الله يستر لا ينحذف هالموضوع مع اخوه
للتوضيح تم حفظ الموضوع في جهازي لذا اللي حذف المواضيع تبع الشهرين السابقين عشان يغطي نقطة انه حذف موضوعي من غير سبب يوفر على نفسه المجهود هالمرة
لان المؤمن لا يلدغ من جحر مرتين
و من يومها و انا كل مواضيعي اخزنها عندي قبل ما انشرها
حتى ردودي اللي احس اني تعبت عليها اخزنها بعد <=== نرجسية الا شوي
نخش في الموضوع اللي قد يقول قائل او تحديدا قائلة - مسوي انه خلاها بصيغة المؤنث- انه عنصري لانه شبه موجه للتماسيح
لكن اقول لا في الاخير راح ندخلكم في السالفة لذا لا تسكرون النافذة من الحين
الموضوع طال عمركم اني توني راجع من مباراة كرة قدم
حماسية اي نعم
بين شباب هالله هالله
حصل فيها اصابات؟
لا بالنسبة لكل اللاعبين
ايه بالنسبة لي
الفريق الثاني اليوم حاط دوبه دوبي ما ادري ليش
ثلاث انبراشات خطيرة جتني
و انا من النوع اللي يعني عادي اقسم بالله اسجل هدف في مرماي و لا اروح اكسر واحد عشان كورة
بمعنى اني لما اخش على واحد و احس ان امكانية اصابتي له او ضربتي له تكون نسبتها 20% و الله غالبا ما اخش
و ان خشيت و حسيت اني ضربته حتى لو ضربة خفيفة اوقف و ما اتابع ملاحقة الرجال كاعتذار مني خلال اللعب
لكن للاسف في ناس الله يهديها ما ادري تحس انها تقدر شي اسمه فوز و تلعن شي اسمه خسارة حتى لو كانت في لعبة ما راح تقدم و لا تأخر
و هالنوعية حمانا الله و اياكم موجودة في كل مكان
و اخوكم في الله الي هو انا - لجولدن سكاي لانه يتنح احيانا خصوصا انه يحب فيلم سلاحف الننيجا سكار فيس- و لله الحمد تقدرون تقولون ان كان الله وهبني موهبة فهي المرونة و قلة تعرضي للاصابات - ما شاء الله لام عيون جريئة
بمعنى اني لما يخش علي واحد كأنه داخل الدم و لا العار اعرف اتصرف بردة فعل سريعة
مثلا اليوم دخلت في واحد كبريين لانه يجي ناقز علي تقول ناوي يسوي لي حركة المصارعين هذيك اللي ينطون برجولهم الثنتين
و الطريقة هي دفع الكرة بين قدميه بينما هو في الهواء ثم القفز من فوقه و هي اسهل حركة لانه غالبا الكبري يكون مفتوح على مصراعيه
احدى الطرق الثانية هو لما واحد يخش عليك برجل واحدة وناوي يجيب اجلك
المس الكرة بسن القدم من الاسفل بحيث انه لما يدفعها على رجلك تنط الكرة فوق و بتجاه تحركك
المهم انه اليوم اللي دخلت فيه كبريين الظاهر انه حقد
و جا في احدى الهجمات هدانا الله و اياه و خش علي بكامل جسمه
يعني الكرة كانت في جهة و انا في جهة لكنه قرر معاقبتي و اطاحني ارضا بقوة
ما علينا
انا لما العب كورة ما اتنرفز من هالامور لاني احسن الظن بالطرف الثاني و اقول حماس
هذه طبعا تعتبر بسيطة لانه جسم بجسم
الحالة الثانية وقفت الكرة بصدري و جيت بسددها على الطاير
الا واحد من الشباب خاش علي من ورى و حاط رجله او بالاصح اسفل جزمته ذات الدبابيس على مشط رجلي
و عينك ما تشوف الا النور
حسيت ان المفصل انخلع في البداية
لكن الحمدلله الظاهر امي داعية لي و كانت كدمة بسيطة
برضوا ما علينا
الرجال اعتذر و انا مثل ما ذكرت سابقا اعتبرها لعب كورة و كل شي وارد فيها
الحالة الاخيرة و اللي فعلا رفعت ضغطي لسبب يأتي لاحقا
قطعت الكرة من المنتصف
عديت من الاول بحركة دينلسون اللي يحرك قدمينه فوق الكرة
الثاني جاني من اليسار و اسهل طريقة لتخطي اللاعب المندفع هو انك تحول الكرة لنفس الجهة المندفع منها لانه بيواجه صعوبة في تغيير اتجاهه
و عديت منه لكن الكرة طالت علي شوي و ركضت لها و فعلا قربت منها و كان في واحد الله يهديه جاي من بعيد
المهم لما خلاص صارت في مجالي عشان اتفادى الرجال المندفع نغزت الكرة بطرف قدمي حتى اخليها تتقدم شوي و كنت وقتها في الهوا لتفادي الرجال المنطلق
لكنه للاسف ما كان ناوي خير
المهم انا بصراحة ما ادري وش صار لان الدنيا ظلمت وقتها
واحد من الشباب يقول انه بعد ما نغزت الكرة الرجال اللي كان خاش علي ضرب رجلي اليمين اللي نغزت فيها الكرة و بما ان جسمي كان في الهواء و رجلي اليمين كانت هي الارتكاز لي فقدت توزني و درت بزاوية 90 درجة في الهواء قبل ما اطيح على يدي اليمين بشكل خلا اللي يشوف الوقعة يقول انخلع كتفي
لكن الحمدلله مثل ما ذكرت سابقا ان كان فيني ميزة فهي و لله الحمد و الشكر عدم تعرضي للاصابات من لعب الكرة - ما شاء الله مرة ثانية - و قمت زي الجني لكن للاسف حسيت ان عضلة فخذي اليمين تاثرت من الوقعة لذا قل ادائي في منتصف الشوط الثاني و الحين بديت احس بألم خفيف في عظمة الترقوة - الله يستر من بكرة -
المهم بعد ما خلصت المباراة
انا بصراحة للحين ما ادري من اللي سدحني ارضا حتى الان
سألت الشباب و قالوا لي فلان
المهم هالفلان الله يهديه ما ادري ركب راسه و قال انت اللي طحت من نفسك انا ما لمستك
قلت له يا ابن الحلال انا لي 3 شهور العب كورة مع الشباب و انت اول مرة تجي هنا
و المرة الوحيدة اللي طحت فيها بهالشكل كانت اليوم و على يدك
وشلون ما لمستني؟
الرجال ما ادري الظاهر انه اذا اخطا يصلح خطاه بطريقة معروفة عند السعوديين و هي الاستهزاء بالطرف الثاني و محاولة عدم الشعور بالذنب نهائيا
مع اني ما اتنرفز من اللي يكسروني داخل المباراة حتى لو ما اعتذروا لي لاني انسى و الحماس يجب ما قبله
الا ان هالاخ الكريم للاسف نرفزني بقوة و بغيت اتدابغ انا و اياه لما قال انت خكري؟!
طبعا بغيت اتدابغ معاه كلاميا فقط و الا انا ما في ابرد مني
و خصوصا اننا فزنا عليهم بفارق 3 اهداف
المقصود من هالموضوع هو نبي نعرف وجهة نظر الشباب تجاه لعبهم في الكورة
هل هم من اصحاب مبدأ الدم و لا العار؟
و وش ردة فعله لو تعرض لضربة قوية؟
و هل سبق ان تدابغ مع احد بسبب مباراة كرة قدم؟
اما البنات - ادري انكم تحسبوني جريتكم لكن لا تخافون جا دوركم -
وش ردة فعلك لو صديقتك سرقت الباربي حقتك ثم كسرتها؟
هل تصيحين و تزاعلينها؟
هل تسألينها عن سبب سرقتها لك؟
ام انك تسامحينها و تقولين الدعوة لعبة و ما تستاهل الفراق؟
شاكر لكم سعة صدوركم
و نراكم على خير
.
)
...
