظرنا وبتاريخ 30 اغسطس وصلت طلبيتي بريدي اللي في امريكا
وترسل لي ارامكس ان السلعه محجوزة عندهم وماراح يرسلوها الا بعد ما ارسل لهم تصريح من هيئة الدواء والغذاء
وخلال 10 ايام اذا ما ارسلت لهم راح يتلفوا الطلبيه حسبي الله عليهم
لانهم مسجلين عليها منتجات صحية
جلست اقول لهم هذي مكملات غذائية مو ادوية ولا شي قالوا لا
جلست اسبوع وانا ارسل لهم واكلمهم ياهوه ياناس انتوا ارسلوها وهي راح تدخل قالوا لا
وبعدها افتح بريدي احصل رساله من مديرهم كاتب لي (( انه راح يرسلها لي يوم الاربعاء القادم بس اتمنى انك ماعاد تطلب اي طلبيه من هالنوع ))
بالله شوفوا يعني هالمره راح يدخلها بس المره الجايه ماراح تدخل حسبي الله عليهم
عموما والله انتظر لي حق 4 ايام واشيك على الطلبية الا وهي باقي موجوده في بريدي في مكتب ارامكس بأمريكا
اراسلهم واكلمهم قالوا انهم راح ينتظروا التصريح اذا افيه تصريح ماراح يرسلوها
ياهووووه مديركم كلمني من اربعة ايام وقال انه راح يرسلها لي وش السالفه قالوا لي اوكي عطنى رقم نتصل عليك منه عطيتهم جوالي 05xxxxxxxxxx
والله ويتصل علي واحد قال لي والله عندنا شحنات ممسوكه في جمارك مطار الملك خالد قلت له انت بس ارسلها واذا امتسكت في الجمارك عفى الله عنكم قال لي ماراح تطالبنا في حالة حجزها قلت له لا ماراح اطالبكم انتوا بس ارسلوها
والله انا بعد ماقال لي كذا شكيت انه بيأخذ الطلبيه ويقول لي امتسكت ههههههههههه
بعد ايام اشوف الطلبيه تحركت قلنا الحمدلله
وبعد يومين وصلت مطار الملك خالد ومكتوب ان الطلبيه محجوزه في مطار الملك خالد ولازم تصريح دخول لها قلت الله يعوضنا خير ونسيتها
اليوم الثاني مريت صديق لي في مكتب ارامكس وقلت له عن السالفه شيك برقم الطلبيه قال لي هذي موجوده اللحين بجده وراح يرسلوها لك بكره
طبعا انا ما صدقت خبر افتح موقع شوب اند شيب واشوف انها فعلا موجوده في جده وهي في طريقها لي طيب كيف اول مسجل انها محجوزه في الرياض وبعدها مشت عموما الحمدلله على كل حال
استلمت الطلبيه امس يعني بتاريخ 14 سبتمبر يعني باقي اسبوع وتكمل شهر وحالتها حاله مفتوحه والبودره مسكوبه على العلبه قلنا الحمدلله انها وصلت وهذي اخر مره اشتري مكملات عن طريق ارامكس
نصيحتي للي يبي يشتري مكملات عن طريق شحنها بارامكس والله يعقدوك اقصد ارامكس مو الجمارك
اذا تبي تشتري خذ شحن عن طريق واصل تصل كل طلباتك ولا يطلبوا لا تصريح ولا شي وكثير يتعاملوا معاهم
ان مشكلتي المكان اللي انا فيه مافيه واصل بس بفتح لي في الرياض واطلب عليه وبعدين ارسل الشحنه لمكاني
اتمنى ان تجربتي راح تفيد الكثير
تحياتي
المشاركة الأصلية كتبت بواسطة THE CAST
