معلومات المتقدم بالاستفسار :
العمر : 23 , الجنس : ذكر
الطول :1.78 متر
الوزن : 62 كيلوجرام
نسبة الدهون : 8.3
و الاستفسار كالتالي :
السلام عليكم
يا جماعه انا ليا دحين تقريبا شهر وتلاته اسابيع في النادي
طبعا اول ما سجلت كان وزني 56.4 ،،
كان على حسب كلام المدرب ناقصني 10.6 كيلو عضلات و3.2 كيلو دهون
جلست فتره تقريبا 3 اسابيع شامل لاني اول مره اسجل في نادي
كنت احمي عشره دقايق يا على السير او مضمار واحيانا سيكل وادخل التمارين
وخلال دي الفتره زاد وزني فيها 3-4 كيلو
دحين ليا 3 اسابيع اتمرن كل يوم عضله
صدر
ظهر
اكتاف ورقبه
باي وتراي
ارجل + سواعد
تمارين متنوعه خفيفه
والبطن اشتغل عليه ايام في الاسبوع على حسب يعني
وزدت التلاته اسابيع دي برضو 3 كيلو
الوزن الان 62.2 ،،
لاحظت لقيت انو الزياده كانت في نسبه العضلات وليس الدهون
يعني برضو ناقصني 3 كيلو دهون تقريبا ،،،
انا طبعا نظام اكلي زي ما هوا زاد شويه كميه الاكل فقط لا غير،،، ما قيد اخدت مكملات من اي نوع
نظامي الغذائي يختلف يوميا بحسب دوامي في الجامعه ولكن اغلب الاحيان هو
حليب + رقايق كلوكز نخاله ( مضطر اخدو عشان عندي امساك ملازمني من فتره ليست قصيره تقريبا سنتين وكنت اخد ادويه ودحين خففت منها وسرت اخد ربع كميه الدوا مع النخاله على الصبح )
وبعدين احيانا تكون في وجبه يعني يا سندويتش بيض مع عصير او كروسون وشاهي
وبعد الظهر على الساعه 3 غدا ،، دجاج او لحم او مكرونه ،، متنوع الاكل ( بعد الغدا اخدلي ملعقه زيت زيتون وملعقه عسل كبيره)
وبعد المغرب اخد قهوه مع كم حبه تمر وبعد العشا حبه موز او عصير موز المراعي واروح التمرين
اول ما اخلص اخدلي عصير مشاكل عشان احيانا تجيني دوخه من نقصان الانسولين فدا يساعدني في التخلص من الشي دا
واحيانا اسبح بس ما ابذل مجهود مجرد تبريد للجسم
واول ما ارجع اكل تلاته حبات بيض او اربعه ،، اتنين بصفار واتنين بدون مع كاسه كبيره حليب
وبعدها بفتره ربع الى نص ساعه اتعشى ،، يعني احيانا فول واحيانا بيض مقلي وايام تونه بس طبعا اكون نسبيا شبعان فما يكون الاكل كتير
وبالنسبه للنوم انا انام في الليل قرابه 6 ساعات ،، ولازم بعد ما ارجع من الجامعه اناملي من ساعتين الا تلاته ،،، يعني تقريبا المجمل 8 ساعات يوميا بس غير متواصله
انا ما اعرف ناوي بعد ما اخلص التلاته شهور دي ابدا اخد بروتين عشان يساعدني في زياده العضلات لاني دحين زدت لكن ماني حاس باي تغيير في الجسم
اريد نصايحكم هل استمر على دا الحال في النظام الغذائي والتمارين ولا ااغير فيها شي ،، وبالنسبه للمكملات متى انسب وقت ابدا اخدها وايش الاشيا الي ممكن اشتريها ،،،
مع العلم انو اكلي مو مرة كتير يعني اشبع بسرعه لكن احاول اكل قد ما اقدر ،،،،
يعطيكم العافيه
المشاركة الأصلية كتبت بواسطة Strong Muscle
