هل طريقة أكلي مبالغة ؟ أو تمريني غلط

[ولد ابوظبي]

مرحبا شــباب

عندي مشكلة صغيره متحير منها ومب عارف كيف اتصرف وياها بالضبط
انا اتمرن ضخامه و صارلي اسبوعين وانا استعمل سوبر قينر .. الحينه بدت تظهرلي زيادة الدهون في البطن وبدى ملحوظ عليها .. هل هذه يمكن عشان اني اكثرت من الأكل اللي فيه دهون كثيره .. أو عشان اني مااجري غير مره فالاسبوع..؟
كيف أقدر ازيلهـا .. اخفف من الأكل اللي فيه دسومات مثلا؟ أو انه طبيعي هالشي بما اني اتمرن ضخامه

أنا متحير فهالشي الحينه؟؟ ممكن تساعدوني ..

اخوكم .. ولد بوظبي

[aljoookeeer]

هلا بك أخوي

لا هذا الشيء عادي خاصة أنك تتمرن ضخامة


بالتوفي

[ولد ابوظبي]

مشكوور أخوويهـ .. على وقتك الغـالي..
لأني انا وسواسي مع هالكرشه.. اتضايق منها كثير لما البس تي شيرت وتكون بارزه نفسها

تحياتي

[mashkaljey]

تلعب معده !!!! البعض عند دخوله لجدول ضخامه يهمل تمارين المعده والخواصر فهل انت تهمل هذه التمارين ؟

[MOOKA]

مثل ما قال اخوي مشكلجي
اذا انك تهملها حاول تركز عليها

[AmiTy Ville]

ركز على تمارين البطن مثل ماقالك مشكلجي وبالتوفيق

[ولد ابوظبي]

مشكلجي + موكا + AmiTy Ville

مااهملها حبووبين .. اسويها على شكل 3 جولات .. 30 + 30 + 30 = 90
اليوم الأول

straight leg rises

اليوم الثاني

crunches

راحة
اليوم الثالث
[IM]
sit up ترفع جسمك كامل

اليوم الرابع

straight leg rises

هذي اهيه التمارين اللي اسويهـا . . ازيد التكرار مثـلا؟ او عدد المرات؟

مشكووووورين على إعطائي من وقتكم

ربي يحفظكم
[IM]

[عشــق البطــوله]

ياهلابك حبيبي ..

اخوي الغالي ليتك ذكرت وزنك وطولك عشان نجاوب عليك بدقه ..

عموما بما انك تتمرن بطن بإنتظام اذا فيه احتمال ان عندك دهون بسيطه في جسمك وضخمت بإستخدام بروتين قينز والمعروف ان هذا النوع من البروتينات فيه نسبة فات عاليه وانت جسمك بغنى عن هذي الزياده ..

بالتالي تراكمت الدهون وطلع لك كرش ..

فالأفضل انك تضحي بخيار من الخيارين /

الخيار الأول انك تبتعد عن البروتين اللي تستخدمه وتستخدم لك بروتين يكون فيه نسبة الدهون مناسبه ( مثل بروكومبلكس - او واي بروتين - او نيترو تك )

الخيار الثاني انك تستمر على البروتين حقك ولكن تبتعد عن الدهون في تغذيتك وتبتعد عن الوجبات الدسمه والسريعه لفتره مؤقته الى ان ينتهي البروتين وبعدها تستبدله بـ بروتين آخر يكون قليل الدهون

اذا كنت تبي ضخامه فأنصحك بتناول الكاربوهيدرات ( قبل التمرين ) يعني من الصبح اشحن كاربوهيدرات الى ان يحين وقت التمرين .. وبعد التمرين لاتتناول الا وجبه واحده فقط من الكاربوهيدرات وبعدها توقف عن الكاربوهيدرات لتجنب ظهور الكرش

وبالتوفيق

[AmiTy Ville]

مثل اتفضلو الاخوان بس شي طبيعي وجود الدهون وقليل من الكرش بفترة الضخامه ودامك تلعب بطن فا لاتشيل هم مصيرك بتوصل للتنشيف

العدات حلوه لكن حاول تزيدها ف كل تكراروالعبها بوزن دامك تبحث عن الضخامه والافضل انك باليوم الواحد تلعب اكثر عن تمرين مو كل يوم تمرين واحد بس

بالنسبة للبروتين اللي يستعمله فيه كارب وايد اعتقد

بالتوفيق

[ولد ابوظبي]

عشــق البطــوله
الغـالي .. انا وزني 60 وطولي 169 .. وعلى حسب ماقلت راح أخفف من الكارب بعد التمرين ..يعني سكوب بروتين وبعدين فالعشاء وجبة قليلة الدسم.. و يمكن زيادة اكلي زاد عن حده والجسم خزنها على شكل دهون .. ومثل ماتكرمت بعد .. راح أخلص البروتين وبشترلي بروكومبلكس أو سيريس ماس كخيار ثاني..ويوفقك ربي

AmiTy Ville
ان شاء الله راح ازيدهـا شيخي .. وبالنسبة لتمرين واحد للبطن في كل يوم تمرين هذه على حسب الجدول .. بس راح ازيد عدد المرات وبزيدهـ تمرين ثاني.. ويوفقك ربي

مشكووورين على التواضع و تفرغكم وردكم السريع عليه وعلى غيري من الأعضاء .. فميزان حسناتكم ان شاء الله


اخوكمـ \ولد بوظبي

[scaryface]

امتنع عن الاكلات السريعة وقلل من الكربوهيدرات البسيطة (السكريات) وبدالهم كل كربوهيدات مركبة مثل القمح والشوفان والنخالة الارز والبقوليات

وقلل من السكريات قبل النوم

ولا تنسى زيت الزيتون والحبوب زيت الاسماك لانهم زيوت مفيدة للجسم

[اللورد الأحمر]

الشباب الصراحة ما قصروا وعطاهم الله العافية ....

وعزيزي لا تنسى تقطع المشروبات الغازية لأنها سبب رئيسي للكرش ....

تحياتي ... اللورد الأحمر ....

[ولد ابوظبي]

scaryface
ان شاء الله حبيبي .. انا الحينه معتمد ع البيت واايد .. ألا أحياااااانا ونادرا مااروح المطعم للعشاء
مااقصرت وتكرمك بالمرور ..

اللورد الأحمر
ماقصرت حبووب .. يعطيهم العافيه واللي يعجبني فيهم سرعة تفاعلهم وتجااوبهم وحبهم للمساعده والله يديمهم على الخير والصحه .. وو افا عليك المشروبات هذي مسوي عليها إكس..

مرهـ ثانيه ماقصرتوا على مرووركم الغـاليين .. وفيكم الخير

ربي يحفظكم .. اخوكمـ ..\ولد بوظبي