اولا السلام عليكم ورحمه الله وبركاته
هذي اول مشاركه لي في منتدى اللغه الانجليزيه وحبيت انها تكون تشجيع و نصيحه للي يعاني من ضعف
لغته الانجليزيه.
في البدايه احب اذكر قصتي مع اللغه الي بصراحه مرت فتره بحياتي كرهتها من الخاطر.
انا يوم كنت في الاعداديه , كانت علاماتي ممتازه تقريبا في كل المواد ما عدا الانجليزي الي كنت خايف اجيب ال 50 فيها. خلصت الثانويه والحمد لله النسبه كانت عاليه بس لولا الانجليزي كنت بوصل التسعين
بصراحه ساعتها حسيت اني مدمر نفسيا.
دخلت الجامعه وتفاجئت انهم يريدون التوفل, شو التوفل؟ يالله لحقت اخلص الثانويه والحيت تبون التوفل!!
المهم حطونيFoundation year يعني بس اتعلم انجليزي من a to y تضحكون لا؟
المهم حسيت ساعتها اني غبييييييييييييي واني خلاص انتهيت وان الانجليزي ضيعت سنه من عمري هوا
لكن هالسنه كانت المفتاح الي صدق خلصلي عقده 12 سنه من الخوف والضعف. كيف وشو الطريقه الي تعلمتها؟؟ اكيد حاسين اني زوتها عليكم شوي لكن خلاص بقول شو الطريقه الي سويتها وخلتني مب ممتاز ممتاز لكن مكنتني من ان اجيب التوفل واكتب واتكلم بشكل جيد جدا.
اول شي يا اخي المعاني من اللغه الانجليزيه امتلك العزيمه ايوه العزيمه. تقولون شو يقول هذا بعد ماطفرنا بقصه حياته والحين يقول عزيمه؟؟؟
لا تفكر ان العزيمه سهله لا, من خبرتي شفت ناس كثير اشتروا كتب وقواميس وراحو وجاو لكنهم ماقروا الا صفحه وحده بس او حفظواكلمات معدوده بعدين نسو الموضوع كله وقاموا يتشكون ويستصعبون اللغه. لا يا اخي خلك ناوي تتخلص من المشكله وما تخلي نفسك مثل ما صار وياي وتضيع سنوات عمرك وانت تقدر من الحين. الحيين ابدا
ثاني شي , اقرا ثم اقرا ثم اقرا, اختار اي شي تحب تقراه مثل القصص او المجلات ولازم تعرف انك لازم تقرا الجريده الي بالانجليزي وانس الي بالعربي ولو بالتدريج يعني اليوم عمود بكره صفحه او نص صفحه و على حسب التدرج الي ترتاحله. كل ما قريت شي امسك القاموس(بذكر نوع القاموس المفضل لدي لاحقا) وترجم واحفظ الكلمات في دفتر ورددها عده مرات بصوت عالي ثم كمل القراءه, بتقول كيف يمكن انسى ولا ما اعرف القواعد ما عليك انت بس سوي الي اقولك اياه واقرا حتى لو ما عرفت القواعد في البدايه.
الحين اشتريلك او نزل من الانترنت كتاب حيالله كتاب عن القواعد واقرى عنه شوي وارجع اقرا, بتلاحظ انك فهمت بعض القواعد وانها اصبحت شي سهل عليك, ته على الطريقه وكمل لين ما تخلص القواعد. بتلاحظ شي ثاني انك مريت على كثير من الكلمات الي كتبتها في الدفتر ومن التكرار بتحفظها مثل اسمك. ملاحظه: اذا انت صدق قريت كثير وما مرت عليك بعض الكلمات هذا يدل على انها مب كثير مهمه ومب مستخدمه عند الانجليز. يعني لا تخاف اذا نسيت كلمات لانك بتشوفها مره ثانيه اذا كانت مهمه.
ثالث شي وهو الاستماع, لازم كل يوم تسمع شي من الخبار الانجليزيه او الافلام الي مب مترجمه وحاول انك تفهم, بتلاحظ مع مرور الوقت من القراءه انك بديت تلقط بعض الكلمات في الخبار وبعد فتره بتصير جمل لين ما تفهم 80 %من الكلام. استمر ولا توقف لان الطريق طويل
رابع شي وهي المحادثه, حاول تحصل او تكلم حد من الانجليز على المسنجر او اذا ماتقدر اتفق مع حد من اصحابك الي يعرف يتكلم لغه انه يتكلم معاك ولو ساعه في اليوم.. واذا ما حصلت على الاقل حاول تتبع وتتكلم ورا الاخبار او الفلم.
القاموس: نصيحه مني انكم تستخدمون قاموس اكسفورد الحديث -انجليزي, انجليزي,عربي- لانه بصراحه القاموس الوحيد الي شفته يترجم الكلمه بمعناه الشائع لاننا مثل ما نعرف الكلمه لها اكثر من معنى وبعض القواميس ما تساعدك على معرفع كيف تستخدع الكلمه بشكل صحيحا. وايضا يعطيك جمل تعلمك كيف تستخدم الكلمه . مثال: كلمه copyمعناها نسخ, لكن لو قلت i will copy this paperمعناها بيصير عند المدرس انك تيي تغش!!!
i want to make a photo copy يعني لازم تعرف ان الكلمه ممكن تستخدم في اماكن ومايصير تستخدمها في اخرى رغم انها تحمل نفس المعنى اذا ترجمتها بالعربي. شي اخير بعد, لازم تعرف كيف تقول الكلمه صح وانا صراحه استخدم قاموس ناطق لكن اذا ما تقدر في في القاموس طريقه تهجئه سهله للكلمات. احذر : لا تستخدم نرجمه القواميس الالكترونيه لانها ممكن تعطيك معاني جدا غلط او فرعيه غير مستخدمه وانا استخدم القاموس العادي في الترجمه والناطق بس اعرف كيف انطق.
في النهايه اختصر واقول ان الانجليزي ممارسه وليست ماده للدراسه مثل الرياضيات . وتوجد اكثر من مليون طريقه وانت اختار وهذي طريقتي .
والسلام عليكم ورحمه الله وبركاته. لا تنسوني من الدعاء اذا قررتوا تستخدموا طريقتي.
Laugh the Dereshishishishi way
مشاركة: نصيحه الي يريد صدق يتعلم اللغه النجليزيه
