اول شي السلام عليكم ورحمة الله وبركاته
بداية احب احيي القائمين على هذا الصرح الرائع من ادارة ومشرفين واعضاء
وانا صراحة كنت متابع له من فترة طويلة جدا ويمكن ما سجلت الا متأخر في رمضان وكنت ابحث واشوف كل جديد بخصوص كمال الاجسام
حتى اني عرفت نص الاعضاء والمشرفين من كثر ما اخش
ما لكم بالطويلة ، المهم :
انا يا جماعة الخير صار لي امارس الحديد 3 سنوات تقريباً من غير انقطاع يمكن هو انقطاع واحد في بداية ممارستي للحديد
ووصلت لمستوى فكري وجسماني ممتاز باللعبة لدرجة انه فيه ناس كانو يقولون اني اخذ مكملات ، وانا والله ما عمري جربتها
وقلت بشوف وزني كم صار بعد الفترة الطويلة هاذي اللي لعبت فيها
شفت وزني بشهر 4 عربي اللي راح كان 74 والطول كان 1.79 ونسبة الدهون كانت 8% ووزنها كان 6 كيلو
والمهم بعد توقف الدراسة بالعطلة الصيفية رجعت للاهل وصار اكلي افضل بكثير مما كنت عليه وبان على جسمي التطور لكن للاسف ما شفت وزني
الى رمضان كان جسمي اوكيه الحمد لله و وصلت مستوى جيد ، لكن بعد رمضان تعرفون بعد العيد تبدا الدراسة واضطريت اني اوقف لانه ميزانيتي كانت ما تسمح لي حتى اني ادخل نادي اقل من العادي وللامانة كنت حاب اكمل لكن للاسف ما قدرت
وانا قبل اسبوع تقريباً يمكن ما كليت اي وجبة لمدة اسبوع كامل قلت ما ابغى اي شي يتغير بوزني اكلي كان كم حبة تمر بس وكم حبة زبيب
وشوي شوي كل شي تروح العضلات تدرجيا
وقلت لازم اخش اي شي علشان احافظ ولو على الاقل وزني او نسبة الدهون ما تزيد
وخشيت كونغ فو وقبل كم يوم رحت ميزان اللي موجود بالصيدليات وشفت وزني
وطلع 63 والطول 1.79 نسبة الدهون واللي حطمني ومانيعارف كيف زادت صارت 9.5 % ووزن الدهون كان 6 كيلو يعني نفس وزنها السابق
مع اني ما كنت اعرف شي اسمه دهون بنظام اكلي
ووزني صار من غير الدهون 57
المهم يا شباب حبيت استفسر منكم هل نسبة الدهون تزيد اذا نزل وزن العضلة ونزل وزن الجسم ؟؟
وثاني شي شرايكم بوزني الحالي ؟؟
وثالث شي اقدر العب كونغ فو مع حديد ومتى تكون اوقات الراحة ، لان اللعبة 3 ايام بس
ورابع شي ابغى انزل نسبة الدهون كيف وكم تكون النسبة المناسبة لجسمي
ومعلوماتي الحالية والسابقة
وزني السابق مع الحديد 74 وزني الحالي 63 من غير الحديد
وزني من غير دهون السابق 68 وزني من غير دهون الحالي 57
طولي 1.79
نسبة الدهون السابقة 8% مع ممارستي للحديد الحالية 9.5% من دون الحديد
وعمري 21
واتمنى انكم تفيديوني هل اقدر استخدم حوارق حالياً او لا وما هو الافضل بالنسبة للمجربين وخصوصاً اخوي توتو وابو راشد وذا كاست والمحترفين وما ودي انسى احد ودنا تفيدونا بخبرتكم
يعني انا حالياً طالب وجالس ادور على شغلة عشان اقدر اغطي مصاريفي واقدر اشترك بالنادي مرة ثانية
ويليت اللي ساكنين بالرياض ويعرفون الاندية الجيدة واسعارها حلوة يعلمونا وقريب من شارع الستين
وعن المكملات وش رايكم فيها
واسف اسف جداً عالاطالة بس هذا اول موضوع لي ومشكورين
مشكورين جميعاً
المشاركة الأصلية كتبت بواسطة RECOVERY
