ذاك اليوم سبحان من جمعنا, عائلتنا الكريمه كلها طلعت لا ستراحه كانو خوالي عازمينا فيها.المهم يوم رجعنا في جو تملائه السعاده والالفه والروحانيه(وش دخل الروحانيه اللحين )
كننا بمسلسل مصري ,,ماتلاحظون ذا المصاريه اذا رجعوا من النادي ودخلو البيت لازم يضحكون(ليش مايضحكون بالسياره ما ادري)..؟؟
المهم حنا ناوين نسوي مثلهم ,لكن قدر الله اكبر ,يوم وصلنا عند البيت كل واحد فق خشته وقعد يناظر الثاني ويقوله وراه ماتفتح الباب,اكتشفت(مب عاقل نيوتن )بالنهايه ان ما احد معه مفتاح.المشكله اخر الليل واهلي بالشارع ,انا طقتني النخوه قلت انا ابنقز وانهي ذا المهزله قال ابوي:كفو ولدي يا والله التمساح (مسوي يمدح ) المهم وانا اللي اتعلق بالشجره وبالطقاق رقيت فوق الجدار ,عاد يوم رقيت وش انا عند نفسي والتفت على اهلي وانا متشقق وانواع المدح المهم انا مابعد شفت تحت ويوم اني طليت تحت ولا الارض بعيده ياوالله النشبه جيت انزل للشارع طلع بعيد(قاعد افكر وشلون رقيت اصلا )
المهم قدامي ثلاث خيارات اما اني انقز فوق بيت الشعر وذي كثرلي منها او اني اطلع على المظله وبعدين اتزحلق(مب عاقل فتى المطافي )وذي كثرلي منها بعد بقي الحل الثالث اني انقز على الارض وذا بعد كثرلي منه واجد .وش الدبره ياولد وش السواة قلت خلني استغل ذكائي في حل هذي المشكله وانا في ذروه (مايمديكم على ذا الكلمه )تفكيري
,الا وذا الزبيريه صاكتن في....موقع مال امه داعي خلونا نقول (عضو شرف رفض ذكر اسمه )كخخخخخخخخ.
ماعلينا والتفت الاهذا ابوي يقولي اخلص عمى يالرخمه وانا مدري وش اسوي تخوبلت جتني عاد ست الحبايب تقوله ماعليك من وليدي لا يطيح يتكسر قال ايه والله ذا الكرستال حلايا ذا الخشه(والله من زين النفس)وبعدين ناظرني نظره ثاقبه(معجبتني ثاقبه على بالي مثقف خخخخخخ)
وقال اخلص يالبعير فشلتنا لو تنزل على يديك ماضرك شي (لتوضيح طولي 1.90كلم كخخخخخخخ )
التفت عليه وانا على فكره ترا ما احرك الا راسي خايف اتحرك واطيح والظاهر ان هذا اللي قاهره اني ملقيه وراي .المهم قلتله قل ماشاء الله ترا العين حق (والله فاضي )ولا غاير مني عشاني طويل ومزيون
(اما مزيون كثر منها)
ما امداني اكملها الا والزبيريه الثانيه لاحقتني في موقع عضو شرف رفض ذكر اسمه كخخخخخخخخ , المهم خلال ذا الدراما المصريه طلع سواق جيراننا (ابوي يقول وش مسهره ذا الداشر(وانت وش دخل اهلك ))
وانا اللي اسفهل وقلناله جب سلم وجابه وعطوني اياه وحطيته ونزلت ,عاد يوم جيت افتح الباب ,قلت الحين ابوي يبي يقول بعدي ذا التمساح هذا ولدي وانا ابسوي دبلوماسي وابقوله عادي ترا ما سوينا الا الواجب والجنه تحت اقدام الامهات (وش يبي ذا)المهم فتحت الباب ويدخل بنفس شينه ويناظر بالجدار والتفت على بذيك النظره الثاقبه خويتنا وقال ياوالله الرخمه فشلتنا عند سواق الجيران (امحق) عاد بدا النصب يقول يوم اني كبرك وانا انقز جدار طول هذا ثلاث مرات وكل يوم (مايعرف ينصب)(انا ما يقهرني الا اذا قالي كنا نذاكر على لمبه الشارع والله لو هو افلاطون )قلت اها عاد قال منتب مصدق اخ لو ماعلي ذا الثوب الجديد كان وريتك(يلعن ام التصريفه )المهم قالي انا واخوي وانتم يا سملق وراه مامعكم مفاتيح (توه يتذكر )قلنا نسينا ,قلت وانت وراه ما معك مفاتيح قال وانا وشوله جايب رجاجيل مب عشان يشيلون عني المفاتيح اذا كبرت (والله يا ذا الشياب تصريفات )
فيا اسفاه ضاعت مني فرصة البروز العالمي في اسوار بيتنا لكن خيرها في غيرها..!!
oO.. مكتبة برامج التصميم..Oo)::+
المشاركة الأصلية كتبت بواسطة الهكر السعودي
بس ادور على من يمول لي الحين 
