اقترب موعد الرحيل
و قبل الرحيل اترككم مع المفاجأة اللي وعدتكم فيها
طبعا هذا النص كتبته قبل سنتين
و شاركت فيه كـ جزء من احدى المسرحيات اللتي قدمتها الجمعية العربية السعودية للثقافة و الفنون
يعني كان مونولوج قدمته أنا من كتابة و تمثيل
بالاضافة الى انه فيه مقطع غنائي بتلقون لونه بالأحمر
هذا كان من ألحاني و لكن للأسف دورت على التسجيل الصوتي منه بس مالقيته بالجهاز
اترككم مع ماكتبت ......
.
.
.
إرهـــ ـــــــــ ــــــابـــــــــــــــ
*** البداية ***
في بيت كبير ..
أبوي و أمي و أنا و أخوي الصغير ..
حياتنا مستقره ..
ما فيها شيء يكدر صفائها ..
أمي ربة بيت متميزة ..
و أنا طالب جامعي و أخوي طالب في الإبتدائية ..
و أبوي موظف في الدوريات الأمنية ..
عايشين عيشه هنيئه ..
.
*** المـوقــف ***
كنت برا البيت و رجعت ..
دخلت غرفتي و فتحت كمبيوتري ..
لقيت خبر عن مداهمة رجال الأمن لخليه إرهابية ..
وقفت لمده أتأمل .. وش كثر خطورة عمل رجال الأمن ..
و وش كثر الضرر اللي لحق بالوطن و المواطنين ..
و قلت : الله يقوي رجال الأمن ..
و يلهم أهالي الضحايا الصبر و يزيل عنهم الحزن ..
و في لحظه صمت دق جوالي اللي انفصل البارح ..
إلا هو صديق أبوي و اسمه صالح ..
رديت : هلا ..
قال : يا هاوي تعال أبيك ألحين بالمستشفى ..
أنا و أهلك هناك لا تتأخر ..
أخذت أخوي و رحنا .. و أنا أفكر ليش يبيني أروح له ..
و ليه امي معه ..
و ليه ما جاب سيرة ابوي ..
و اسئله كثير في خاطري ..
و قطع تفكيري أخوي ..
قال : تصدق اليوم أخذت أحسن درجة بالإنجليزي ..
أبوي واعدني بهدية ..
بس ماني معلمك ايش هيه ..
المهم وصلت المستشفى ولقيت الضابط ( صالح ) و أمي عند الاستقبال ..
قلت لهم : خير يا جماعة وش فيكم يمه وش بلاك ؟؟
قالت : ياولدي أبوك أنقتل في مواجهه مع الإرهابيين ..
قلت : لا يمه أنتي تمزحين ..
قالت أمي : شوي شوي لا يحس أخوك ألحين بشيء ..
و أنا أصرخ : أبوي أبوي
أبوي الطيب الصادق .. أبو الكرم والشهامةوالحكمة ..
أبوي رجل الأمن في هالوطن .. راح يحط بالكفن ..
حسبي الله على الإرهابين .. الضالين ..
و سمعني أخوي وقام يشد ثيابي و كأنه عرف ان ابوي مات و يصيح : وش فيه ابوي
تدري يا هاوي اليوم الصبح وصلني أبوي للمدرسة و قال :
إذا جبت أعلى درجة بلإنجليزي بيشتري لي جوال باندا ..
قلت له : ابوي مات مااات ..
قال : والله اليوم الصبح كان معاي..
و صلني للمدرسة بنفسه قالي بيشتري لي جوال ..
و بدأ أخوي في موجة بكاء ..
.
*** بـعـد عـدة شـهـور ***
وبعدها صرت أعيش في عذاب .. بعد فراق أبوي بدون أسباب ..
و بحكم إني بأسرتنا آخر العنقود .. صرت عكس القاعدة أو المثل الموجود ..
و ما لقيت من أقاربي إلا الجحود .. حتى الحبيب زودها عليّ بالصدود ..
أكيد بتسألوني و تقولون وين أصحابك ؟؟ ضحكتوني قالوا أصحاب ..
أنا عندي أصحاب بثمن
لكن أصحاب بوفاء للأسف أنهم ندروا وصاروا أندر من الندرة نفسها ..
للأسف هذي الحقيقة و مرها ..
ما عاد فيه أصحاب أوفياء .. أصحاب مخلصين .. أصحاب نسميهم أخوياء ..
وبعد ما مرت السنين و تخلى الكل عني ..
رحت لأحد زوايا غرفتي .. و ألقى ذاك الشيء اللي مخاويني طول عمري ..
آلة الكمان .. قلت أعزف أنغام ما فيني من أحزان ..
وبدون أي ترتيبات .. طلعت مني هالكلمات ..
(( أبوي تركني .. و أحبابي خانوني .. و أصحابي باعوني ..
قلت أدور على الحبيب .. لعل و عسى يكون من قلبي قريب ..
لكن المصيبة انه طلع اغرب من غريب ..
وينك يا أبوي تشوف حالي .. عقب فراقك يا الغالي .. وينك ياأبوي يا الغالي ..
وين أروح .. قول يا أبوي وين أروح ..
وين أروح .. عقب فرقاك ضاعت الروح .. ))
.
*** الـنـهـأيــــــة ***
وكذا انتهت أفراح هالشخص المسكين .. و راح يعيش حياته بنكد و حزن و ضيم ..
و في النهاية .. قبل المخرج ما ينـزل الشارة ..
أقول : الله لايوفق هالضالين المجرمين ..
والله يرحم كل شهيد للوطن .. والشاهدالتاريخ و الزمن ..
.
.
.
اتمنى انها اعجبتكم
لكم حبي قبل كلماتي
هاااوي
.
**
؟؟
