معلومات المتقدم بالاستفسار :
العمر : 16 , الجنس : ذكر
الطول :168 متر
الوزن : 59 كيلوجرام
و الاستفسار كالتالي :
بسم الله الرحمن الرحيم
السلام عليكم ورحمة الله وبركاته...
انا احب رياضة كمال الاجسام .. بشكل كبير .. مستعد اسوي اي شي عشان هل لعبة ..
بس ابغا مساعدتكم ومساندتكم ونصايحكم يا اخوان
انا دخلت قبل شهر نادي جيم يعني... ولعبت ضخامة ثلاث شهور ... وكنت اكل اكل طبيعي يعني بدون استخدام اي مكمل .. اكلي كان = حليب دسم كامل (مراعي) - عصاير - دجاج - بياض البيض 3 او 4 فاليوم - سمك - موز - سلطة احيانا وفواكه احيانا ... كان قبل وزني 45 مع اللعب والاكل لمدة ثلاث شهور استوى وزني 60 .. وكانت عندي دهون ف جسمي بس قليلة .. وبعد هل ثلاث شهور .. استعجلت وقلت للمدرب ابا جدول تقاسيم .. قالي ما يستوي ... لانه جسمك ما ضخم وايد .. قلت له لا انا ابغا يكون جسمي ف هل ضخامة قال كيفك ... وعطاني جدول تقاسيم ولعبتة لمدة شهر .. وبعد هل شهر ما نقصت وايد لانه كانت الدهون االي ف جسمي شوية اصلا ... صار وزني 54 .. والنتائج = جسمي صار مقسم وعضلات البطن طلعو اكثر والجوانب والكتاف والباي والتراي والحمد لله مع العم اني كنت ما العب رجل ... لانه المدرب قالي بتقصر .. قلت له اوكي
والحين انا قاطع شهر .. وابغا ارجع بعد العيد بكل حماسة .. بس شو المشكلة ؟؟؟؟ تعلو نشوف
.
.
.
1 - اخاف انه عمري ما يناسب لاني توني دخلت 16 واخاف اقصر واخسر طولي
2 - اخاف على العظام والعمود الفقري ( مع العلم اني البس حزام الظهر )
ــــــــــــــــــــــــ
ولاكن اللي يشجعني على هذي اللعبة ويخليني ما انساها ابدا
بخبركم يا اخواني .. تعالو نشوف شو ؟؟..؟
1 - اني يوم لعبت هل لعبة طولي يزيد ما ينقص مع العم اني كنت اشيل اوزان ( مع العلم اني كنت اللعب كل يوم تمرين العقلة كتمرين احماء )
2 - جسمي يطلع بسرعة
3 - اني اشوف بطولات ف مستر اولمبيا ناس اعمارهم 18 وماشاء الله جسم جسم محترم مع العلم انه البطولة ما فيها هرمونات يعني اكيد هو يلعب وعمره 15 او 16 وعليهم طول يعني طولهم مناسب
... ف ب شو تنصحوني يا اخوان هل اني اخذ مكمل غذائي ولا اعتمد على التغدية فقط .. وانا بحاول اني اوفر ال ست وجبات
اتمنى انكم تجاوبون على ...
1 - هل اني بقصر مع العلم اني يوم مارست اللعبة ما قصرت ولاكن طولت لاني كنت اللعب تمرين العقلة
2- اللعب رجل ولا تقصر القامة ... بس اللي اعرفة اني لازم اللعب رجل لانه مهم وايد
3 - هل اعتمد على التغذية السليمة ولا اخذ مكمل عشان نتائج افضل .
والسموحة على الاطالة الزايدة .. بس شو اسوي اعتبركم نفس اخواني والله واسمحوني اذا كان الموضوع مكرر شوية بس حبيت اني اذكر اسألة ثانيه والسمووحة منكم يا اخوان .. وانتظر منكم الرد .. واذا في اي شي انا حاظر .. وعليكم السلام ورحمة الله وبركاته .
