اوزان ثقيلة ام خفيفة

[Mayoood.ad]

لا ياخوي لا تعب ولا يحزنون ،،
ونحن دخلنا المنتدى عسب نستفيد من بعض ،،

بالنسبه للجدول ماشي مشكله اذا تكررت العضله في الأسبوع
لانه أردي بتكون بينها كم يوم راحه ،،
لكن الغريب ترتيب الجدول لأَنِّي اعرف والله اعلم انه الأفضل
تباعد بين تمرين الصدر والأكتاف ، وتباعد بين الظهر والارجل ،،

انا حاليا ماشي على جدول :
صدر وباي - ظهر وتراي - اكتاف وترابيس - ارجل ،،
والراحه مب ثابته عندي يعني مرات أتمرن يوم وأريح ومرات يومين وأريح ومرات ثلاث ايام
يعني مخلي الراحه حسب ظروفي وإلتزاماتي ،،

موفق ،،

[7aMmooD]

اها خﻻص بجرب هل جدول شهر ان شالله
رايك ب هذا
سبت صدر وباي-احد ظهر وتراي-اثنين كتف-ثﻻثاء راحة-اربعاء رجل-خميس صدر وباي-جمعة راحة
بس احس الجدول صدق متعب يعني كل اسبوع العضلة مرتين؟ انا بحريه هل اسبوع وبشوف
فكرت اخلي 4 ايام تمرين و 3 راحة بس كثير الراحة كذا
اذا عندك جدول احسن خبرني وانا بجرب وبقولكم كيف الجدول
ثانك يوو

[Mayoood.ad]

لا بالعكس يومين مب وايد ،،
جرب هالجدول وخلها يومين تمرين وبعدها يوم راحه
وبعدها يومين تمرين ويومين راحه ،،

تدري انه في في جداول يوم تمرين ويوم راحه ،،
في النهايه الراحه في صالح العضله خصوصا انك بتلعب عضلتين في اليوم
وبتختم الأسبوع بتمرين الارجل الي يعتبر مرهق بعد ،،

وفي النهايه التجربة خير برهان
ومن خلالها بتعرف اكثر شو الي يناسبك وشو الي فرق معاك ،،


يور ولكم برو ،،

[7aMmooD]

خﻻص ان شالله من الأسبوع الجاي جدولي 6 ايام اثنين تمرين راحة اثنين تمرين راحة وهكذا
بس سالفة الماي ﻻزم 3 ليتر؟ انا والله أعلم فل يوم لتر ماي تقريبا
هل تتحسب العصاير والحليب؟ ﻻن صعبة 3 لتر ماي وحليب وعصير و خمس وجبات ههههه
يﻻ تصبحوا على خير متحمس من زمان مارقدت نفس هل وقت

[Mayoood.ad]

الحليب والعصائر محسوبة سوائل ولها فوائدها
لكن لا تغني عن الماء ولا تعوض نقصه ،،

بعض فوائد الماء خصوصا للاعب كمال الأجسام :
- يتخلص من السموم والاملاح الزائدة عن حاجة الجسم ،،
- يعطي ليونه للمفاصل والأربطة والجسم بشكل عام ،،
- عامل رئيسي في جميع العمليات الحيوية في الجسم ،،
- مصدر للأوكسجين في الجسم ،،

وصدقني ٣ لتر مب وايد ،،
خصوصا في حالة استخدام المكملات مع الوقت بتسبب ضغط على الكلى
لانه حتى البروتين والفيتامينات اذا زادت عن حاجة الجسم لها أضرار
وكثرة شرب الماء تساعدك في التخلص من الزايد وتريح الكلى ،،

اشرب كاسين على الريق وكاسين قبل النوم وقسم الباقي على مدار اليوم
بتخلصها بدون ما تحس ،،

موفق ،،

[7aMmooD]

بس كان قصدي اني ما اخذ بروتين ف كنت احسب احتياجي للماء أقل
خﻻص انا يحاول ان شالله ^_^
اليوم اول مرة العب سوبر بأي وتراي والله حبيته وعجبني حسيت فيه فايدة
في سوبر ست حق الكتف ابا اكور الكتف واخليه بارز وواضح ومفصول عن الباي على شو أركز؟
شوي وبنام حمدلله لي كم يوم نومي معتدل بس مشكلة وقت الظهر يجيني نعاس مو طبيعي يمكن ﻻن مافي شي اسويه بجرب اشرب نسكافيه
تصبحو ع خير

[Mayoood.ad]

حاول وان شاء الله مع الوقت بتتعود وبتشوفها عاديه ،،
وكمية ال ٣ لتر ينصح بها في كل الأحوال سواء تتمرن او لأ ،، تاخذ مكملات او لأ ،،
هذي من ضمن العادات اليوميه ،،

السوبر ممتاز ونتيجته حلوه بس لا تبالغ فيه عسب ما ترهق العضله
يعني مره الى مرتين في الشهر كافيه ،،

في العاده الكتف الأمامي والجانبي يكون اكثر وضوح وتأثير على الشكل العام
بس طبعا ما تقدر تلعب سوبر امامي وسوبر جانبي ،، اختار واحد ،،
وبالنسبه للفصل عن الباي مع الوقت بتكبر عضلات الكتف والباي وبتشوف الانفصال بشكل أوضح ،،

موفق ،،

[7aMmooD]

صح خﻻص انا ان شالله بين فترة وفترة بلعب سوبر عشان التغيير فقط
بس انا قصدي شو هو اكثر تمرين يركز على تكوير الكتف؟ اعتقد الجانبي اللي تسند على شي بايدك وترفع الدنبل مستوي جانبي بايدك الثانية لين يوصل الدنبل ل كتفك؟ ههههههه شرحي تعبان معليش
الحين انا ايام راحتي هي ثﻻثاء وجمعة بس اكتشفت نادي فيه جاكوزي ومسبح وكﻻسات ايروبكس ورقص وحركات عجبتني ابا اجرب ها
ف حبيت استفسر ترا الكﻻسات 3 ايام احد ثﻻثاء أربعاء
انا كنت ابا اجرب ترا عجبني وتقرييا ساعتين كل يوم المشكلة انو هل ايام يكون على تمرين شو رايكم اخاف تاثر علي وان وزني طايح وكنت ابا أزيد
ف شو رايكم لو اتمرن فل عصر واروح عل كﻻسات من 7 لين 9
و بعدها على طول اشرب ماي وسنيكرز قطعتين؟
شرايكم واللي عنده اقتراح ﻻ ييخل علي
السموحة على الأسئلة وجزاك الله كل خير اخوي مايد

[7aMmooD]

على سالفة يوم الراحة انا ف يوم الراحة احس جسمي راخي وعضلاتي راخية تقول موقف صارلي سنة مادري ليش
اليوم هذا كان اكلي شو رايكم؟
ساعة 12 كاس حليب وسندويتش جبن صغير وكيك من البيت- ساعة 2 برياني و دجاج وبطاطس حلوة- ساعة 5 ونص سويتلي حليب موز - ساعة 6 ونص كليت عل خفيف بيض مسلوق مع الاهل- ساعة 8 ونص كليت سنكرز قطعتين( سناك) لان كنت طالع من جاكوزي - ساعة 9 ونص كليت نفس الغدا ترا كان باقي اكل - ساعة 1 الحين بناام بس شربت كاس حليب وقطعة بسكوت شي خفيف
شو ممكن ازيد او انقص او ابدل ؟ ترا تقريبا كل يوم كذي اكلي بس شكلي بقنع الوالدة ابدا اخذ بروتين لان صراحة الزيادة في الوزن بطيييئة بس حمدلله

[Mayoood.ad]

امين وإياك ،،

الكتف كتله وحده مقسمه لأكثر من عضله وكل عضله مكمله للثانيه
يعني لازم تركز على كل أجزاءه عشان يكبر وتشوفه مكور ( التركيز على الجانبي لوحده ما يكفي ) ،،

بالنسبه للكلاسات مفيده وتعطي مرونه ولياقه
واعتقد يومين في الأسبوع ما تضر بشرط انك تنتبه للسعرات خصوصا انك قاعد تبني
بمعنى اذا حرقت سعرات اكثر مما تاكل بينزل وزنك ،،
وخذلك موزه مع السنيكرس ،،

ايام الراحه هي ايام استشفاء العضله يعني محتاجه اكل صح ،،
زيد كمية البروتين عن طريق البيض والتونه ،،
وضيف على أكلك سلطات ، شوفان ، عسل ، تمر ، مكسرات ، زبادي ،
في بعض الفواكه تساعد في زيادة الوزن مثل المانجو والافوكادو ،،

ولا تستعجل على زيادة الوزن لانه الزيادة العضليه دايما تكون بطيئة
الا اذا تبي زياده عضل ودهون هذا شي ثاني ،،

موفق ،،

[7aMmooD]

خﻻص ترا اليوم عندي كتف وهذا بصراحة اكره تمرين بس اليوم بشد فيه ان شالله
الحين كل يوم اكل بيض وتونة؟ اوك تونا سهلة بس كم بيضة فل يوم؟ وشو احسن وجبة بعد تمرين تونة ولا بيض وﻻ برياني؟
وخﻻص بحاول أضيف فواكه لليوم حقي ان شالله
ﻻ والله ماني مستعجل وﻻ شي بس تعرف الإنسان طماع هههههه تسلم مايد

[Mayoood.ad]

الله يسلمك ،،

مب شرط تونه وبيض ،،
المهم يكون غذاء غني بالبروتين ،،
والبيض انت ومقدرتك في ناس ياكلون اربع بيضات وفي ناس ثمان ،،
ومب شرط دوم مسلوق ،، ممكن تنوع وتأكله مقلي ( افضل مع زيت سمسم ) ،،
وعندك صدور الدجاج والأسماك واللحوم بشكل عام والمكسرات ( تحديدا الكاجو وعين الجمل ) والأجبان ،،

بعد التمرين نفس الشي حاول تاكل وجبه تجمع بين البروتين والكارب ،،

[7aMmooD]

السموحة انشغلت شوي
خﻻص حاضرين ان شالله تسلم والله مايد ما قصرت جزاك الله كل خير
و ان شالله النتائج طيبة
وبالتوفيق حقك انت بعد

[Mayoood.ad]

الله يسلمك ياخوي ويجزاك بالمثل ،،
الله يوفق الجميع ونوصل لأهدافنا ان شاء الله ،،

[7aMmooD]

الحين الزيادة في الوزن تكون بالتدريج؟ يعني ربع الى نص كيلو في أسبوع او اثنين؟
انا ﻻحظت شي فيني اني اسبوع وزني ما يزيد وفي اليوم اللي بعده يزيد كيلو مرة وحدة
يمكن من ميزان النادي حقنا ترا مب رقمي مادري ميزان غريب فيه حديدة لو تطلع يعني وزنك صح ولو نزلت وزنك غلط
المهم انا صارلي أسبوعين على تقريبا 63 مرة ازيد نص كيلو مرة نقص نص المهم اليوم استويت 64.3 ما صدقت هههههه طلعت من الوزن النحس
بحاول اكل عدل اليوم ان شاءالله وانام بدري عشان يثبت ان شالله
10 more kilos to go