الام اسفل الظهر

[عبوديفتش]

معلومات المتقدم بالاستفسار :
العمر : 23 , الجنس : ذكر

الطول :181 متر
الوزن : 83 كيلوجرام

نسبة الدهون : 16

و الاستفسار كالتالي :
السلام عليكم

ان شاءالله انكم بخير ...

ياشباب انا الحين اكتب لكم .. وانا محبط .. محبط جدا وخايف
قبل فتره بديت احس بالام باسفل الظهر اذا ركعت ويمتد الالم الى فخذي اليسار ..
طنشت السالفه .. اقدر اركع واقدر اتحمل الالم عادي ..وقلت كم يوم ان شاءالله ويروح .. لكن ماراح
دخلت ابحث عن مشكلتي بالنت ... اقرب الاحتمالات انها انزلاق غضروفي
وان العلاج يستلزم في بعض الحالات راحه قد تصل الى 6 اسابيع
كلكم تلعبون حديد وتعرفون وش يعني توقف غصب عنك 6 اسابيع
يعني ماحد راح يحس فيني كثركم ..
يعني كنك تقول لواحد يدخن لا تدخن
مدري شلون اشرح لكن ماتقدر تترك شي تحبه وعاده تسويها
انا لو مر يومين مارحت الجيم مارتحت واحس شي ناقص
اه بس

وش اسوي في ال 6 اسابيع هذي ؟؟
وكل اللي قاعد ابنيـه واللي ناوي اوصله .. راح اهدمه في الست اسابيع هذي ...


كلموني بصراحه وش راح اخسر في ست اسابيع ؟؟
و نظام تغذيتي ؟؟ مكملاتي اقطعها او استمر عليها ؟
فيه تمارين خفيفه اقدر أأديها؟ ودي اكون بالصاله
واللي مر بهالمشكله يعلمني تجربتـه ...

وانتبهوا لانفسكم ..واحرصوا على اسفل الظهر ..



فيني قهر واللـه ... لكن ان شاءالله تصير اصابتي ماهي انزلاق اي شيء ثاني ...

[u turn]

‘

الله يهديك هالحين انت شخصت حالتك انها انزلاق وحطيت لنفسك راحة 6 اسابيع

وصرت تفكر وش راح تخسر وش مصيرك و و و و لييييييش ؟

هونها وتهون وان شاء الله انها اصابة بسيطه وتزول ، بس كل ما عليك انك تراجع دكتور وتسوي اشعه وبعدها تريح لك كم يوم وان شاء الله ما تشوف شر

على فكرة ترى ألم اسفل الظهر مشهور حتى عند الناس اللي ما يمارسون رياضة يعني لا تخاف

[عبوديفتش]

^
^
^
^
ياخوي الله يجزاك خيـر
بس انا اسأل لو وقفت 6 اسابيع بخسر كثير او لا ؟


وبالنسبه للتشخيص ...لان نفس الاعراض
ماقدر اركع .. ماقدر اجلس وامد رجولي واحاول امسكها الا بألم
الألم اذا ركعت احس فيه يمتد ال ىفخذي زي الكهربـاء ..
واي دكتور مبدئيا ب يقول لي انلاق .. ان شاءالله يارب انها ايشي ثاني ويروح يارب ..



بس عطوني جوي كلموني وش بيصير ؟

[الناعسي]

ههههه ابشر بعزك خلني اعطيك على جوك

اللي بيصير هو ان وزنك بيطلع للميه وفوق ذلك بيصير شكل باااايخ يعني مهوب مثل الناس اللي متين لكن شكله رزة لالا انت بيصير شكلك غلط واذا رجعت بعد 6 اسابيع هذي اذا كانت 6 اسابيع مع ان الظهر يحتاج اكثر وهذا شي اكيد
اذا رجعت ماعاد تقدر تشيل ولا حتى 5 كيلو دنابل وزين اذا قدرت تروح للصاله هههههههههههههههههههههه

يا ابن الناس انا قطعت شهرين السنه اللي راحت عشان الاختبارات النهائيه قبل الصيفيه 8 اسابيع ماهيب 6 ولا صار ولااا شي ولا شي بتاتا وزني ما زادي , ترهلات ما صارت , كل اللي صار ان النفسيه شوي طفشانه ويوم رجعت للصاله لعبت شامل اسبوع وسويت جدول جديد ومشى الحالي وبدت اوزاني تطلع من جديد ووصلت للاوزان اللي كنت اشيلها قبل لا اقطع خلال شهر واحد بس

والحين عندي اصابه في اسفل ظهري لكن مريح عمري من ناحية تمارين اسفل الظهر الديدليفت ما العبها لي شهر ونص وداخل على شهرين واذا لعبت ظهر العب من النص وطالع لاعلى الظهر واوزاني طالع في الظهر دايم اكسر اوزان الظهر ومااشيه اموري

عندنا مثل هنا في الجنوب يقول ( كسر شداده وارنبه في الهشيم ) هذا يقال عن الشخص اللي باقي ما سوا شي او باقي ما صار له شي وشايل هم وش بيصير في حالة حدوث هذا العلم

الدنيا بسعه الله يخليك لشيبانك ريح بالك وادع الله في العافيه والفرج
اسال الله ان يفرج همك وهم المسلمين اجمعين

[العاشق M]

ماقصرو الاخوان
بس قبل كل شي روح للدكتور مختص وخليه يعلمك على كل شي
اذا كان ماعندك لامرض ولاشي يعني سليم بس تشنقات وتروح
على طول حاول انك تلعب تمارين اسفل الظهر
وراح تشوف النتائج
وبنسبه للتوقف صحيح يصير ترهلات بس اكيد راح يخف العضل وسبب الالياف