نقرور مشوي وعيش ابيض + خبز

[Karazhan]

السلام عليكم

شلونكم وشخباركم

هذا غدانا اليوم بتاريخ 11\5\2003

اتمنى من الاعضاء اللي حاب يرد عالموضوع ويبدي وجهه نظره في الطبخه ان ينتظر الى ان انتهي من وضع كافه الصور , ربما احتاج الى 3 مشاركات

طبعا الصور كانت كثيره جدا وحاولت اعمل تصفيه و احط الصور اللي تكون ضروريه لعمل هذا الطبق المتواضع

اتمنى انه ينال اعجابك

---

بدايه اشتري سمك نوع نقرور وهو مشهور عندنا بالكويت جدا ويضرب فيه المثل

مااسوي فيه شي الا اني اقصه من الظهر , من الرأس الى الذيل

هني بعد الغسيل

يمكن البعض يحوشه لبس بالموضوع

النقارير اللي بالصحن مو اللي قاعد ويطالعهم




افتح السمكه بهذا الشكل , من الظهر مو البطن





صوره اقرب





بالخلاط بصل و ثوم والكميه حسب الرغبه و العلبه فيها بقدونس و كزبره خضره مفرومين




شبنت





نحطهم مع بعض كلهم





صوره اقرب للنقارير , نفس ماقلت فقط قولوا للي تشترون منه السمك انه يشق ظهره و ينظفه من الداخل , لا يشيل الصفط , قولوله شوي مو مرق

عرفتوا النقارير الحين ايهم ؟ هذوله النقارير لا يصير لبس عليكم





هذي نسميها بالكويت صباره , مدري اذا اهل الخليج مثلنا , تمر هندي مثل ماهو مكتوب عليها

نحط ربع الكيس بالجدر الصغير هذا و ضيف ماء , اذا ماتعرف قياس الماء لا تحط كميه كبيره بالبدايه , اول شي حط على ربع الكيس مقدار نص كأس , قلاص جبن طبعا

اذا ماتشربون الماي بقلاص جبن , اخذ استكانه شاي او فنجالين قهوه مقدارهم ماء وحط عليها و اقعد افغص فيها كأنك تعجن العجين , افغص لين تطلع العصاره كلها ويبقى البذر مالها و ارميه

لما تشوفها ثقيله حيل حط ماي شويه بعد لين تصير خاثره





بعد ماتخلص من التفغيص صبها على الحشوه اللي عملناها





ضيف على الخضره والصباره بهار سمك





لومي





كركم





بهار مشكل و ملح الليمون





كزبره مطحونه و كمون





اخر شي احط كزبره مطحونه خشن و تلاحظونها بالصوره , مو مهم لأنكم حطيتوا كزبره مطحونه مسبقا

---

للحديث بقيه

[Karazhan]

نتابع الموضوع من جديد و اللي نحتاجه لعمل هذا الطبق المتواضع

---

نحط ملعقه زيت , زيت ذره انا حاط , العادي





نذوقها اذا الملح مضبوط والمكونات مضبوطه

طبعا لما ذقتها بجيت من حلاوتها و ايضا الملك ذاقها و قعد يلطم ومازال وانا اكتب هالموضوع يلطم المسكين من حلاوتها

طبعا اهو المصور





نحط ملعقه صلصه الصويا






هذا صراحه مااعرفها شنو , لكن المؤكد انها زيت السمك ومعاه نكهات , صلصه حاره و على شكل زيت و الصوره اللي عليها سمكه نفس السمكه مالتنا و مفتوحه نفس سمكتنا ايضا

صلصه لذيذه و حاره , طبعا اختياري مو لازم اذا غير متوفره







بعد ما حطينا كل شي و بالملعقه حسنا المكونات هذي النتيجه

وانا اقولكم "اوكي"






نفتح السمكه و نرشها بالملح

كميه وافره من الملح


وافره وافره من الملح

لا تستهينون على بالكم رشه بسيطه , شفتوا ايدي ؟ كانت متروسه ملح

شوفوا العلبه , ربعها طار عشان املح السمكتين , من الداخل والخارج

من الداخل اكثر






نرش بهار سمك عليهم من الخارج





نفتح السمكه و نحشيها بالخلطه السريه

كنت استعمل الملعقه "يعني ذرب" لكن رفيجي قالي يبا استعمل ايدك






وله ما اراد

نحشيها بالبدايه نحط كميه و نحاول نوصل الحشوه لكل الاجزاء الداخليه






من فوق و تحت و من الراس الى الذيل





اهني احاول ادخل ايدي للمخ عشان احشيه

بالعربي لاتخلي مكان الا وتحوشه الحشوه






نحط شرائح الليمون





انتوا معاي ؟

اوكي كل شي تمام ؟





نحشي الثانيه بعد

يعني مثلا نحشي وحده وننسى الثانيه ؟

الملك يطردني





نحط الليمون , و لما نستعمل الحشوه نخلي ربع الكميه

مانستعمل الكميه كامله





لما شفت ان الكميه بعد ما حشيت السمكتين راهيه حتى لو اشيل الربع , كملت حشو السمكتين اكثر

لأن يااخوان ويا اخوات الطبق هذا بدون مرق , يعني عيش ابيض او خبز و سمكه مشوي , المرق يكون بديله الحشوه

يعني تاخذ من الحشوه و تحطها على العيش وانت تاكل مو تطبخ , و تاكلها مع السمك , افضل من المرق

هني زدت الكميه , السمكه بتنفجر





زيد الحشوه شنو ورانا





الكميه الباقيه من الحشوه اللي اهي الربع ناخذها ونمسح فيها السمكه من الخارج

هني جرحت نفسي و صورت الجرح





نحط القصدير عليها و مانسكرها 100%

بس 50%

وايدي مجروحه هني اللي ماسك فيها القصدير

والله اني مسكين





نحطها بالفرن و شوفوا رأس السمكتين مبين , يعني ما نغطيهم 100%

مجرد نعزل الحراره المباشره من النار اللي فوق بالفرن

طبعا نشغل النار بالفرن اللي فوق وتحت

مالكم شغل بالجوله "الموقد" شكلها سكراب ادري لكن عليكم بالجوهر , لاتغركم المناظر اهم شي القلب

والقلب فيه نقارير محشيه

---

لنا عوده سريعه

[Karazhan]

رجعنا لكم لأستكمال باقي الطبخه

عسى بس ما مليتوا من كثر الصور والكلام

حاس فيكم لكن شسوي , مضطر احط خطوه خطوه

---

هذا الجرح من الزعنفه اللي بالظهر , وانا امسحها بالكميه المتبقيه من الحشوه دخل بأيدي عود كان حاد

تشوفونه ؟ وين الخط اللي بالطول عاليسار

تصيره يساره شوي نقطه حمره




بعد ساعه الا ربع يعني 45 دقيقه تقريبا نفتح ونشيل القصدير و نخليها عالنار مباشره و نسكر الفرن





طبعا انا ما سكرت الفرن الا اخذ صوره بالفلاش اول





هذا العيش , طبعا معروفه طريقه العيش الابيض

لما يصير بهذا الشكل و تشوفون الفتحات بدأت تظهر نسكر الجدر مضبوط ونقصر عالنار اقل شي





جذي يعني نسكره بالقصدير و الغطا , مو مهم المهم ان يتسكر الجدر قدر الامكان ويترك على نار خفيفه 25 الى 30 دقيقه





هذي الصباره والبدليه عن المرق

هذي سويتها بعد ما عملت كل شي , حطيت صباره او تمر الهندي نفس الكميه و ضفت الماء نفس ماقلت مسبقا وقعدت افغص فيها لين طلعت روحها و طلعت العصاره كلها

حطيت عليها فص ثوم مفروم و فلفل احمر حار ملعقه تقريبا و حسب الرغبه اللي تبيها انت , فلفل المطحون طبعا يباع جاهز بالجمعيات او انت تشتري فلفل الاحمر وتطحنه بالبيت

و شويه كزبره مفرومه مو واجد , اللي تشوفونه بالصوره





بعد ساعه طلعت السمك , مو يعني اول شي 45 دقيقه وشلت القصدير وبعدين ساعه و طلعتها , لا

الوقت كله ساعه , 45 دقيقه منها كنت حاط القصدير عالسمك و بعد 45 دقيقه شلت القصدير و خليتهم بالفرن 15 دقيقه

يعني المجموع ساعه , وحسب السمك يااخوان , اذا كبير يمكن ياخذ ساعه و ربع

واذا صغير يمكن 45 دقيقه

انا اللي عندي خليتهم ساعه

ليش بالشوي ما نشيل الصفط ؟

تعرفون شنو الصفط ؟ الصدف اللي عالجلد اللي تشوفونه محترق

احنا نسميه صفط

هذا الصفط بالشوي محد يشيله لأن يحمي اللحم من النار ويحترق اهو ويبقى اللحم خلفه طري و ابيض

يعني لا تتضايقون اذا سويتوا سمك مشوي واحترق من الخارج , اهو لازم يحترق جذي





هذي النهايه

عيش ابيض وصباره و سمكتين مشويات

وتلاحظون السلطه

للأمانه : الملك اللي سوى السلطه

كالعاده





هذي السمكه من الداخل

لحم طري و حشوه تفتح النفس

---

انتهينا ولله الحمد من عمل هذا الغداء المتواضع

كان ودي انتوا معاي و تاكلون معانا , فشله نسوي اكل ولا نعزمكم عليه

سامحوني ياجماعه كان ودي اعزمكم واحد واحد

اتمنى ان عجبكم النقرور المشوي و اذا في اي ملاحظات اتمنى تقولولي عليها

مثل ماقلت سابقا , ما طبخت عشان اتحدى ولكن هوايه احب امارسها . ان كان في خلل او غلط بالمكونات او الطريقه اتمنى تقولولي عليها او اي استفسار بخصوص هذا الطبق ايضا لا تترددوا بسؤالي عنه

دمتم بود اخواني واخواتي

[Blue Rose]

السلام عليكم

تسلم اييييدك اخي كرزان على الموضوع اللذيييذ

فعلا وصفتك لذيذه و البهارات ممتازه للسمج

يعطيك العافيه ع الموضوع الرائع ^ _ ^

[Karazhan]

وعليكم السلام اختي الفاضله بلو

الظاهر ان الشباب مو اهل سمك هني وانا مني ورايح ماراح احط موضوع ان كان سمك

الشباب يقولون هالاسبوع نبي زبيدي , قلت اذا صار زبيدي فعلا ماراح اصور واحط لأن اما ان اعضاء المنتدى مايحبون السمك او انهم زهقوا من السمك

بشوف اذا شي ثاني نسوي هالاسبوع او سمك , المشكله ان السمك كل اسبوع نسويه يوم الجمعه


عموما شكرا على كلماتج الرقيقه و مرورج العطر اللي عطر موضوعي المتواضع

[ام ابـراهيم]

الله يعطيك العافية
بس أنا أفضل سمك يكون بالبهارات و زيت و ليمون فقط .

[FinalFantasy9]

يا ويلي ويلاه .. وشله عوار القلب بنفسي جوعان توني راجع البيت مب متعشي ..

المره الجايه صغر حجم الصور شوي ترى كل صورة 500 كيلو وايد .. افتحها بالفوتوشوب وسوي save for web علشان تسهل التصفح .

الله يخلي هالانامل الذهبيه :] .. يعطيك العافية .

[Karazhan]

يااهلا وسهلا بالحاضر الغائب الغائب الحاضر

شكرا على الكلام الجميل من شخصك الاجمل

بخصوص الصور وبما اني جاهل بالامور هذي ماعرفت شلون اضبطها الا اني اخر موضوع حطيت صور صغيره واللي من ترفعها للمنتدى تكون صغيره و دبل كلك تكبر . اكتفيت بالشي هذا عشان الثقل اللي حصل معاي بالمواضيع اللي قبله

وانا خلني اتعلم على برنامج التعديل اللي عندي بعدين اروح الفوتوشوب , مااعرفله مثلك يوم تحط صوري حارس شخصي حق احمدي نجار و بشار الاسد

لكن الصور الصغيره عدلت الوضع شوي


وبما اننا رجعنا لموضوع النقرور انا بقول شي بالموضوع هذا , ترى الحشوه اللي حطيتها في بطن السمكه مبالغ فيها امانه , يعني النقرور و السبيطي وغيره من الاسماك هذي يكفيها تحط حشوه مثل اول الصور الخلاط فيه طماط وبصل وثوم و تضيف عليهم كزبره و شبنت وتضربهم بالخلاط و تدهن فيهم بطن السمكه وينتهي الامر


فهمتوا علي او لأ

يعني طماطتين + بصل وثوم + شويه كزبره و شبنت و تضربهم بالخلاط و تمسح بطن السمكه وهذي تكفي للنوع هذا من الاسماك طبعا تحط ملح و بهار سمك علي الصلصه اللي تطلع معاك و كزبره و شبنت مفرومين خشنين او على عدالهم و تمسح بطن السمكه و تسكرها

انا حطيت صباره كمبالغه و زياده دلع و فخفخه

والحشوه اللي انا حاطها اهي حشوه الصبور , تعرفونه الصبور ابو شوك واجد , هالحشوه للصبور وغيرها ماينقاله صبور مشوي , سبحان الله , من غيرها مايطلع مثل ماتبي

المهم ان الحشوه هذي عامه للسمك و مخصوصه للصبور , وغير الصبور تكتفي بمثل ماقلت من الحشوه البسيطه لكن كل شي يمشي


و شكرا مره ثانيه عساكم عالقوه

[JennyKewly]

I join. And I have faced it. We can communicate on this theme.