أنشف وإلا أضخم ؟؟
استخدم بروتين قينر والا بروتين تنشيف ؟؟
من أصبحت عضو في هذا المنتدى الراقي هالسؤالين أكثر سؤالين واجهتها
حتى في النادي
وأكثر من يحتار هو المبتدئ واللي صارله كم شهر يلعب
والسبب هو أنه إلى الآن هدفه مو واضح بالنسبه له
سبب كتابتي للموضوع هو أننا ( وأنا منهم ) نرد على اللي يسألون هالنوعيه من الأسئله على حسب اللي نشوفه صح
فنشوف موضوع فيه 10 ردود مثلا وكل رد أعطى رأي !! فيتشتت صاحب الموضوع !
وفي الواقع ان الجواب على هالسؤال هو عند صاحب السؤال مو عندنا
طيب كيف ؟؟
ببساطه هذا جسمك.. أنت اللي ترسمه وأنت اللي تحدده على مزاجك
في البدايه بنوضح كم شغله
مكملات التضخيم: تضخم جسمك عن طريق البروتين والدهون
مكملات التنشيف: تضخم جسمك عن طريق البروتين فقط ونسبة الدهون فيها جدا بسيطه
عشان كذا لازم توضح مسألة انه في الأخير هالإثنين بيحصلون على نفس المكسب العضلي والفرق فقط ان الأول حصل على كمية دهون تعطيه "شكل" الضخامه لكن إذا عمل تنشيف بيظهر وكأنه ما أستخدم مكمل قينر
ومكملات التنشيف هذي مو غرضها حرق الدهون لا. المقصود أنها ما تزيدك نسبة دهون وهي تستخدم وقت التضخيم العضلي الصافي ووقت التنشيف
وبنوضح شغله ثانيه
أحيانا يجي شخص جدا نحيف مثلا
وزنه 50 وطوله 170
هذا يحتاج كمية دهون لتصحيح جسمه قبل لا تكون ضخامه
شخص ثاني سمين
وزنه 90 او 100 كيلو وطوله 170
هذا يحتاج "تخسيس" في البدايه
لأنه حتى وإن حاول تضخيم العضله فما راح يظهر معاه أي شي بسبب كمية الدهون الكبيره في جسمه
الآن نبدأ في الأهداف
هل هدفك بروز بسيط للعضله وجسم مقسم وناشف ؟
إذًا أنت تحتاج مكمل بدون دهون ( ومو شرط تاخذ مكمل ) وإذا كان فيك دهون فأنت تحتاج تنشف في البدايه وتخسر كمية الدهون اللازمه اللي توضح تفاصيل العضله وعضلات البطن ولازم تحافظ على نسبة الدهون البسيطه علطول لأن موضوع الضخامه ما يهمك وكل اللي تحتاجه هو المحافظه على "تقسيم" جسمك وهالشي يكون بالإبتعاد عن الدهون كوسيلة تضخيم
هل هدفك تضخيم لكن بعضل صافي وبدون دهون حتى لو أخذ منك وقت طويل ؟
يظهر جسمه دائما بدون ملابس بمنظر جميل وما يحتاج يدخل كورس تنشيف كل فتره، مثل هذا الشخص يحب يشوف جسمه وهو مقسم ( مثل المثال الأول ) لكن بنفس الوقت هدفه الحصول على ضخامه عضليه صافيه عشان كذا هالشخص بتكون مهمته صعبه .
إذًا انت يهمك وضوح تفاصيل العضله بالإضافه إلى تضخيمها عضل صافي بدون دهون وهذا معناه أنك تحتاج مكملات بدون دهون والأهم من هذا تحتاج نظام غذائي دقيق تكون كمية الدهون فيه قليله جدا وكمية الكارب والبروتين محسوبه بالضبط عشان ما تزيد ويتحول الفائض منها لدهون.
هل هدفك تضخيم بدهون ولا يهمك تحديد العضله او الكرش ومستعد للتنشيف بعد كل فتره ؟
مهمة هذا الشخص تكون أسهل بالمقارنة من المثالين الأولين من ناحية أنه ما يفرق معاه إن كان هذا الأكل يحتوي على كمية دهون كبيره وإلا لا
يهتم صاحب هذا النظام للحصول ضخامه سريعه (حتى لو كانت من الدهون) ويعطي جسمه منظر رائع من فوق الملابس
لكن مثل ما لهذا النظام من ايجابيات من ناحية الراحه في الأكل والحصول على ضخامه سريعه فله سلبيات مثل احتمالية الحصول على كرش ( احيانا نشوف مدربين بكرش ) تحتاج كورس تنشيف كل فتره وهذا يؤدي غالبا لخسارة كتله عضليه
شكل الجسم من تحت الملابس ضخم لكن بدون تفصيل
إذًا في الأخير الضخامه في مثل هذا النوع هي ضخامه مؤقته توضح حقيقتها بعد التنشيف
إضافة نسيت أذكرها
* كن حريص فأغلب من لا يهتم بإكتساب الدهون ترتفع عندهم نسبة الكوليسترول الضار والدهون الثلاثيه في البطن لمن لهم كرش وهذي لها أضرار خطيره
* مو كل من اتبع هذا النظام يحصل على كرش
* حاول دائما نسبة الدهون ما تزيد عن 25 % وبعدها ابدأ في التنشيف عشان لا تتورط بنسبة دهون كبيره
* يفضل هذا النظام للاعبين المبتدئين أو للي ما يعرف يحط له برنامج غذائي موزون او للي عارف نفسه أنه ما راح يمشي على برنامج غذائي موزون من ناحية الكارب
فيأخذها من ناحية تزيد ولا تنقص
فيه سلبيه لازم لها توضيح اللي هي مسألة طول مدة التضخيم بالنسبه للي يضخم بدون دهون
دائما ما نسمع انه اذا بتضخم بدون مكملات قينر بهذا بيتطلب مده طويله
كجواب سريع بهو نعم لكن كإجابه دقيقه فهي لا
في الحقيقه لو نقارن ما بين لاعب يهدف الى التضخيم بدون دهون (مثال2) وآخر يهدف للتضخيم بدهون (مثال3) وهم لعبو نفس المده وقام الأخيره بعملية تنشيف راح نلقى في الأخير أنهم حصلو على نفس الجسم !!!
بل في نقطه لصالح (مثال2) وهي انه استغل فترة التنشيف في عملية التضخيم وجنب نفسه خسارة الكتله العضليه أثناء التنشيف
لكن أيضا في نقطه لصالح (مثال3) أنه أعطى جسمه حاجته وأكثر من الكارب اللي يغذي العضله عشان كذا هو ضمن وصول الحد الأدنى على الأقل من حاجته للكارب بعكس (مثال2) اللي قد يقصر في تناول كمية الكارب اللي يحتاجها
الآن بعد ما وضحت بعض الأمور وذكرت السلبيات والإيجابيات
عزيزي لاعب بناء الأجسام
أنت من يحدد هدفك وأنت من يحدد شكل جسمك وأنت من يحدد خطتك التدريبيه
مهما حاولت الحصول على رأي موحد في هذي المسأله عمرك ما راح تلقى
لأن ببساطه هذي مو قاعده عامه ولا هي قانون يجب إتباعه
هي رغبه وكل واحد يعطيك رغبته
مافي أحد يقولك ضخم بعدين نشف
أو نشف بعدين ضخم
أنت اللي تحدد هدفك
وبعدها تقدر تسأل أهل الخبره وأصحاب التجربه عن طريقة الوصول للهدف
