اريد ان اشتري هديه لأخي الصغير

[باريس]

اخوي في ثاني ثانوي .. وابغى اشتري له هديه .. جهاز العاب
وانا ماعندي خبره في هذي الامور ولا اعرفها
واشوف عدد الموجودين في هذا القسم 128

اخر جهاز اخوي اشتراه هو بلاي ستشين 2
وانا ابغى له جهاز نفس الطريقه وحلو ومبهر ويعني حق كبار مو اطفال

وكذلك وشو الالعاب اللي ترشحونها لي عشان هذا الجهاز

وياليت تعلموني كم سعره
ومشكورين

[rushin_911]

XBOX 360

بس غالي أظن الحين بالسعودية لو تصبرين شوي إلين ما يرخص سعره

أو إذا تقدرين تصبرين إلين ربيع 2006 بينزل البلاي ستايشن 3 ( أو كذا يقال ) بس أكيد أول ما ينزل بيكون سعره بعد غالي بالسعودية

[IRON]

Nintendo DS

http://www.montada2.com/forumdisplay.php?f=49

[Electro M]

ما ودك تتبنين اخو جديد ؟


عشان ما تنط علي اينجل
بالنسبة لجهاز العاب بمثل جودة البلايستيشن 2 في XBOX المتوفر حاليا باسعار مناسبة لكن الشركة اللي صنعت هالجهاز اصدرت قبل شهر جهاز جديد و صارت تركز اهتمامها عليه
و الخيار الثاني هو اجهزة العاب محمولة مثل ننتندو DS او PSP الي هو بلايستيشن محمول عليه العاب قريبة من العاب البلايستيشن 2

[Angel whisper]

ممم تقدرين تنتظرين الين ما البلاي ستيشن 3 تنزل ..

او اشتريله واحد من الاجهزة المحمولة اذا ما كان عنده ؟..

PSP من سوني ..

or DS from Nintendo ..

[7_Dark Soul]

انصحك بالـxbox 360 بس شوي غالي.....

او تتنظرين الى ان ينزل الـPS3

اذا كان يحب الاجهزة المحمولة....

الـDS...

اذا كان يبي المتعة الكبيرة في اللعب...(شاشة بالمس...مايكرفون...العاب رائعة و ممتعة جدا....الخ)

او

الـPSP

اذا كان يبي جهاز متعدد الاستخدام...و شبابي جدا..(العاب حلوة و رسم جبار....امكانية تشغيل الافلام عليه...تنزيل اصوات على الجهاز..الخ)

[Dr_X]

ما ودك تتبنين اخو جديد ؟

هههههههههههههههههههههههه و أنا كمان ...... خذي E-Mad و احصلي على Dr_X مجاناً

اختي العزيزة ... إذا كان يفضل جهاز منزلي ... فالجهاز الجديد المتوفر حالياً هو الاكس بوكس 360 .... من شركة مايكروسوفت... أو تنتظري جهاز جديد البلاي ستيشن3 من شركة سوني الذي سيصدر بعد عدة أشهر سواء قلت أو كثرت الذي يتميز بمعالج خارق.

أما إذا كان يفضل الأجهزة المحمولة ... فيتوفر الـ ننتندو دي اس من شركة ننتندو... يتميز بشاشتين واحدة منهم باللمس. و العاب ضريفة و مسلية.

أو الـ بي اس بي و هو البلي ستيشن المحمول من شركة سوني و يميزه أن ألعابه على أقراص صغيرة و رسوم و قوة العابه تقارب رسوم و قوة العاب البلاي ستيشن 2 و هذا شيء جبار بالنسبة لجهاز العاب محمول .... هذا غير أن العابه من صنف العاب البلي ستيشن 2 أي أنها غالباً للكبار.

نسيت أن أذكرك أن هذه الأجهزة كلها لا تتوفر لها ألعاب كوبي على عكس البلاي ستيشن 2 ... أي أن ألعابها أصلية وغالية. ما عدا الـ بي اس بي الذي يتوفر له العاب كوبي يتم تنزيها من الإنترنت ( لا بد من سرعة اتصال عالية ) و من ثم و ضعها على كرت الميموري و تشغيلها ببرنامج معين .. أي أن الطريقة متعبة و معقدة نسبياً. أما الدي اس فلا ادري إذا كان يتوفر له كوبي من الإنترنت أو لا ... أتمنى أن يفيدوكي أصحاب الدي اس في هذه النقطة.

و أخيراً يا أختي العزيزة ... إذا كانت هديتكي له ليست مفاجئة .... فالأفضل أن تخيريه ليختار ما يعجبه..

[باريس]

صراحه لخبطتوني ..
اول شي ابرد على هاللي يبوني اتبناهم خخخخخخخخخخ قالو لكم بعطيه هديه بمليون ولا ميه الف ؟؟
كلها الفين او اربعه ميزانيتي عشانه

وبعدين هو اخوي الوحيد من حقي اني ادللـه


اللي تقولون جهاز من مايكروسفت .. الظاهر اسمه اكس بوكس 360
. ماعلمتوني بكم قيمته ..
بعدين انا قريت بالجرايد انه فاشل و الاقبال عليه جد منخفض ..

تبون توهقوني بقرقعانه خخخخخخخ


اول مره ادري انه فيه جهاز العاب محمول هذا شكله بجيبه لي خخخخخخخ
امزح .. بس تقولون اشرطه اصليه .. يعني كم بيوصل سعرها .. مابي بعدين اتوهق اصير انا اللي اجيب له الاشرطه


ونينتدو وشو الحين ؟ مثل البلاي ستيشن ؟
طيب وش يفرق جهاز عن جهاز ؟


وبالنسبه لهذي الاجهزه من وين اجيبهم في الرياض
لاني ماعرف شييييييييي


ومشكوووورين

[باريس]

ايه على فكره ابغى الهديه مفاجاءه له
عشان ينقز ويحب راسي ويقول My big sis

{{---- امنيتها يعترفون بها انها اختهم الكبيره

[Electro M]

صراحه لخبطتوني ..
اول شي ابرد على هاللي يبوني اتبناهم خخخخخخخخخخ قالو لكم بعطيه هديه بمليون ولا ميه الف ؟؟
كلها الفين او اربعه ميزانيتي عشانه

وبعدين هو اخوي الوحيد من حقي اني ادللـه

تحسين ناس ما شافوا خير

الله يخليكم لبعض

المهم بخصوص الاكس بوكس الجديد سعرها مرتفع بقوة و يتعدى ال4000 ريال على ما سمعت يعني شيليه من بالك
اما الالعاب المحمولة فمثل ما ذكروا الشباب العابها اصلية يعني ما تنزل عن 150 ريال حسب علمي
لكن اذا كان عندك اتصال سريع تقدرين تشترين جهاز PSP الي يعرض تقريبا نفس رسوم PS2 و يقدر عاد ينزل الالعاب عن طريق الانترنت
اما جهاز DS حق الننتندو فرسومه اقل جودة بشوي و العابه كلها اصلية

هالفترة ما فيه اجهزة تستاهل لذا اذا انت مستغنية مرة عن فلوسك حوليها لي و اكسبي فيني اجر احسن من انك تشترين هدية تبلشين فيها بعدين

[][-][Mr.ZeNoN][-][]

أنصحك تشترين DS..

لانه سعره رخيص بـ650 ريال مع لعبة ((وهذا لما سألت عليه قبل كم شهر أجل كيف الحين؟؟))

وبإمكانك شراء عدة ألعاب الوحدة تقريبا بـ110 ريال..يعني فوق الجهاز أكثر من 10 ألعاب..بعكس الـPSP العبة بـ200 ريال

وصدقيني بيستمتع كثير..خاصة ألعاب المغامرات والـRPG ..والزبدة تختارين الألعاب إللي يبيها..

وخيار آخر..تشترين لابتوب أو كمبيوتر مكتبي..

والقرار بيدك..

[rushin_911]

فكرة أخرى إذا أخوك راعي موسيقى ليه ما تجيبين له أورج؟
هديّة رايقة و حلوة و سهل العزف عليها أي واحد يقدر يدقدق له كم دقّة

[Arnegrim]

تقدرين تشتريلة جهاز Nintendo DS
سعرة رخيص ( 500 درهم )
شي فيه وايد ألعاب جميلة مسلية و فيه شاشتين وحدة بالمس ^^

اوPSP و هو من سوني
أغلى من DS حيث ان اخر مرة شفتة كانت في جيتكس و كان سعرة 1000 درهم
رسومة اقوى من الدي أس و يقدر يشغل عليه أفلام و ما اقد اقول اكثر من هذا لأني ما اشتريت الجهاز إلين أحين

او Xbox 360 مع ان شي وايد ناس يشتكون منه و سعرة غالي ( سمعت انه 4800 درهم >< )
مع ان سعرة برع وايد رخيص ( 350 $ )

[Classic Evil]

اشتري له لابتوب إذا همتج عالية ...



ولا اشتري له PSP ..


واذا ما تقدرين عليهما , جيـبـي له سيارة ريموت كنترول

[باريس]

صدق انكم فله ..

المفروض اتوقع هذا مدامي داخله على منتدى الالعاب

وانا اكتب الموضوع .. وانا اقول عسى القى واحد بسسسس يرد علي ..
وماشاء الله عليكم ماقصرتو .. على ان بعضكم يبيله طراق خخخخخخخخخخخ
امزح
الحين يقولون هذا وحنا رادين عليها تقول طراق .. اجل لو ماردينا وش تقول لنا !!



الحين اللي فهمته منكم انكم ترشحون لي PSP
بس اللي ماعرفته وش دخل الاتصال السريع فيه .. عشان احمل العاب يعني ؟
اذا هذي هينه
بس اذا قصدكم ان الواحد مايلعب الا باتصال .. هذي خخخخخخخخ
طيب لما اروح اشتريه وش اقول " عطني بي اس بي .. حق الالعاب "

هالفترة ما فيه اجهزة تستاهل لذا اذا انت مستغنية مرة عن فلوسك حوليها لي و اكسبي فيني اجر احسن من انك تشترين هدية تبلشين فيها بعدين

هالحين يوم جيت ابشتري تقول مافيه شي يسوى :mad22:

اشتري له لابتوب إذا همتج عالية

في البيت جهاز مكتبي "دسك توب " واحد
و 2 محمول " لاب توب "
وما اشوف لعبنا بهم شي !!!

واذا ما تقدرين عليهما , جيـبـي له سيارة ريموت كنترول

بثاني ثانوي اشتري له سياره بريموت !!
تبيه يصكني بالسياره وريموته

XBOX 360

تشترين جهاز PSP الي يعرض تقريبا نفس رسوم PS2

أنصحك تشترين DS..

تقدرين تشتريلة جهاز Nintendo DS

الحين اعتبروني غبيه
هذي اللي تقولونها كلها تشتغل على مممم ماعرف اسمائهم .. هذي اللي مثل يد البلاي ستيشن
واللي مثل قير السياره ؟؟!!