بعدين رحنا للقصر القديم ووريتهم المكان اللي صارت فيلو الحادثه
قعد الفريق يفحص المكان ويبحث عن الأدله
قبل ما يروحو قالتلي ورود انو بكره لازم اجي عندهم المقر عشان نشتغل على القضيه
وبعدها ركبو كلهم في السياره الحمره وراحو
قلت لعم وابله ساره " ايش رأيكم في الفرقه ؟ "
قالت ابله ساره " مع انهم صغار بس ماشاء الله شكلهم كده كأنهم فرقه محترفه "
اما عمو سمير قال " لا والله فرقه عجيبه , كلهم مطقمين نفس اللبس ونفس النظاره , لا واخطر واحد فيهم رامي , تحسوه داخل غلط كلأنو لسه ابتدائي "
انا ضحكت وقلت لعمو " لا تستخف بيلو , يقولو عندو حظ يفلق الصخر "
ابله ساره " ايوا صح يا لارا , هما حيشتغلولنا في القضيه ببلاش ؟ "
انا " اظن ببلاش .... اصلا هما عندهم فلوس تكفي بلد ههه "
عمو سمير " لا بس ما يصير زي كده , على الأقل جيبي لكل واحد هديه "
انا " طيب انا بكره حروح عندهم وحجبلهم معايا هدايا "
يا ترى ايش اجيب لكل واحد منهم
اليوم رحت السوق من بدري عشان اشتري هدايا لفرقة التحري
وبعد ما خلصت تسوق رحت طوالي على مقر الفرقه
لمن شاف شادي الأكياس اللي معايا حسبني جبت معايا غدا
قلتلو " هادي هدايا بسيطه جبتلكم اياها "
ابتسم شادي وقال " يا سلام هادي اول مره يجبلنا فيها احد هدايا "
بعدين نادا على بقية الفريق وقلهم " تعالو بسرررعه لارا جابتلنا هدايا "
جو كلهم متحمسين بيشوفو ايش جبتلهم
طلعت اول شي هدية ورود واعطيتها اياها
جبتلها مجموعة روايات بوليسيه
جات حضنتني وقالت " مره حلوه الهديه مررره شكرا "
فتحها وقال " شكرا " بكل برود
انا جبتلو علاقة مفاتيح على شكل كمبيوتر
قلتلو " شكلها الهديه ما عجبتك "
طل فيا وانكسف وقال " لا عجبتني "
فتحتها وفرحت وقالت "لوني المفضل , مررررره شكرا "
انا جبتلها بلوزه لونها بنكي
فتحها ولبسها في يدو وقال " هادي احله هديه اخدتها في حياتي , شكرا مره "
انا جبتلو اسوره جلد حمره ومكتوب عليها " Friendship " يعني صداقه
واخيرا , اعطيت رامي هديتو
لمن شافو مره انبسط وقعد يحضن في الدبدوب
قلي حيسميه "لولي" على حرفي
بعد ما خلصنا تسليم الهدايا بدأ وقت الجد
تقول ورود انها دورت على سجلات القضيه في الشرطه وحصلت على بعض المعلومات
انا استغربت كيف قدرت توصل لسجلات الشرطه
بس قالتلي انو ابو سالي عندو معارف كتير في الشرطه , ويقدر يحصلو على اي معلومات يبغوها
تقول ورود انو مافي معلومات مهمه بس تقول انها اكتشفت شي غريب
اكتشفت اشياء غامضه عن المحقق اللي حقق في قضيه عمار
اسمو انس وهو متزوج وعندو ولد واحد
حصلت في بيتهم حادثة انتحار
وبعدها اختفى ولدهم في ظروف غامضه
وبعدها زوجتو دخلت في غيبوبه
وبعد اسبوع بعد ما صحيت اختفت هيا التانيه
انس بعدها قرر انو يبحث عن زوجتو وابنو بنفسو
كلنا استغربنا من الكلام اللي قالتو
معقوله تكون في صله بين القضيتين
انا قلت " طيب ما في احد من عيلت انس ممكن يساعدنا ؟ "
ورود " في امو وابوه واختو واخوه , اتصلت بأختو اليوم وعملت معاها موعد بعد يومين "
شادي " اتخيلو يطلع منجد في علاقه بين اختفاء عمار وسوار واختفاء زوجت وولد انس "
سالي " كده القضيه حتتعقد اكتر من ما هيا معقده "
رامي " طيب امكن زوجت انس سافرت سويسرا تشتري شوكولاته "
كلهم طلو في رامي بنظرات غاضبه وقالو " رامي قوم سوي قهوه احسن "
قتم هوا فرح وقال " طيب الحين اسويلكم قهوه "
تامر عدل نظارتو وقال " انا عملت بحث عن والد عمار "
ورود" ايوا صح ايش صار معاك "
تامر " طلع كلام والد عمار صحيح , هوا مو ابوه الحقيقي "
انا انصدمت من كلامو وقلت " منجدك تتكلم؟ "
قال تامر " ايوا , سألت بعض الناس اللي يعرفوهم وقالولي انو هما اتبنو عمار "
شادي " طيب مين ابوه وامو الحقيقين ؟ "
تامر " يقولو انو في يوم قبل 14 سنه جات امرأه مجهوله عندهم وكان معاها عمار وكان عمرو 3 سنين تقريبا , اتوسلت ليهم عشان ياخدو عمار ويربو عندهم واعطتهم فلوس, ووعدتهم انو لمن يصير عمرو 16 حتجي تاخدو وتعطيهم فلوس كتيره , بعضهم قالو 10 مليون "
حسيت عندها انو القضيه دي حتتعق اكتر واكتر
معقوله يكون دا الكلام صحيح
وليش حتجي تاخدو لمن يصير عمرو 16 ؟
امكن لو وصلنا لأهلو الحقيقين كل شي حيتحل ؟
امكن هوا الحين عند اهلو الحقيقين , وامكن سوار معاه
كل دي الأفكار كانت بتدور في راسي
عمار ..... ياترى انتا فين ؟