كنت معزوم ليلة الجمعه الماضية على سطح الفيصلية ( على براد شاهي أبو أربعه طبعاً ) يوم رقينا على السطح لقينا العالم متجمهرة والهليكوبترات والكشافات أم مليون شمعه يؤؤ يؤؤ وش السالفه ؟؟
أول ما صادفت فرقة آثار يحققون .. سألت المسؤول عنهم ( كان لابس بدلة ورتبته جندي أول ) وش صاير ؟؟ قال بأعطيك السالفة لأن شكلك إنسان فاهم هذولي شلة قراوا مدري كيف تسللوا على سطح الفيصلية ( الإحتمال القريب إنهم نقزوا من السطوح المجاورة لها ) المهم إخواننا في الله طقوا قرعه وقسموا فريقين وصاروا يلعبون كوره بقارورة ببس حجم عايلي ويوم حما اللعب جاك واحد منهم مشـّوت وصلف طبلونه ومطفي النور بعد .... والكوره ( اللي هي الببس حجم عايلي ) مرتدة من كورة الفيصلية ويبي يشوتها على باله هدف ذهبي ... مدري كيف زلقت القاروره وصارت الشوته على كورة الفيصلية ... إلى الآن والوضع عادي لكن نشب أصبع رجله داخل كورة الفيصلية من قوة الشوتة ( قروي وقارورة وشوتة بوز ) جوا الشباب فازعين وهات يا محاولات يطلعون أصبعه بالشد وبالقوة لكن لا فائدة ... واحد منهم فتح الله عليه وقال : هاتوا زيت فرامل ( جابوه طبعاً من أقرب مطعم ) صب هالمفكر ( إنيشتاين على غفله ) زيت الفرامل وصاروا يبرمونه مثل اللنبة القلاووز لين طلع سليم معافى ... وكورة الفيصلية لحد الآن بحجمها الطبيعي وما صار فيها شي ... جا خكري بالصدفة يبي يتفرج في محل الشوتة ويفحصها بيده .. وفجأه .. فسسسسسسسسسسس ... نسمت كورة الفيصلية وإنفشت وطاح الخكري مغشي عليه وكلها أقل من ربع ساعه ألا وكورة الفيصلية منفشة تماماً ومتجعدة كأنها خدود أولبرايت معلوجه من عنز أسنانها مسوسه
الخكري إنتقل إلى رحمة الله ... والقراوا طاروا في الهوا من شدة تنسيم الكورة وفقط عثروا على واحد منهم في فيتنام وحنا هالحين نحقق في قانونية ترخيص لعب الكورة فوق سطح الفيصلية ....
من نتائج إنفشاش كورة الفيصلية ما يلي :
- الخكري يوم توفى مهوب من تأثير الهوا أو من شعوره بالذنب إنه هو اللي فش الكورة ... توفى لأنه شاهد بقايا من أظافر القروي لاصقه في محل الشوتة فما قدر يتحمل هالمنظر البشع المفزع
- إحساس كثير من رواد الفيصلية الدائمين بالخفة والسعة ... أحد أصحاب المحلات يقول : يخوي كنت أحس إني شايل طياره جمبو فوق راسي وهالحين الله يجزى هالقروي خير اللي خفف علينا
- تناثر عدد هائل وكبير جداً من السراويل والفنايل في شوارع العليا ( بل إن أحد الشريطية في معارض النسيم كان يحرج على سياره وفجأه سكت المكرفون ويوم ناظر لقى داخل المكرفون سروال ) والسبب الهواء الشديد اللي طلع من الكورة فبالتالي طير كل السراويل والفنايل اللي كانوا أهلها مشرقينها في البلكونات
- نفس الشريطي اللي في الفقرة السابقة يوم درى بالسالفه راح وتعاقد مع القروى على فتح عيادة تخسيس للسمان والدببه بحيث يجي المنتفخ ويأخذ وضع معين ويشوته القروى وما يطلع من العيادة ألا وهو أنحف من أهل بنقلاديش
أعجبتكم؟
منقوله من منتدى الإقلاع[تم تعديلها بواسطة MEL C في 12-02-2001 عند 10:19 PM]
