شوفوا يا طوال العمر البنات نوعين من ناحية الاسماء ... فيه اسماء منيب اواطنها بس تراهم دلع تتعب وانت تقول حنان زايد فيهم .... النوع الاول اللي اساميهم كنك تاكل علك وانت تقولها ... مثل ديمه ودلال وهنادي وافراح وتهاني ومايطلبه المشاهدون ... المهم هذولا اثقل عليهم يجونك ركض .... بس العله في النوع اليابس ( الخماسي المرح ) ... ( نوره ... ساره ... الجوهره ... منيره ... حصه ) هذا النوع صعب انك تحتك فيهم يبيلك قوه فيسولوجيه اما النوع الاول مايحتاج منك قوه فيسلوجيه يعني ( تحتاج للنوع الاول فسلوج صغير مع شوي نصب مقلم بالضحك تستحوذ على ذا النوع ) .... والنوع الثاني شي واحد يمديك تستحوذ عليهم فيه ... انك تدلعهم لان اسمائهم مغبره شوي واذا دلعتهم يحسون انهم في عالم ثاني ... وينجذبون للنوع الاول ويصير سهل عليك الاستحواذ
نرجع للخماسي المرح اللي هو ( نوره ... ساره ... الجوهره ... منيره ... حصه ) .... الملاحظ على جمال هذه الاسماء انها تنتهي بتاء التأنيث ....
وبالنسبه للدلع حق اسماء الخماسي المرح هو : .. (( نوير .. سوير .. جهير .. منير .. حصير) .... الملاحظ على جمال هذا التدليع انه ينتهي ( براء التدليع الساكته ) ... نوع من البنات تجيك ( رسميه ) يعني لو بتقولها وش اخبارك ... بتقول لك احترم نفسك قلي كيف الحال لاتسالني عن اخباري هذي حياتي الخاصه انت مالك دخل ... يعني بتعطيك محاضره عنوانها ( لاتقل وش اخبارك ) .. همن تصقعك بلوك ( حظر ) ... ومن زود الرسميه اللي فيها بعض الاحيان لين قلتالها اهلين قالت انا منيب اصغر عيلانك قلي هلا وبس اهلين مانعرفها وفيها شبهه ... ( وش الشبهه يرحم امك تبين نقولك اهلين يااختاه ) .... المهم هذا نوع وخلصنا منه فيه نوع ثاني ... ( المصلحجيه ) .... هذي مهيب تسلم عليك الا فالشهر مره ( واجد فالشهر مره ) ... او بالاصح اذا عندها موضوع كاتبته فالمنتدى وتبيك ترد عليه ... بتجيك وتقول فلان حبيبي .. اقولها هلا والله عاش من شافك وين الناااس من زمان عنك .... بتقول والله اختبارات وغثا خلها على ربك ياحياتي .... ( ياحياتي وين اصرفها لو قالتها ذيك الرسميه ... يمدحون بنك المصلحجيه بس ) ... عاد انا متعود على هالحركات اطقها في وجها اقولها ... اها اخلصي وش عندك وش جايه تبين ..... مايمديني اقول لها هالكلمه الا صاكه اللنك في وجهي .... واللي احلى من هذا .. تقول تصدق اني كاتبه الموضوع فيك ( ياروحي ماغديت التمساح صرت ريكي مارتن ... مير انا احلى منه ... تقاطيع وجهي ازين ... قل ايه بس ) ... والزبده كلها رد على موضوعي وبس ........ وهذا نوع هالحين خلصنا من الرسميه والمصلحجيه .... فيه نوع رهيب يعجبني اللي هو( المنسمه ).. تجيك وحده فاقده ... حاطه عقلها في شنطة الجامعه وجايتك .... وهذي لو اشرح لك ماوفيك حقها تخلي لك الماسنجر ولا مسرحيه " شاهد ماشفش حاقه "
وفيه نوع ( العاقله ) ... من زود ركادة العقل فيها لين ضحكت تضحك كذا ههههههههه . < - - - تحط نقطه في اخر ضحكتها ( يعني مجرد موقف ضحكت عليه لاتحسب اني مستانسه على سواليفك ) .... ولين قالت شكرا مهيب مثلنا نقول شكرن لا هي تحط التنوين الطامره فوق الحرف مثل كذا ..( شكراً ) .... وفيه نوع ( الدببه ) هالنوع يابو الشباب.. ماتدخل فالشهر الا مره ... وكل سواليفها وشلون امك عساهي طيبه .. وتسولف معك وبرايفتها الثاني مع ستيف وطقته .... وفيه نوع ( مدري وش تبي من الدنيا ) ... تستهبل وتلعب بمشاعر واحاسيس الشباب واخر شي انا كنت امزح وربي امزح ( منتب هين يالتمساح تعرف مشاعر ومساحيت مدري احاسيس ) .... المهم خلصنا من شرح الشخصيات نجي في الاهم بعد التعرف .... ( على طاري شخصيات ... ترا البوكيمون حرام انتبهوا لاياكلون منه عيلانكم ) .... اذا كانت البنت معك وحاطه ( مشغول اوبزي ) .... اعرف انها تكد شعرها ولا انها تهاوشت مع اختها من اللي يلبس البكله الخضرا اليوم .... واذا البنت حاطه ( سأعود حالاً ) ... اعرف انها قاعده تاكل بس مستحيه تعلم ... ولا اكيد انها راحت ( ؟؟؟؟؟؟ ) .... واذا البنت حاطه ( بالخارج او آوت سايد ) ... اكيييد انها تقصقص ضفورها ولا امها وراها تدهن شعرها بزيت زيتون ولا دابر ... وحدتن منهن ماشميت الريحه زين .... واذا حاطه ( على الهاتف او اون تيليفون ) ... يعني لاتفكر ترقمني تراني اكلم خويي ... ( والله التفسير الاقشر ) ... واذا حاطه ( بالخارج للغذاء ) .... فعرف انها قاعده تغير ملابسها وتبيك تستحي على وجهك وماتكلمها .. لانك اذا كلمتها بتقول اكيد انه جوعان ولا بينظلني فالواحد بيستحي ويسكت ( يالبنات اذا انتم مشغولين حطو بالخارج للغذاء تراهي اصرف من مشغول ... تراي اعرف العيال يستحون لين شافوكم تاكلون ... ) ....
منقول
.... 
وش مهنتك؟!
