@&* Six Pack مضمون خلال شهرين بمشيئة الله من تجربتي*&@
أقسام الموضوع:
1- المقدمة
2- قصتي وفضيحتيمع السقس باك
3- قواعد وإرشادات للسقس باك
4- النهاية
(المقدمة)
هذا أول موضوع لي في هذا المنتدى الرائع الي تعلمت منه كثير من أسرار كمال الأجسام..
حبيت أنقل لكم تجربتي مع السقس باك خلال تقريبا شهرين ولله الحمد لاقيت مظهر جميل بفضل ربي ثم الأسلوب الي اتبعته.. قبل لا أبدأ راح أعطيكم بياناتي الطول:180 والوزن 85 ونسبة الدهون تقريبا 22%.. (أذكروا الله ياجماعة)..
نقطة مهمة الي هي هدفي من الموضوع هو نمو العضلة بأسرع وقت... يعني مالي دخل بأي جهة أخرى مثل التغذية أو الحرق.. إلخ..
(قصتي وفضيحتي
أنتم طبعا بتستغربون... واضح علي إن لي مدة في كمال أجسام ليش فقط في خلال شهرين لعبت بطن... قصتي ياجماعة الخير.. أنا لي مدة طويلة نوعا ما في الحديد لكن مزلب (أو جاحد) شيء إسمه بطن لأن الي كنت أبغاه ضخامة وبس..طيب تقولون وش الي خلاك تلعبها بعد ذي المدة الطويلة..قبل شهرين تقريبا (وهي بدايتي مع السقس باك) تعرفت على شخصين أصدقا وأصبحت أشرف عليهم أو زي ما تقولوا مدرب لهم فتمرنت معاهم أول أسبوع وبعد ما تمرنا كل العضلات قالوا طيب البطن.. قلت لهم وش البطن هذا..هههه<<< لي وجه بعد أنا وخشتي أشرف عليهم وما أعرف وش هو البطن.. المهم صرفتهم وقلت لهم ما عندي وقت الآن>>>هههه وش رايكم بالتصريفه.. وبعدها جاني حب عجيب للبطن وسهرت كم ليلة وأنا أقلب النت والمجلات عشان أتعرف أكثرعلى السقس باك... بعدها ولله الحمد والمنه جمعت خبرتي في كمال أجسام من تطبيق وتعلم.. وغيرها وتجربتي وتجارب الناس.. ولله الحمد سويت لي جدول بسيط مشيت تقريبا حوالي شهرين أو أقل وظهرت الآثار بفضل ربي الي تعجب مني الي كنت أشرف عليهم وضحك علي...
(قواعد وإرشادات للسقس باك)
نجي الآن للنصائح والإرشادات...بس قبل هذا نسيت أوضح لكم هدفي للبطن (تضخيم بسيط +شدها) إذا كل واحد طبق القواعد الي راح أقولها بإذن الله تلطلع له العضلات في وقت قصير والي يتمناها..
القاعدة الأولى/ التنويع في التمارين وهذي أهم نقطة وهي الي متأكد منها إنه بفضل ربي ثم هذه القاعدة الكبيرة طلعت في وقت قصير...
وهذا رابط للموقع الشهير muscleandstrength.
http://www.muscleandstrength.com/exercises/abs.html
وفيه حوالي أكثر من خمسين تمرين للبطن.
القاعدة الثانية/ عمل ثلاث تمارين الأول لأعلى البطن والثاني لأسفل البطن والثالث للجوانب.
(وكيف تعرف إنها لأعلى البطن أو الأسفل... إذا كنت تحرك به أعلى جسمك مثل تمرين الطحن المشهور فهذا أعلى البطن وأي تمرين تحرك فيه أرجلك هذا أسفل البطن.. والجوانب ما يحتاج لها شرح)
القاعدة الثالثة/ تمرينها يوم ورا يوم تقريبا.. وللتوضيح أكثر أنا جدولي والي أنصح به وخاصة الي مستواه متوسط تقريبا ولكن ليس للمبتدئين (باي وتراي+بطن/أرجل/صدر+بطن/ظهر/كتف+بطن).
القاعدة الرابعة/ والأخيرة- تكون كل تمارين البطن على ثلاث جلسات أول جلسة 20 عدة وفوق والثانية بين 18 و20 عدة والثالثة بين 12 و16.. إلا الجوانب تكون من 16 وفوق تفادي للتضخيم.. وغير ذلك نلعب الجوانب فقط مرتين ليست مثل أعلى وأسفل البطن.
وبكذا بإذن الله راح تظهر لك بسرعة وخاصة إذا طبقت القواعد بالضبط راح تلاحظ بروز في العضلة أكثر وأكثر..... في حاجة أرجو الإنتباه.. الي هي لما أحدد العدد مثلاً 18 عدة يصير أكثر شي تقدر تسويه ولاتقدر تزيد عليه..
وهناك نقطة مهمة وفائدة !! قد يتسائل البعض وش أفضل أمرنها كل يوم أو يومين...راح أرد عليه وأقولك إن أصحاب السقس باك مختلفين فيه ... منهم من قال يوم ورا يوم ومنهم من قال كل ثلاثة أيام ومنهم من قال مرة وحدة في الأسبوع لأن عضلة البطن مثل أي عضلة ثانية تبغى لها راحة... لكن من جهة لوودي حاولت أجمع بين الآراء وصار يوم ورا يوم والجوانب كل ثلاث أيام تقريبا وإذا حصل لك تمزق عضلي حتى ولو بسيط سواء في الجوانب أو البطن أتركها حتى تشفى تماما وبعدها إرجع للتمارين...
(النهاية)
آسف إني طولت عليكم لكني حريص جدا على توصيل المعلومة بالضبط وأي إستفسار أنا حاضر..
أنا قعدت حوالي أسبوع للتنسيق وجمع المعلومات والترتيب... فما أبغى منكم إلا الدعاء لي بالتوفيق ولوالدي
وتكفون ياشبابلاأحد ينقل فضيحتي إستروا ما واجهتوا ياجماعة
تحياتي للجميع لووودي
