اذا كانت المكملات طبيعية ..فلماذا تزول اثارها عند تركها ؟؟؟ < موضوع نقاش >

[بيج بوي]

بسم الله الرحمن الرحيم ...

السلام عليكم ورحمة الله وبركاته ..

كيف حالكم شباب .. إن شاء الله بخير ...

عيدكم مبارك وعساكم من العوادة

هذا الموضوع موضوع نقاش ... نحن دايما نتكلم عن المكملات ونقول انها طبيعية ومستخرجة من الغذاء .. انزين عيل ليش تروح يوم نتركها ..

يعني تروح العضلات ويترهل الجسم لا تقولي الجسم متعود على الحركة انا اقولك ونتا تتمرن اقطعها وشوف .. يعني انا ابا اعرف لو هي مستخرجة من مواد طبيعية ليش تروح تأثيرها

ياما تمرنت طبيعي وقطعت عن التمرين وغذائي متوسط إلى ضعيف وكنت اشرب غازات واكل سكريات

النتيجة = زاد وزني من 58 إلى 60 معا اني قطعت شهرين ونص تقريبا ونسبة الدهون من 15 إلى 16 .. والسكس باك تمام بس تغير بسيط جدا جدا .. و العضلات تمام التمام ما تغير منها ولا ايش شي ابدا ...

وبعدين قلت خلني بجرب المكملات جربتها وقطعت عن التمرين لمدة اسبوعين وانا راجع بعد العيد ومجهز مكملات... بس انا قطعت بسبب انشغالي فالعيد ... المهم يعني مدة الأنقطاع اسبوعين + جدولي الغذائي تقدر تقول 95% ... 6 وجبات في اليوم وكل شي تمام وانا كنت في فترة الضخامة وماقدرت استعمل المكملات ولا قدرت اتمرن لاني سافرت السعودية وانا بلادي الامارات وما رايح العب حديد هناك رايح اعبد الله ... بس مع ذالك كنت محافظ على الأكل لاكن ,,,

النتيجة = نزل وزني من 66 إلة 55 وترهلات وكرش ... خفيف والكتلة العضلية خفت وايد ..

يعني انا مستغرب اذا كانت المكملات طبيعية ليش كل هذا يحصل لا تقولولي كان جسمك متعود على الحركة عيل انا يوم تمرنت طبيعي وتركت حتى ما تمرنت واكلي كان ضعيف إلى متوسط حصلت بعد التغيرات البسيطة تقدر تقول غير ملحوظة ومدة الانقطاع = شهرين ونص أما يوم استخدمت المكملات اسبوعين مع تغذية جيدة استوت العجايب ..

على العموم كل واحد يعطيني تجربتة وانقطاعة ولو تمرن طبيعي وبطل النتايج ولو استخدم مكملات والنتايج ؟؟

والسموحة على الأطالة ...

اتمنى مشاركتكم ...

دمتم بود

وعيدكم مبارك ..


والسلام عليكم ورحمة الله وبركاته .

[الناعسي]

+1 ونفس السؤال

[فلاشي]

لان ببساطه بدون مكملات ما كنت مكمل احتياجك من البروتين

والمكملات كملت احتياجاتك الناقصة وتقدمت

لو انك بس قطعت عوضت الغذاء محل المكملات يعني طبيعي رح تزيد وجباتك اكثر من اول لانه ما عاد في مكملات

عشان تعوض نسبة البروتين المفقوده من المكملات

يعني لو كنت تاكل 3 علب تونه و 5 بيضات و صدر دجاج بيوم واحد ما ينقص شي من عضلاتك

وشكرا لك

[ryko]

برده محتاج رد على نفس سؤالك

أنا فعلا بلاحظ إن الواحد بعد الإنتهاء من إستخدام المكملات بيقل تانى و العضلات بتقل شوية طبعا هو مش بيبقا ملحوظ زى المنشطات لكن بيبان لما بوزن وعارف طبعا الرد حيكون إيه إن التغذية مش مظبوطة لا يمكن باكل بنفس الطريقة اللى كنت باكل بها أثناء إستخدام المكمل ولو الرد إنى لازم أكل أكتر من اللى كنت باكله خلال استخدامى للمكمل طب ما كدة يبقا المواظبة على المكمل أرخص

يعنى ساعات الواحد بيدور على المكمل لإنه أوفر من الضغط جامد فى الأكل سواء من الناحية المادية أو المعنوية(إن جسم مايتحملش كم أكل معين) بالإضافة لإن المكمل الأمريكى على الكلام اللى بنسمعه إنه مصادره مضمونة و نضيفة زى البروتينات مثلا

[السلطان..]

وعليكم السلام
لأنك كنت معوض النقص الا كان بجسمك بالمكملات وبعد ماتركت البروتين اكيد بتقل نسبه البروتين وهكذا راح ينزل جسمكهذي خلاصه الكلام كله.

[بيج بوي]

مشكورين على المشاركة اخواني ..

انا درست ف الأحياء عن المكملات حتى الأستاذ قالي ايب كم من حبة امينو وفحصهم ..

واسم العنوان فالكتاب يعني عن المكملات الغذائية = العضلات الكاذبة ..

وانتظر المشاركات الثانية

وتسلموون

[بيج بوي]

على كلام الكابتن سلطان الجسم متعود على نسبة البروتين اللي يحصلها كل يوم >>>

وانا يوم كنت اتمرن طبيعي في فترة الضخامة كنت اكل اكل جبار صدرين دجاج في اليوم وتونا وستيك لحم و7 او 5 بيضات ويوم تركت التمرين لمدة الشهرين ونص تركت هل تغذية وكنت اكل3 وجبات فاليوم اللي هي اكلاتنا الشعبية يعني هريش برياني مكبوس خخخخ... يعني نسبة البروتين قلت واايد عيل ليش ما اخترب جسمي ؟؟؟

انا بصراحة مدرب الكراتيه قالي يوم تتدرب طبيعي احسن من المكملات بووايد هذا وجهة نظرة و وجهة نظري ... وبنشوووف باقي الأخوة

[الدب الروسي]

أنا مآعندي تجربة شخصية ..

ولكن لي قريب كآنت بنيته ضعيفة ؛ وبعد سنة و شهرين في كمال الاجسام قدر يزيد من وزنه 27 كيلو وأصبح إنسآن ثآني ..

وبعد توقفه عن اللعبة وعن المكمّلات لمدة 20 يوم بس , نزل من وزنه 10 كيلو وكآنت كلها عضلات !

وماكان يستخدم من المكملات إلآ وآي بروتين فقط .

************

إكتسآب الكتلة العضلية ليست بالشيء السهل أبداً ! ؛ كما أن المحافظة عليها أصعب !

فأنت بحاجة لسد كامل إحتياج جسمك من البروتين والغذاء مما يعني زيادة بالاكل .

والمحافظة على فورمة الجسم و أيضاً لكي لا تكسب الدهون عن طريق ممارسة الرياضات بشكل معتدل دون إنقطاع .

[crazy.eclipse]

ف نطري ان الانسان يعتمد على الاكل الطبيعي فقط و في بعض الاحيان يدخل مكملات اي مرة كل 6 أشهر او 4 أشهر

[TRIPLE H2]

و عليكم السلام
صراحة من زمان أنا كنت مثلك أعتبر المكملات شي ثانوي
لكن هاذي الفكرة تغيرت مع الزمن
خلنا مثلا نتكلم عن البروتين
الحين واحد وزنه سبعين يحتاج من 140 الى 200 جرام بروتين مثلا فشو يسوي الاخ
يروح يجبلك علبة البروتين و ياخذ منها من50 الى 100 جرام من البروتين و الباقي يكمله بالأكل فعكس المنظومة كاملة فخلى الاكل مكمل و المكمل أكل
أذكر موضوع لأخوي توتو جدة يقارن بين شباب الحين و شباب زمان ابحثوا عنه و قولولي رايكم

[jawad07]

والله ما ادري ايش اقولكم انا وقفت نادي ووزني كان 74 وما كنت اخذ الا امينو واكل اكلم جدول غذائي تنشيف طبعا قطعت النادي لمدة شهر وكنت وقتها فاك اكل مع ذالك نزل وزني من 74 الى 67 تقريبا 6 كيلو ونزوول واضح انه عضل خسرت كتله عضليه كبيره مره وانقهرت والله الحين انا استخدم بروتين و امينو وجلوتامين خلصت العلبه الثانية من البروتين ووزني زاد 3 كيلو وصلت لل 69 مع نضام غذائي اانا اتوقع اذا انت ما شي على جدول غذائي وكان جسمك متعود على نسبة بروتين معينه فاكيد اذا قطعت الجدول راح ينزل وزنك لعدم توفر البروتين

[King Of Coffee]

هالمسألة نقاشها كبير ولا ينتهي والكلله وجهة نظر تجاهها ..

عن نفسي ما أستخدم البروتين البودر إلى مرة أو مرتين بالسنة , ولكني أعتمد على الامينو ( 4 مرات بالسنة وأحيانا أقل ) والغذاء .

بإختصار مخصص ميزانية من الراتب للغذاء فقط ... ..


شكرا على الموضووووووع الجمييل

[الناعسي]

سالت المدرب مره عن المكملات ووش الفرق بين الشغل الصافي مره والشغل بمكملات

قالي المكملات تختصر عليك الطريق بس
بينما التمرين مع الاكل الطبيعي الصحي بشكل يغطي احتياجك يخليك كانك تنحت في الصخر صحيح بتاخذ وقت طوييل مره حتى توصل للتي تبي بس اذا وصلت لهدفك وبالمحافظه على تغذيه سليمه ما راح تفقد اللي حصلت عليه

[متعطش]

عليكم السلام ورحمه الله وبركاته، وعيدك مبارك وعلى المسلمين والمسلمات أجمع،

مايبغالها ذكاء ماهي كيمياء ولا رياضيّات،
لأن بالمكملات توفي حاجة جسمك من : الكربوهيدرات و البروتين والدهون والفيتامينات والمعادن، .. وهذا مثل مانعرف صعب على الواحد يوفرها في أكله اليومي،
( والعضلة بدون غذاء زي النفيخه بدون هواء )

[ولد ابوظبي]

على حسب الجسم ..
يعني عن نفسي أنا لما أوقف البروتين .. وزني ينقص 2 - 3 كيلو وأنا مغمض .. لان جسمي ناشف وعضل .. فمن الصعب اني احافظ عليهم .. الا اذا وفرت نسبة بروتين كافيه ..

وطبعا .. تمرين + تغذيه من الاكل او المكملات = بناء عضل ..
واذا لم توفق في واحد .. طبيعي انه العضل ينقص

مجرد وجهة نظر ..

وما أنسى .. ياليت اذا تقدر ترفق هذه الكتاب الي تقول عنه .!!.

مكملات = عضلات كاذبه .. !!