شالني عمار بين يدو ونط من الشباك وهوا شايلني
انا صرخت وخفت وعمار ضحك عليا
بس الحمدلله نزلنا على الأرض بسلام
نزلني عمار على الأرض ومشينا انا وهوا الين ما وصلنا للبوابه حقت البيت
انا وفي الطريق سألتو " كيف دايما تجيني بسرعه وتختفي بسرعه ؟ نفسي اعرف كيف "
عمار ضحك وقال " دي معلومات سريه ما اقدر اقولك عليها هههه "
انا " لا قولي لازم اعرف "
عمار " طيب , انا مو مو زي اي انسان عادي , في بعض الأشياء تميزني عن باقي الناس ...ووحده من هادي الميزات سرعتي في الحركه "
انا " يا ويلي يا مميز انت "
عمار " يعني منتي مصدقتيني " اعطاني ظهرو وقال " اركبي وامسكي كويس انا مني مسؤول لو طحتي "
انا طلعت على ظهرو ومسكتو من رقبتو بقوه
ما مرت ثانيه إلا انطلق بكل قوه
مشينا مره بسرعه
من كتر السرعه شعري طار وفمي مو راضي يتسكر
شكلي كان تحفه
بس في ديك اللحظه وانا مع عمار , حسيت بالأمان
كنت مره مبسوطه اني الحين معاه , وهوا معايا
اتمنيت انو نفضل سوا على طول
قطعنا مسافه كبيره وبسرعه فائقه
امكن في عشر دقايق قطعنا نفس اللي نقطعو بالسياره في نص ساعه
انا قلت لعمار " ما تعبت "
بس شكلو ما سمعني من قوة صوت الهوا
بعد ربع ساعه من بدايت الرحله وصلنا
وقف عمار في مكان غريب اول مره اشوفه
اظن اننا بره المدينه
كأننا في قريه من القرى
كان في باب للقريه دخل منو عمار وقلي الحقو
شكل القريه كان مخيف شويه
المباني طرازها قديم شويه
ومافي ولا احد في الشوارع
كأنها قريه مهجوره
واحنا بنمشي سمعت احد بيتكلم يقول " شخص غريب دخل القريه "
كان الصوت طالع من شباك واحد من البيوت
وبعدها اندق جرس من داك البيت
صوت الجرس كان مره عالي
بعد ما اندق الجرس , جرس تاني دق وتالت ورابع
وطلعت اصوت ناس كتيره من داخل البيوت
انا خفت ومسكت يد عمار
طل فيا عمار وقال " لا تخافي محا يصير شي , دا تنبيه من اهل القريه انو احد غريب دخل "
طلع من احد البيوت رجال كبير في السن قرب من عمار وقلو " مين دي ؟ وكيف دخلتها هنا ؟ "
عمار قلو " لا تدخل "
الرجال عصب ومشي وقال هوا بيمشي " انا حبلغ الرئيس وهوا حيتفاهم معاك "
انا حسيت نفسي داخله غلط
قلت لعمار " شكلي بسببلك مشاكل كبيره "
عمار " لا لا ما في مشاكل ولا شي "
كملنا طريقنا في القريه
طول الطريق واحنا بنمشي كان في ناس طالعه من بيوتها تطل فيا نظره شريره
كأنهم ما يبغوني في قريتهم
مشينا اللين ما وصلنا لمكان كبير محاط بسور كبير ومره عالي
قلي عمار " دا بيتي "
من بره مهو باين شي عشان السور مره طويل
كان عليه من بره نقشات غريبه
كأني شفت هادي النقشات في مكان قبل كده
عند الباب كان في حارسين واقفين
قلهم عمار " افتحوا الباب "
الحارسين اترددو اول وقالو " بس يا سيدي ....."
عمار قلهم " لا تخافو انا حكلم الرئيس "
الحارسان " طيب اتفضل سيدي " وفتحولنا الباب
لمن دخلنا انا اتفاجئت
المكان مره كبير
وفي مباني كتيره في كل مكان
وفي الوسط في بيت كبير
وفي ناس كتير وكلهم لابسين نفس اللبس
كلهم لابسين وشاح بني فيلو غطى للراس
اما لبس عمار كان وشاح اسود وفيلو طبعه حمره من ورا شكلها شبه القلب وليه غطى راس بس عمار مو حاطو على راسو
انا سألتو " عمار ليش لابس دا اللبس الغريب ؟ وليش كل الناس اللي هنا لابسين نفس الشي "
عمار " كده النظام هنا , لبسك على حسب رتبتك , الخدم يلبسو بني والحراس رمادي وفي كمان اسود وابيض"
انا " اها فهمتك "
مشيت انا وعمار الين ما وصلنا لواحد من المباني
قلي عمار " دا المبنى اللي اقعد فيلو "
فتحلي الباب وقال " اتفضلي "
لمن دخلت لقيت لينا جوا
سلمت عليا وقالت " اهلا اهلا , ايش الزياره الغير متوقعه هادي "
انا قلت " والله انا حتى مني مصدقه اني هنا "
لينا " اتفضلي اقعدي "
انا قعدت على الكنبه جنب لينا
انا " كيف صحتك الحين كويسه , اخر مره شفتك فيها كان مغمى عليكي "
لينا " لا الحمد لله انا صحتي تمام , بس اول عشان استخدمت كل طاقتي , شويت راحه ورجعتلي تاني "
انا " كيف قدرتي تسوي كده ؟ مره اذهلتيني داك اليوم "
لينا " ليش عمار ما حكاكي عني ؟ "
عمار " لسه ما قلتلها شي , قلت اخد رأي الرئيس اول "
لينا " اها .. احسن برضو "
فجأه دخلت علينا فاتن
لمن دخلت انا خفت مدري ليش
طلت فيا بنظرات غاضبه
بعدين طلت على عمار وقالت بصوت عالي " عمار مين سمحلت تدخل دي البنت هنا , تعرف لو عرف الرئيس ايش حيسوي , اشبك مخك طار ولا ايه "
عمار قام من مكانو وقال " وفيها ايش لو دخلتها "
فاتن " انت عارف انو لازم محد يعرف اي شي عن دا المكان , وعارف انو ممنوع احد ما لو دخل فينا يعرف اي شي عننا "
عمار " فاتن , انتي اكتر وحده عارفه قد ايش لارا ليها علاقه بينا , وعشان كده لازم تعرف كل شي "
فاتن " دا الشي ممنوع وانا محا اسمحلها انها تبقى هنا ولا دقيقه تانيه "
مسكتني فاتن من يدي بقوه وسحبتني بره البيت
عمار " فاتن , سيبي لارا بسرعه "
فاتن " لا ايش حتسويلي يعني , تشتكي الرئيس , روح قلو بسرعه خليه يعرف انك دخلت غريبه القريه "
" فاتن سيبيها " قالت وحده بنت اول مره اشوفها
لمن قالت كده فاتن سابتني على طول
وكلهم سكتو ونزلو رؤوسهم على تحت
البنت تقريبا قدي , شعرها لوني اشقر ابيض , ولابسه وشاح ابيض طويل
على جانبيها واقف حارسين لابسين رمادي
باين عليها انها رئيسه او شي زي كده
قالت البنت لفاتن " فاتن كم مره قلتلك سيطري على اعصابك "
فاتن " انا اسفه سيدتي "
بعدين طلت البنت في عمار وقالت " اما انت يا عمار تعال معايا , الرئيس يبغى يشوفك "
انا حسيت انني عملت مشكله كبيره لعمار
الله يستر
